រាជធានីភ្នំពេញ ៖ សម្ព័ន្ធធនាគារ អ អេច ប៊ី កាលពីព្រឹកថ្ងៃទី៤ មិថុនា នេះ បានរៀបចំពិធីប្រកួតបាល់ទាត់កុមាររដូវកាលទី២ សម្រាប់ឆ្នាំ២០១៦ ក្នុងគោលបំណងជំរុញលើកទឹកចិត្តកុមារឱ្យមានការជឿជាក់ ក្តីសង្ឃឹម និងមោទនភាពដើម្បីជំនះលើបញ្ហាជីវភាព និងជីវិតតាមរយៈការលេងកីឡា។ ព្រឹត្តិការណ៍នេះ នឹងរៀបចំឡើងនៅក្លិបកីឡាព្រីមមៀម មានទីតាំងស្ថិតនៅក្នុងខណ្ឌទួលគោក ដែលមានកុមារចូលរួមសរុបចំនួន២៣០នាក់ មកពីសាលាបឋមសិក្សាចំនួន១៦ នៅក្នុងរាជធានីភ្នំពេញ និងតាមបណ្តាខេត្តនានានៃប្រទេសកម្ពុជា ។
លោក លឹម លូងសេង អគ្គនាយកនៃធនាគារ អ អេច ប៊ី ឥណ្ឌូឆៃណា បានមានប្រសាសន៍ថា «យើងមានសេក្តីរីករាយយ៉ាងខ្លាំងដែលការប្រកួតបាល់ទាត់កុមាររបស់ធនាគារ អ អេច ប៊ី កំពុងមានការទាក់ទាញការចូលរួមកាន់តែច្រើនឡើងៗពីសំណាក់កុមារកម្ពុជា ចូលរួមក្នុងការប្រកួតបាល់ទាត់នេះជារៀងរាល់ឆ្នាំ។ គោលបំណងរបស់យើង គឺរក្សាការកែលម្អគុណភាពនៃព្រឹត្តិការណ៍ និងផ្តល់អត្ថប្រយោជន៍ដល់កុមារវ័យក្មេងកម្ពុជាដោយផ្តល់ឱកាសឱ្យពួកគេបញ្ចេញទេពកោសល្យក្នុងការលេងកីឡាបាល់ទាត់ និងមានការជួបផ្ទាល់ជាមួយកីឡាករជំរើសជាតិ។ យើងសង្ឃឹមថាការប្រកួតបាល់ទាត់កុមាររបស់ធនាគារ អ អេច ប៊ី បានអនុញ្ញាតឱ្យកុមារបង្កើតចំណងមិត្ដភាពយូរអង្វែង ខណៈពេលដែលការប្រកួតនេះ ក៏បានផ្តល់នូវជំនាញកាន់តែប្រសើរជាងមុន និងជួយបន្ថែមលើកាយសម្បទានរបស់ពួកគាត់ឱ្យមានសុខភាពល្អ»។
លោក ម៉ៃ តុលា អគ្គលេខាធិការរងនៃសហព័ន្ធកីឡាបាល់ទាត់កម្ពុជា ក៏បានមានប្រសាសន៍ថា «យើងកំពុងមានភាពរីករាយលើវិស័យកីឡាបាល់ទាត់កម្ពុជាវ័យក្មេង ព្រោះមានការកើនឡើងនូវការចាប់អារម្មណ៍សម្រាប់លទ្ធផលនេះ គឺជាជំហានសំខាន់ដែលនឹងនាំមកនូវការធ្វើឱ្យប្រសើរឡើងដល់សហគមន៍កីឡាបាល់ទាត់នៅកម្ពុជាឱ្យមានការរីកចម្រើនលឿនក្នុងរយៈពេលអនាគតខាងមុខដ៏វែងឆ្ងាយ។ យើងសង្ឃឹមជឿជាក់ថា នឹងអាចស្វែងរកកុមារដែលមានទេពកោសល្យក្នុងការប្រកួតផ្សេងៗ ដូចជាព្រឹត្តិការណ៍ប្រកួតបាល់ទាត់របស់ធនាគារ អ អេច ប៊ី ឆ្នាំ២០១៦ នេះផងដែរ និងជំរុញឱ្យពួកគាត់បន្តអាជីពជាកីឡាករបាល់ទាត់»៕
ចែករំលែកព័តមាននេះ