រាជធានីភ្នំពេញ ៖ ភ្ញៀវទេសចរជាតិ និងអន្តរជាតិ ដែលបានចូលមកសម្រាកកម្សាន្តនៅរាជធានីភ្នំពេញ ក្នុងត្រីមាសទី១ ឆ្នាំ២០១៦នេះ មានកំណើនប្រមាណ១១,៤១% បើធៀបនឹងរយៈពេលដូចគ្នានៅឆ្នាំ២០១៥ ។ នេះបើយោងតាមរបាយការណ៍របស់មន្ទីរទេសចរណ៍រាជធានីភ្នំពេញ ។
ប្រធានមន្ទីរទេសចរណ៍រាជធានីភ្នំពេញ លោក តាំង សុចិត្តគ្រឹស្នា បានបញ្ជាក់ថា ៖ « ក្នុងចំណោមភ្ញៀវទេសចរអន្តរជាតិ ដែលបានចូលមករាជធានីភ្នំពេញ គឺមានភ្ញៀវទេសចរអន្តរជាតិចូលតាមច្រកព្រលានយន្តហោះអន្តរជាតិភ្នំពេញ ក្នុងរយៈពេល៣ខែដើមឆ្នាំ២០១៦នេះ តាមការប៉ាន់ស្មានមានចំនួន៣៧២.៤៦០នាក់ និងមាន១៧០សញ្ជាតិ» ។
លោកបន្តថា ៖ « ភ្ញៀវអន្តរជាតិទាំងនោះ មានគោលបំណងសំខាន់ៗខុសៗគ្នា ដូចជា ភ្ញៀវមកសម្រាកលំហែកម្សាន្តមានចំនួន២៩១.៥៩៤នាក់, ទេសចរណ៍ធុរកិច្ចចំនួន៥៣.៦៣២នាក់, គណៈប្រតិភូ និងអង្គការអន្តរជាតិចំនួន៩.៧២៣នាក់ និងអាណិកជនខ្មែរចំនួន១៧.៥១១នាក់ » ។
លោក តាំង សុចិត្តគ្រឹស្នា បានឲ្យដឹងដែរថា ៖« ក្នុងចំណោមភ្ញៀវទេសចរអន្តរជាតិ ដែលចូលមករាជធានីភ្នំពេញ ក៏បានបែងចែកភ្ញៀវដែលចូលមកទស្សនារមណីយដ្ឋានវត្តភ្នំ មានចំនួន៤៩.៥៧៧នាក់ ច្រើនជាងត្រីមាសទី១ឆ្នាំ២០១៥ ប្រមាណ១៤,៦៣% ។ ភ្ញៀវអន្តរជាតិចូលទស្សនាមជ្ឈមណ្ឌលឧក្រិដ្ឋកម្មជើងឯកចំនួន៥៦.៩៦៨នាក់ ។ ចំណែកភ្ញៀវទេសចរជាតិចូលទស្សនារមណីយដ្ឋាននានាក្នុងរាជធានីភ្នំពេញ មានចំនួន៥៧.១៨១នាក់ កើនឡើង៥,៨០% បើប្រៀបធៀបនឹងរយៈពេលដូចគ្នាកាលពីឆ្នាំ២០១៥ » ។
លោកប្រធានមន្ទីររូបនោះក៏បានអះអាងដែរថា ៖ « ក្នុងរយៈពេល៣ខែដើមឆ្នាំ២០១៦នេះ មន្ទីរទេសចរណ៍រាជធានីភ្នំពេញ ក៏បានធ្វើកិច្ចការជាច្រើនដើម្បីបម្រើឲ្យវិស័យទេសចរណ៍ រួមមាន ចុះពិនិត្យមូលដ្ឋានអាជីវកម្ម មុននឹងចេញអាជ្ញាប័ណ្ណ និងចុះត្រួតពិនិត្យអាជ្ញាប័ណ្ណជិតផុតសុពលភាព រួមទាំងផ្តល់អាជ្ញាប័ណ្ណដល់អាជីវកម្មទេសចរណ៍ផងដែរ។ ក្រៅពីការងារខាងលើ មន្ទីរទេសចរណ៍ក៏បានបញ្ជូនមន្ត្រីរបស់ខ្លួនចុះត្រួតពិនិត្យមគ្គទេសក៍ទេសចរណ៍នៅតាមបណ្តារមណីយដ្ឋាននានា និងណែនាំពួកគេឲ្យសុំអាជ្ញាប័ណ្ណត្រឹមត្រូវមុននឹងប្រកបអាជីវកម្ម ។ ទន្ទឹមនឹងនោះ ក៏បានសហការជាមួយអាជ្ញាធរពាក់ព័ន្ធ ដើម្បីបើកវគ្គបណ្តុះបណ្តាល ផ្សព្វផ្សាយច្បាប់ស្តីពីទេសចរណ៍ និងចលនាប្រឡងប្រណាំងទីក្រុងស្អាត រមណីយដ្ឋានស្អាត សេវាល្អ ផងដែរ » ។
យ៉ាងណាក៏ដោយ លោកប្រធានមន្ទីរបានអះអាងថា ៖ « វិស័យទេសចរណ៍នៅរាជធានីភ្នំពេញ ក៏នៅមានបញ្ហាប្រឈមមួយចំនួនផងដែរដូចជា មូលដ្ឋានអាជីវកម្មទេសចរណ៍មួយចំនួនមិនគោរពច្បាប់ ធ្វើអាជីវកម្មដោយពុំមានអាជ្ញាប័ណ្ណ រួមទាំងសកម្មភាពល្មើសច្បាប់ផ្សេងៗទៀតរួមមាន ការជួញដូរផ្លូវភេទ ការបំពុលបរិស្ថាន សណ្តាប់ធ្នាប់ និងការគ្រប់គ្រងសុវត្ថិភាពប្រព័ន្ធអគ្គិភ័យនៅតាមមណ្ឌលកម្សាន្ដទេសចរណ៍ជាដើម » ។
យោងតាមរបាយការណ៍របស់ក្រសួងទេសចរណ៍បង្ហាញថា ភ្ញៀវទេសចរអន្តរជាតិដែលចូលតាមច្រកសំខាន់រួមមាន ច្រកភ្នំពេញមានចំនួន៣០៣.២៨១នាក់ ស្មើនឹង២២,៦ភាគ រយនៃចំនួនសរុប កើនឡើង១១,៣ភាគរយ។ តាមច្រកសៀមរាប មានចំនួន៤៧៩.៣៩៥នាក់ ស្មើនឹង៣៥,៧ភាគរយនៃចំនួនសរុប កើន ឡើង៤ភាគរយ ។ តាមច្រកកងកេងមានចំនួន២.៣៦១នាក់ ស្មើនឹង០,២ភាគរយនៃចំនួនសរុប ។
របាយការណ៍ដដែលបញ្ជាក់ថា ទីផ្សារទេសចរណ៍សំខាន់ៗទាំង១០ ដែលមកទស្សនានៅកម្ពុជា ក្នុងរយៈពេល៣ខែដើមឆ្នាំនេះរួមមាន វៀតណាម មានចំនួន២១៧.៨៦៤នាក់, ចិន ចំនួន២១៧.២១៣នាក់, កូរ៉េ ចំនួន១៣១.៥៤៨នាក់, ថៃ ចំនួន៨៥.៦៥៩នាក់, អាមេរិក ចំនួន៧៥.៧០៦នាក់, ឡាវ ចំនួន៥៨.៧៩០នាក់, ជប៉ុន ចំនួន៥៥.៧៥៩នាក់, អង់គ្លេស ចំនួន៥១,៥៨៥នាក់, បារាំង ចំនួន៤៨.៦៧៨នាក់ និងប្រទេសអាល្លឺម៉ង់ ចំនួន៤៦.៨៤០នាក់ ៕
ចែករំលែកព័តមាននេះ