រាជធានីភ្នំពេញ ៖ យោងតាមការលើកឡើងរបស់សមាគមរោងចក្រកាត់ដេរនៅកម្ពុជា ហៅកាត់ថា GMAC បានឱ្យដឹងថា ការធ្លាក់ចុះនៃផលិតភាពក្នុងវិស័យកាត់ដេររបស់កម្ពុជា គួបផ្សំនឹងការចំណាយដែលចេះតែបន្តកើនឡើង
រាជធានីភ្នំពេញ ៖ យោងតាមការលើកឡើងរបស់សមាគមរោងចក្រកាត់ដេរនៅកម្ពុជា ហៅកាត់ថា GMAC បានឱ្យដឹងថា ការធ្លាក់ចុះនៃផលិតភាពក្នុងវិស័យកាត់ដេររបស់កម្ពុជា គួបផ្សំនឹងការចំណាយដែលចេះតែបន្តកើនឡើង អាចធ្វើឱ្យកម្ពុជាចាញ់ប្រៀបក្នុងការប្រកួតប្រជែងជាមួយនឹងបណ្ដាប្រទេសផលិតសម្លៀកបំពាក់ផ្សេងទៀតដូចជា វៀតណាម បង់ក្លាដែស និងមីយ៉ាន់ម៉ា ជាដើម ។
ផ្អែកតាមការចុះផ្សាយកាលពីខែមីនា របស់ អង្គការអន្តរជាតិខាងការងារ (ILO) បានឱ្យដឹងថា នៅចន្លោះពីឆ្នាំ២០១១ រហូតដល់ដំណាច់ឆ្នាំ២០១៤ ផលិតភាពការងារក្នុងវិស័យកាត់ដេរសម្លៀកបំពាក់ និងស្បែកជើងបានធ្លាក់ចុះប្រមាណ១៤ភាគរយ ។ ផលិតភាពការងារហាក់ធ្លាក់ចុះ ដោយសារតែចំនួនការងារកើនលើសពីកំណើនផលិតភាព។
តាមរបាយការណ៍ GMAC គឺការធ្លាក់ចុះនូវផលិតភាពនេះ អាចបន្តរហូតដល់ឆ្នាំ២០១៦ តទៅទៀត ហើយក៏បានស្នើសុំដល់កម្មករ សហជីព ក៏ដូចជារាជរដ្ឋាភិបាលផ្ដោតលើការបង្កើនផលិតភាពរបស់វិស័យនេះ ព្រោះការប្រកួតប្រជែងនៅលើទីផ្សារអន្តរជាតិចេះតែកើនឡើង ។
អគ្គលេខាធិការរបស់សមាគមរោងចក្រកាត់ដេរ លោក ខេន លូ បានមានប្រសាសន៍ថា ៖« ទាំងអស់គ្នាត្រូវតែជួយចូលរួមចំណែកធ្វើយ៉ាងណា ថែរក្សាឧស្សាហកម្មរបស់យើងឱ្យមានសមត្ថភាព និងអាចឈរជើងក្នុងបរិយាកាសប្រកួតប្រជែងខ្លាំងនាពេលបច្ចុប្បន្ននៅលើទីផ្សារពិភពលោក ។ ក្នុងនាមជានិយោជក យើងបានប្រឹងប្រែងរួមចំណែក ដោយបានវិនិយោគលើការកសាងសមត្ថភាពជំនាញដល់កម្មករ-កម្មការិនី » ។
ទន្ទឹមគ្នានេះដែរ GMAC ថែមទាំងបានពិភាក្សាជាមួយក្រសួងការងារ និងបណ្ដុះបណ្ដាលវិជ្ជាជីវៈ អំពីការធ្វើយុទ្ធនាការជំរុញផលិតភាពការងារ ដែលគ្រោងនឹងធ្វើឡើងនាពេលឆាប់ៗខាងមុខនេះ ។ ផ្នែកសំខាន់ៗនៃយុទ្ធនាការនោះរួមមាន ៖ ១-កម្មវិធីដែលផ្ដោតលើការលើកកម្ពស់ការយល់ដឹងអំពីផលិតភាពការងារនៅថ្នាក់ជាតិ នៅកម្រិតឧស្សាហកម្ម និងនៅតាមបណ្ដារោងចក្រ និង២-ការផ្ដល់ប្រឹក្សាយោបល់ជាក់ស្ដែងក្នុងការប្រែចំណេះដឹងឱ្យទៅជាសកម្មភាពជាក់លាក់ ដើម្បីលើកកម្ពស់ផលិតភាពការងារ ។ យុទ្ធនាការនេះតម្រូវឲ្យមានការប្តេជ្ញាចិត្តខ្ពស់ពី GMAC រាជរដ្ឋាភិបាល ថ្នាក់គ្រប់គ្រងរោងចក្រ អ្នកបញ្ជាទិញ សហជីព ILO ក៏ដូចជាភាគីពាក់ព័ន្ធផ្សេងទៀត ។
លោក ខេន លូ បានបន្តថា ៖ « កូដកម្មខុសនីតិវិធី ទំនាក់ទំនងវិជ្ជាជីវៈការងារមិនសូវល្អ និងបញ្ហាផ្សេងទៀតបាននិងកំពុងតែបង្អាក់ដល់កិច្ចខិតខំប្រឹងប្រែងរបស់ GMAC ក្នុងការលើកកម្ពស់ផលិតភាពការងារក្នុងវិស័យនេះ ។ យើងសំណូមពរឲ្យគ្រប់ភាគីមានការពិចារណាឲ្យបានច្រើន និងផ្ដល់អាទិភាពលើការងារនានាដែលអាចលើកកម្ពស់ឧស្សាហកម្មរបស់យើងឲ្យកាន់តែប្រសើរថែមទៀត » ។
លោកបន្ថែមថា ៖ « ស្របគ្នានេះដែរ ឧស្សាហកម្មកាត់ដេរក៏ត្រូវប្រឈមនឹងការចំណាយដែលចេះតែបន្តកើនឡើងផងដែរ ដូចជា ការចំណាយលើអគ្គិសនី និងការដឹកជញ្ជូនជាដើម ដែលជាកត្តាជំរុញឲ្យរោងចក្រនានាងាកទៅធ្វើអាជីវកម្មនៅប្រទេសផ្សេងទៀត ។ GMAC ស្វាគមន៍ចំពោះគំនិតផ្ដួចផ្ដើមរបស់រាជរដ្ឋាភិបាលដែលបានសម្រួលដល់ដំណើរការនាំចេញនូវផលិតផលសម្លៀកបំពាក់ » ។
លោកបន្ថែមទៀតថា ៖ « ទោះជាយ៉ាងណា យើងត្រូវការឲ្យមានការកាត់បន្ថយថែមទៀតចំពោះតម្លៃឯកសារ ជាពិសេស គឺតម្លៃក្រៅផ្លូវការ ។ បច្ចុប្បន្ន GMAC កំពុងតែចូលរួមចំណែកអភិវឌ្ឍន៍វិស័យកាត់ដេរនេះ ដោយបាននិងកំពុងកសាងវិទ្យាស្ថានបណ្តុះបណ្តាលវិស័យកាត់ដេរនៅកម្ពុជា (CGTI) នៅក្នុងតំបន់សេដ្ឋកិច្ចពិសេសភ្នំពេញ ។ ការសាងសង់វិទ្យាស្ថាននេះ គឺបានសម្រេចប្រហែលជា៧០ភាគរយ ហើយវិទ្យាស្ថាននេះនឹងផ្ដល់នូវការបណ្ដុះបណ្ដាលដល់កម្មករ-និយោជិតក្នុងស្រុក ដើម្បីបំពេញមុខតំណែងគ្រប់គ្រងថ្នាក់កណ្ដាលនៅតាមបណ្ដារោងចក្រកាត់ដេរនានាទូទាំងប្រទេស ។ យើងសង្ឃឹមថា វិទ្យាស្ថានថ្មីនេះនឹងទប់ស្កាត់ការធ្លាក់ចុះនៃផលិតភាពការងារតាមរយៈការផ្ដល់នូវការអប់រំដល់កម្មករ-និយោជិត ដែលនាំឲ្យពួកគាត់មានការងារកាន់តែប្រសើរ » ។
គួរបញ្ជាក់ថា វិស័យឧស្សាហកម្មកាត់ដេរគឺជាវិស័យសំខាន់ដែលជួយជំរុញសេដ្ឋកិច្ចរបស់កម្ពុជា ហើយបច្ចុប្បន្នកំពុងតែផ្ដល់នូវការងារដល់ប្រជាពលរដ្ឋប្រមាណ៧០ម៉ឺននាក់ ដែលភាគច្រើនជាស្ត្រី ព្រមទាំងបានជួយសម្រួលដល់ជីវភាពដល់ប្រជាពលរដ្ឋកម្ពុជាប្រមាណ២លាននាក់ផងដែរ ។ ក្នុងមួយខែៗ វិស័យកាត់ដេរនេះបានទាញយកទឹកប្រាក់ប្រមាណ១០០លានដុល្លារអាមេរិកសម្រាប់ផ្គត់ផ្គង់ជីវភាពរបស់កម្មករ-កម្មការិនី និងបងប្អូនសាច់ញាតិ ៕
ចែករំលែកព័តមាននេះ