សឹងតែរាល់ថ្ងៃ យើងបានដឹងអំពីប្រជាជនកម្ពុជា ធ្វើដំណើរទៅព្យាបាលជំងឺនៅប្រទេសវៀតណាម ថៃ សាំងហ្គាពួរ ឬម៉ាឡេស៊ី ។ ពួកគេធ្វើដំណើរទៅព្យាបាលនៅក្រៅប្រទេស ពីព្រោះពួកគេបានបាត់បង់ជំនឿ
សឹងតែរាល់ថ្ងៃ យើងបានដឹងអំពីប្រជាជនកម្ពុជា ធ្វើដំណើរទៅព្យាបាលជំងឺនៅប្រទេសវៀតណាម ថៃ សាំងហ្គាពួរ ឬម៉ាឡេស៊ី ។ ពួកគេធ្វើដំណើរទៅព្យាបាលនៅក្រៅប្រទេស ពីព្រោះពួកគេបានបាត់បង់ជំនឿទៅលើគុណភាពសេវាកម្មសុខភាពនៅក្នុងប្រទេស។
បើសិនជាចរន្តបែបនេះ ចេះតែរីកធំទៅមុខទៀត វានឹងធ្វើឱ្យវិស័យសុខាភិបាលកម្ពុជាទាំងមូលត្រូវដួលរលំ ហើយមិនអាចពឹងពាក់បាន ដើម្បីសង្គ្រោះជីវិតមនុស្សដែលមានជំងឺធ្ងន់ៗ។
ខណៈដែលមានករណីជំងឺខ្លះ គ្រូពេទ្យកម្ពុជាមិនអាចមានលទ្ធភាពព្យាបាលបានដោយបញ្ហា ចំណេះដឹង និងបច្ចេកវិទ្យានោះ វានឹងមិនយុត្តិធម៌ទេ ដែលត្រូវដកការទុកចិត្តទាំងស្រុងពីគ្រូពេទ្យកម្ពុជា។ វាគ្រាន់តែជាបញ្ហាចិត្តសាស្ត្រដ៏គួរឱ្យភ័យខ្លាចប៉ុណ្ណោះ ខណៈដែលមនុស្សបានលឺពីមាត់មួយទៅមាត់មួយអំពីកំហុសឆ្គងរបស់គ្រូពេទ្យនៅក្នុងការព្យបាលជំងឺ។
មានមនុស្សជាច្រើណាស់ដែលបានសង្គ្រោះជីវិតដោយគ្រូពេទ្យកម្ពុជា។ ហេតុដូច្នេះហើយបានជាគេនៅតែឃើញមនុស្សម្នាជាច្រើននៅតាមមន្ទីរពេទ្យរដ្ឋទទួលការពិនិត្យ និងព្យាបាលជំងឺ។ មនុស្សម្នាត្រូវតែផ្តល់តម្លៃដល់ការងារគ្រូពេទ្យនៅក្នុងការសង្គ្រោះជីវិតមនុស្ស។
ខណៈដែលប្រជាជនមិនត្រូវមើលងងឹតហួសហេតុពីគុណភាពសេវាសុខភាពនៅក្នុងប្រទេសកម្ពុជានោះ ក្រសួងសុខាភិបាល គណៈគ្រូពេទ្យកម្ពុជា និងគ្រូពេទ្យផ្ទាល់ ត្រូវរួមគ្នាដោះស្រាយបញ្ហាភ័យខ្លាចរបស់ប្រជាជន ដោយផ្តល់សេវាសុខភាពដែលកាន់តែប្រសើរជាងនេះ។ គេត្រូវតែរកវិធីដ៏មានប្រសិទ្ធភាព ដើម្បីពង្រឹងគុណភាពសេវាសុខភាព ដោយរួមមានបញ្ជូនគ្រូពេទ្យកម្ពុជាទៅសិក្សានៅក្រៅប្រទេសឱ្យបានកាន់តែច្រើន មានជំនាញការពេទ្យបរទេស ដើម្បីជួយពង្រឹងមន្ទីរពេទ្យរដ្ឋ ពង្រឹងការគោរពក្រមសីលធម៌គ្រូពេទ្យ និងបំពាក់បច្ចេកវិទ្យាទំនើបៗនៅតាមមន្ទីរពេទ្យរដ្ឋ។
ជាមួយគ្នានោះ ការដោះស្រាយបញ្ហាចិត្តសាស្ត្រប្រជាជន ក៏ត្រូវតែធ្វើដែរ តាមរយៈការទំនាក់ទំនងសាធារណៈកាន់តែមានប្រសិទ្ធភាពជាងនេះ ដើម្បីរំងាប់ការភ័យខ្លាចដែលខុសទំនង និងដើម្បីបង្ហាញអំពីសមត្ថភាពពិតប្រាកដរបស់មន្ទីរពេទ្យរដ្ឋ និងគ្រូពេទ្យកម្ពុជា នៅក្នុងការពិនិត្យនិងព្យាបាលជំងឺ។ មន្ទីរពេទ្យរដ្ឋ និងគ្រូពេទ្យកម្ពុជា មិនត្រូវសម្ងំស្ងៀមរង់ចាំតែទទួលការរិះគន់របស់មហាជនឡើយ។ ការឃោសនាអំពីសមត្ថភាពពិត និងសេវាកម្មសុខភាពដែលខ្លួនអាចផ្តល់ឱ្យប្រជាជនប្រកបដោយប្រសិទ្ធភាព និងធ្វើឱ្យប្រជាជនយល់កាន់តែច្បាស់អំពីការងាររបស់មន្ទីរពេទ្យរដ្ឋ និងគ្រូពេទ្យកម្ពុជា នៅក្នុងការសង្គ្រោះជីវិតមនុស្ស។ ការយល់ដឹងច្បាស់នឹងបង្កើនការគោរព និងទំនុកចិត្ត។
ជាមួយគ្នានោះ ការអប់រំប្រជាជនឱ្យមានចំណេះអំពីបញ្ហាសុខភាព ក៏នឹងអាចជួយដល់ពួកគេនៅក្នុងការបង្ការជំងឺជាច្រើន ដូចជាជំងឺបេះដូង ជំងឺលើសឈាម ជំងឺមហារីក និងជំងឺគ្រោះថ្នាក់ជាច្រើនទៀត។
ការងារជាច្រើនកំពុងតែរង់ចាំក្រសួងសុខាភិបាល និងគ្រូពេទ្យកម្ពុជា ដើម្បីកសាងទំនុកចិត្តក្នុងចំណោមសាធារណជន។ បើពុំនោះ គេនឹងធ្វើឱ្យវិស័យសុខាភិបាលទាំងមូលស្លាប់៕
ចែករំលែកព័តមាននេះ