អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុបានរៀបចំកិច្ចប្រជុំអគ្គនាយកគយអាស៊ានលើកទី២៥ ដែលប្រព្រឹត្តិទៅចាប់ពីថ្ងៃទី២៥ ដល់ថ្ងៃទី២៧ ឧសភា ២០១៦ នៅសណ្ឋាគារ Sofitel Phnom Penh Phokeethra
អគ្គនាយកដ្ឋានគយ និងរដ្ឋាករកម្ពុជា នៃក្រសួងសេដ្ឋកិច្ច និងហិរញ្ញវត្ថុបានរៀបចំកិច្ចប្រជុំអគ្គនាយកគយអាស៊ានលើកទី២៥ ដែលប្រព្រឹត្តិទៅចាប់ពីថ្ងៃទី២៥ ដល់ថ្ងៃទី២៧ ឧសភា ២០១៦ នៅសណ្ឋាគារ Sofitel Phnom Penh Phokeethra រាជធានីភ្នំពេញ ។ កិច្ចប្រជុំអគ្គនាយកគយអាស៊ានលើកទី២៥ បានប្រារព្ធបើកក្រោមអធិបតីភាពដ៏ខ្ពង់ខ្ពស់របស់លោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដោយមានការអញ្ជើញចូលរួមពីអគ្គនាយកគយអាស៊ានទាំងដប់ប្រទេស, ក្រុមប្រឹក្សាពាណិជ្ជកម្មអាស៊ាន-អាមេរិក, ក្រុមប្រឹក្សាពាណិជ្ជកម្មអាស៊ាន-អឺរ៉ុប, បញ្ញើររហ័សអាស៊ី-ប៉ាស៊ីហ្វិក និងសភាពាណិជ្ជកម្មកម្ពុជា ។ គោលបំណងចម្បងនៃកិច្ចប្រជុំ គឺដើម្បីពិនិត្យ និងពិភាក្សាលើវឌ្ឍនភាពនៃការអនុវត្តផែនការយុទ្ធសាស្ត្រអភិវឌ្ឍគយ និងការងារសមាហរណកម្មគយអាស៊ានរបស់ក្រុមការងារកិច្ចសម្រួលពាណិជ្ជកម្ម និងនីតិវិធីគយ, ក្រុមការងារអនុវត្តច្បាប់គយ និងអនុលោមភាព និងក្រុមការងារកសាងសមត្ថភាពចំណេះដឹងគយ ។
បន្ទាប់ពីការថ្លែងសុន្ទរកថាស្វាគមន៍របស់លោកបណ្ឌិត គុណ ញឹម អគ្គនាយក នៃអគ្គនាយកដ្ឋានគយ និងរដ្ឋាករកម្ពុជា និងជាប្រធានកិច្ចប្រជុំអគ្គនាយកគយអាស៊ានលើកទី២៥ លោកបណ្ឌិត អូន ព័ន្ធមុនីរ័ត្ន ទេសរដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានថ្លែងសុន្ទរកថាបើកកិច្ចប្រជុំ ដោយលើកឡើងពីជោគជ័យរបស់ប្រទេសអាស៊ាន ក្នុងការជំរុញកំណើនទំហំពាណិជ្ជកម្ម និងការលើកកម្ពស់ឧត្តមភាពប្រកួតប្រជែងសេដ្ឋកិច្ចក្នុងតំបន់ និងពិភពលោក ។ ទន្ទឹមនេះ លោកបណ្ឌិតក៏បានគូសបញ្ជាក់ថា ចាប់ពី ការបង្កើតសមាគមអាស៊ាននៅឆ្នាំ១៩៦៧ រហូតដល់ការបង្កើតជាសហគមន៍សេដ្ឋកិច្ចអាស៊ាននាឆ្នាំ២០១៥ ប្រទេសអាស៊ានបានប្រែក្លាយខ្លួនជាតំបន់សេដ្ឋកិច្ចដែលមានឧត្តមភាពប្រកួតប្រជែងខ្ពស់ជាមួយនឹងកំណើនផលិតផលក្នុង (GDP) ពី១.៣០០ប៊ីលានដុល្លារអាមេរិកក្នុងឆ្នាំ២០០៧ ទៅដល់២.៦០០ប៊ីលានដុល្លារអាមេរិកក្នុងឆ្នាំ២០១៤ ដែលក្លាយជាតំបន់សេដ្ឋកិច្ចធំបំផុតទី៧ ក្នុងសកលលោក ។ ជាមួយគ្នានេះ លោកបណ្ឌិត អូន ព័ន្ធមុនីរ័ត្ន បានបន្តថា កម្ពុជាបានចូលរួមយ៉ាងសកម្មក្នុងភាពជោគជ័យរបស់អាស៊ាននេះ ។ ជាក់ស្តែងបើយោងតាមការព្យាករណ៍នាពេលថ្មីៗនេះ របស់ធនាគារអភិវឌ្ឍន៍អាស៊ីប្រចាំឆ្នាំ២០១៦ ជាមួយនឹងកំណើនសេដ្ឋកិច្ចខ្ពស់រយៈពេល៥ឆ្នាំជាបន្តបន្ទាប់ ប្រទេសកម្ពុជានឹងក្លាយជាខ្លាសេដ្ឋកិច្ចថ្មីរបស់អាស៊ី ។
លើសពីនេះ លោកបណ្ឌិត អូន ព័ន្ធមុនីរ័ត្ន ក៏បានលើកឡើងពីសមិទ្ធផលដែលរដ្ឋបាលគយអាស៊ានបានរួមចំណែកក្នុងការបង្កើតសហគមន៍សេដ្ឋកិច្ចអាស៊ានតាមរយៈការលើកកម្ពស់កិច្ចសម្រួលពាណិជ្ជកម្ម និងបានលើកទឹកចិត្តឱ្យអគ្គនាយកគយអាស៊ានទាំងអស់បន្តខិតខំអនុវត្តផែនការអភិវឌ្ឍគយ និងការងារសមាហរណកម្មគយអាស៊ាន ដើម្បីឈានសម្រេចគោលដៅរបស់ប្រមុខរដ្ឋាភិបាលអាស៊ានដែលបានកំណត់ក្នុង «ទស្សនសហគមន៍អាស៊ាន២០២៥» ។ សូមបញ្ជាក់ថា កម្ពុជាធ្លាប់ធ្វើជាម្ចាស់ផ្ទះ និងជាប្រធានកិច្ចប្រជុំអគ្គនាយកគយអាស៊ានលើកទី១៥ នៅក្រុងសៀមរាប ឆ្នាំ២០០៦ ។
ចែករំលែកព័តមាននេះ