រាជធានីភ្នំពេញ ៖ រយៈពេលជាច្រើនឆ្នាំមកហើយដែលតារាសម្តែងសុភ័ក្ត្ររិទ្ធ បណ្តែតជីវិតក្នុងវិស័យសិល្បៈសម្តែងក្រោយជាប់តំណែងហ្វ្រេស៊ីប៊យមក ។ ដំណើរជីវិតក្នុងពិភពសិល្បៈរបស់លោកសុភ័ក្ត្ររិទ្ធឆ្ពោះទៅមុខជាលំដាប់ ។
បច្ចុប្បន្នលោកសុភ័ក្ត្ររិទ្ធ ទទួលបានការងារសម្តែងច្រើនរឿង ។ ប្រហែលជាលោកសុភ័ក្ត្ររិទ្ធ មានចំណុចសំខាន់ក្នុងការសម្តែង ទើបផលិតករភាពយន្ត និងអ្នកដឹកនាំរឿងជ្រើសរើសឱ្យចូលរួមសម្តែងច្រើន គ្រាន់តែពុំទាន់មានឱកាសបានតំណែងតួឯកប៉ុណ្ណោះ ។ ខ្សែភាពយន្តជាច្រើនដែលលោកសុភ័ក្ត្ររិទ្ធ បញ្ចេញទេពកោសល្យ ដូចជារឿង «សង្សារខ្ញុំអាប» រឿង «វិញ្ញាណលោកម្ចាស់គ្រញូង» រឿង «ក្រមុំ៣១កំលោះ៥២» រឿង «ចាំតែខ្លាចតើ! » រឿង «តាមស៊ើបជួបស្នេហ៍» រឿង «វាលស្រែស្នេហ៍ខ្ញុំ» និងរឿង «ស្នេហ៍ចាំជាតិ» ជាដើម ។ ថ្មីៗនេះលោកសុភ័ក្ត្ររិទ្ធ ទទួលបានឱកាសថតភាពយន្តចំនួន២រឿង គឺរឿង«កំណត់ហេតុនាងនាថ» និងរឿង«បណ្តឹងស្រីទាំង៥» ។
លោកសុភ័ក្ត្ររិទ្ធ កាលពីពេល ថ្មីៗកន្លងមកប្រាប់អ្នកយកព័ត៌មានកោះសន្តិភាពថា បន្ទាប់ពីលោកជាប់ចំណាត់លេខ៥ក្នុងការប្រកួតហ្វ្រេស៊ីឆ្នាំ២០១១មក លោកពុះពារជាមួយអាជីពសិល្បៈរហូតមក ព្រោះតែចិត្តស្រឡាញ់ ។ លោកសុភ័ក្ត្ររិទ្ធ តែងតែបណ្តុះគំនិតថាខំស៊ូជាមួយការងារ និងខំដុសខាត់សមត្ថភាពឲ្យកាន់តែប្រសើរឡើង ។ «ខ្ញុំប្រកាន់ទស្សនៈថា ខំសម្តែងតាំងពីចំណុចទី១ តិចៗសិន ហើយថ្ងៃណាមួយគេពិតជាមើលឃើញពីអ្វីដែលបានកែច្នៃ ។ នៅទីបំផុតខ្ញុំទទួលបានការងារពីមួយឆ្នាំទៅ មួយឆ្នាំជាមួយកិច្ចការសិល្បៈដែលអាចនឹងថាការបំពេញភារកិច្ចយើងហុចសញ្ញាល្អ គួរជាទីពេញចិត្ត ។ ខ្ញុំមិននឹកស្មានថាមានខ្សែភាពយន្តជាច្រើនបានធ្លាក់ដល់ដៃ មានវត្តមានសម្តែងទេប៉ុន្តែបែរជារត់មកយ៉ាងច្រើនស្ទើរតែមិនជឿ នេះប្រហែលជាគេមើលឃើញពីស្នាដៃ ការគោរពពេលវេលា បូកផ្សំជាមួយគុណធម៌ផងទើបរុញយើងទៅមុខបាន។ សិល្បៈងាយស្រួលប្រសិនបើយើងចេះរៀបចំខ្លួនឲ្យបានល្អផ្សំជាមួយទេពកោសល្យ នោះអាចវែកផ្លូវយើងដើរទៅមុខបានដើម្បីជាការធ្វើឲ្យទស្សនិកជនវាយតម្លៃពេលចេញផ្សាយស្នាដៃនោះ ។ ទោះជាយ៉ាងណាក្តីខ្ញុំនៅមិនទាន់ឈានឡើងតួឯកណាមួយទេ ប៉ុន្តែរឿងដែលខ្ញុំបានសម្តែងកន្លងមកគឺហាក់បង្ហាញភាពលេចធ្លោ គឺសឹងថាប្រហែលជាតួឯក ។ ដូចនេះហើយទើបខ្ញុំមិនអន់ចិត្ត ព្រោះតួឯក ឬមិនតួឯកមិនសំខាន់ទេ សំខាន់ការសម្តែងដល់ ឬអត់ បើយើងខ្លាំង គឺសម្តែងកើត អ្នកមើលក៏គេចេះវាយតម្លៃយើងផងដែរ ។ ដូចនេះហើយទើបកន្លងមកខ្ញុំសប្បាយចិត្តគ្រាដែលរឿង នីមួយៗខ្ញុំសម្តែងក៏មានឈុតឆាកច្រើនដែលជាឱកាសឲ្យខ្ញុំបានបញ្ចេញស្នាដៃទាញយកប្រជាប្រិយភាព» ។
លោកសុភ័ក្ត្ររិទ្ធ នៅតែមានជំនឿថាថ្ងៃណាមួយលោកនឹងបានតំណែងតួឯកដែលបង្ហាញពីភាពលូតលាស់នៃអាជីពមិនខាន ។
អតីតនិស្សិតច្បាប់លោកសុភ័ក្ត្ររិទ្ធ អាយុ២៥ឆ្នាំ ជាកូនអ្នកភ្នំពេញ មានបងប្អូន៣នាក់ស្រី២នាក់ ឯរូបលោកជាកូនពៅ ។ ឪពុកលោកសុភ័ក្ត្ររិទ្ធ ជាអតីតមន្ត្រីបម្រើការងារនៅក្រសួងទេសចរណ៍និងម្តាយជាអ្នករកស៊ី ។
លោកសុភ័ក្ត្ររិទ្ធ នៅមិនទាន់គិតគូររឿងគូស្រករនៅឡើយទេ ដោយខិតខំសន្សំប្រាក់ទុកឲ្យបានច្រើនសិន ៕
ចែករំលែកព័តមាននេះ