រាជធានីភ្នំពេញ ៖ ការប្រែប្រួលអាកាសធាតុ និងភាពរាំងស្ងួតនៅឆ្នាំនេះបានអូសបន្លាយវែងជាងឆ្នាំមុនៗ បើទោះជាដល់រដូវវស្សាហើយក្តី ។ តាមខេត្តមួយចំនួននៅតែមិនទាន់មានភ្លៀងធ្លាក់គ្រប់គ្រាន់សម្រាប់ធ្វើកសិកម្មនៅឡើយទេ ។ ភាពរាំងស្ងួតនេះ បានធ្វើកសិករនៅតាមសហគមន៍មួយចំនួន ដែលចាប់យកការដាំដុះបន្លែជាមុខរបរទី២ បន្ទាប់ពីធ្វើស្រែ ត្រូវរងនូវផលប៉ះពាល់ប្រាក់ចំណូលសម្រាប់ផ្គត់ផ្គង់គ្រួសារ ។
អ្នកស្រី យូ លន់ ប្រធានសហគមន៍កសិកម្មបន្លែចម្រុះជាយក្រុងកំពង់ស្ពឺ បានឲ្យដឹងថា ៖ « កាលពីដើមឆ្នាំមុន ក៏ដូចជាឆ្នាំនេះ គិតចាប់ពីខែមករា ដល់ខែមេសា សមាជិកដាំបន្លែសាលាដ ៣០គ្រួសារក្នុងចំណោមសមាជិកសរុប៧០គ្រួសារ អាចទទួលបានចំណូលពី១លានរៀល ដល់២លានរៀលក្នុង១ខែ ។ ប៉ុន្តែចាប់ពីខែមេសារហូតមក បន្លែរបស់ពួកគាត់ដែលដាំបាន បែរជាត្រូវខូចខាតដោយសារអាកាសធាតុក្តៅខ្លាំង អត់មានភ្លៀង។ ប៉ុន្តែពេលភ្លៀងធ្លាក់ខ្លាំងបានធ្វើបន្លែរលួយ ដែលធ្វើឲ្យប៉ះពាល់ដល់ចំណូលរបស់ពួកគាត់ និងបាត់បង់អតិថិជនរបស់សហគមន៍ផងដែរ » ។
អ្នកស្រីបន្តថា ៖ « នៅពេលអាកាសធាតុអំណោយផលកន្លងមក ក្នុងមួយថ្ងៃខាងសហគមន៍អាចផ្គត់ផ្គង់បន្លែដល់អតិថិជនបានប្រហែលជា៣០០គីឡូក្រាម ។ ប៉ុន្តែពេលនេះ បន្ទាប់ពីការដាំដុះជួបនឹងបញ្ហាមក ធ្វើឲ្យការផ្គត់ផ្គង់បន្លែរបស់យើងទៅលើទីផ្សារបានត្រឹមតែ១០០ ទៅ១៥០គីឡូក្រាមប៉ុណ្ណោះ ។ ក្នុងដំណាក់ការនេះ កសិករនៅតែខំប្រឹងប្រែងដាំដុះបន្តទៀត ទោះបីជាដឹងថា ទទួលបានផលតិចតួចក្តី » ។
ភាពរាំងស្ងួតបានអូសបន្លាយនៅក្នុងឆ្នាំនេះ ចំពោះកសិករដែលមានគំនិតច្នៃប្រឌិតខ្ពស់ក្នុងវិស័យកសិកម្ម ជាពិសេស ការដាំដុះបន្លែ និងចិញ្ចឹមសត្វនៅខេត្តតាកែវ ក៏គេចមិនផុតពីការប្រែប្រួលអាកាសធាតុដែរ ។
លោក រស់ ម៉ៅ បានឲ្យដឹងថា ៖ « កសិករនៅក្នុងតំបន់បានរងនូវផលប៉ះពាល់ច្រើនក្នុងការដាំដុះ ដោយសារតែអាកាសធាតុក្តៅពេក ធ្វើឱ្យដំណាំ និងបន្លែស្វិតស្រពោន ។ នៅពេលស្រោចទឹកកាន់តែច្រើន ធ្វើឱ្យដំណាំទាំងនោះឆាប់ងាប់ ជាហេតុធ្វើឱ្យការចំណាយលើការហូបចុកក្នុងមួយខែៗអស់ច្រើន » ។
លោកបន្តថា ៖ « សព្វថ្ងៃនេះ កសិករប្រកបរបរដាំបន្លែលក់ក្នុងតំបន់នេះមានប្រហែលជា១០កន្លែង ។ ភាពរាំងស្ងួតនេះ គ្រួសាររបស់ខ្ញុំក៏រងនូវផលប៉ះពាល់ផងដែរក្នុងការដាំបន្លែស្លឹក និងការចិញ្ចឹមកង្កែបមានប្រហែលជា៣០%។ ប៉ុន្តែសម្រាប់កសិករផ្សេងទៀតបានរងផលប៉ះពាល់ប្រហែលជា៦០% បើធៀបនឹងឆ្នាំមុន។ សម្រាប់ឆ្នាំនេះ ក្នុងមួយសប្តាហ៍យើងអាចផ្គត់ផ្គង់បន្លែ និងសាច់នៅលើទីផ្សារបានប្រហែលជា២០គីឡូក្រាម ហើយទទួលចំណូលបានតែពី៥០ម៉ឺនរៀល ទៅជិត១លានរៀលប៉ុណ្ណោះ បើធៀបនឹងពេលមុន គឺមានការធ្លាក់ចុះ » ។
អ្នកស្រី យូ លន់ បានលើកឡើងផងដែរថា ៖ « ទាក់ទងនឹងបន្លែនេះ ខាងសហគមន៍បានអនុវត្តគោលការណ៍ដាំដុះដោយប្រើប្រាស់ជីធម្មជាតិ គឺយើងសហការជាមួយក្រុមហ៊ុនជប៉ុន សម្រាប់ការដាំបន្លែផ្តល់នូវសុខភាពជូនបងប្អូនក្នុងតំបន់ និងអតិថិជនក្នុងក្រុងភ្នំពេញផងដែរ ។ ខ្ញុំសង្ឃឹមថា នៅឆ្នាំបន្ទាប់ប្រសិនបើអាកាសធាតុអំណោយផល ការផលិតរបស់សមាជិកសហគមន៍នឹងទទួលបានជោគជ័យ ហើយអាចផ្តល់ប្រាក់ចំណូលល្អប្រសើរដល់សមាជិកទាំងអស់ផងដែរ » ។
ចំណែកលោក ម៉ាន កូប អ្នកគ្រប់គ្រងផ្នែកស្តុកបន្លែ និងផ្លែឈើនៃភូមិផ្សារកសិកម្មធម្មជាតិក្នុងរាជធានីភ្នំពេញ ដែលមានទីតាំងនៅតាមបណ្តោយផ្លូវលេខ៣១០ សង្កាត់បឹងកេងកង៣ បានឲ្យដឹងថា ៖ « សព្វថ្ងៃនេះ ភូមិផ្សារកសិកម្មធម្មជាតិ បានទទួលការផ្គត់ផ្គង់បន្លែពីកសិករដាំបន្លែមិនប្រើប្រាស់ជាតិគីមីមកពីខេត្តដូចជា ខេត្តកណ្តាល កំពង់ស្ពឺ (សាលាដ) ស្វាយរៀង (ត្រប់ ត្រកួន) និងបាត់ដំបង (ផ្លែឈើ) ដោយក្នុង១ថ្ងៃមានចំនួនសរុបជាង១០០គីឡូក្រាម ក្នុងនោះ៥០% បានបែងចែកទៅផ្សារទំនើបអីុអន និងផ្សារមីនីម៉ាត ។ បរិមាណបន្លែនាំចូលសព្វថ្ងៃនេះមានចំនួនច្រើនជាងមុន ពីព្រោះកសិករនៅតាមតំបន់មានប្រភពទឹកសម្រាប់ពង្រីកការដាំដុះ ខណៈការដាំដុះបន្លែរបស់កសិករផ្សេងទៀតរងនូវផលប៉ះពាល់ដោយសារអាកាសធាតុប្រែប្រួល » ។
លោកបញ្ជាក់ថា ៖ « គ្រប់កសិផលដែលលក់នៅភូមិផ្សារកសិកម្មមានតម្លៃខុសគ្នា គឺបន្លែស្លឹកនិងដើម មានតម្លៃចាប់ពី៤.៥០០រៀលទៅ៩.០០០រៀល ចំណែកផ្លែឈើមានតម្លៃចាប់ពី៣.០០០រៀលទៅ១៥.០០០រៀល និងប្រភេទសាច់ មានតម្លៃពី២៥.០០០រៀលទៅ៣៤.០០០រៀលក្នុង១គីឡូក្រាម តាមប្រភេទសាច់នីមួយៗ » ៕
ចែករំលែកព័តមាននេះ