រាជធានីភ្នំពេញ ៖ មហាជនមួយចំនួន ជាពិសេសចង្កោមអ្នកសិល្បៈសុទ្ធតែបានដឹងថា តារាសម្តែង និងកំប្លែងនាង ពីយ៉ា ពីន គឺមានកូនស្រីម្នាក់រួចមកហើយ ខណៈពេលដែលនាងតែងតែព្យាយាមលាក់បាំងអត្តសញ្ញាណឪពុកកូនរបស់នាង។ យ៉ាងណា តារារូបនេះបានចេញមុខទម្លាយរឿងរ៉ាវនៅពីក្រោយមូលហេតុដែលនាងមានកូនស្រីម្នាក់ ដោយមិនមានស្វាមី។
តារាសម្តែង និងកំប្លែងនាង ពីយ៉ា ពីន បានអះអាងកោះសន្តិភាពឱ្យដឹងថា «បច្ចុប្បន្នមានមជ្ឈដ្ឋានមួយចំនួនតែងតែដឹងពីរឿងរ៉ាវរបស់នាងពីការមានកូនស្រីម្នាក់ មុនពេលប្រឡូកក្នុងវិស័យសិល្បៈ»។
នាងបញ្ជាក់ថា «កន្លងមក នាងមិនដែលចេញមុខបញ្ជាក់អោយបានច្បាស់លាស់ឡើយ ពាក់ព័ន្ធនឹងបញ្ហានេះ»។ នាងថា »តាមពិតទៅ នាងអាណិតស្រឡាញ់ក្មេងស្រីដែលកំពុងរស់នៅជាមួយគ្នានេះដូចជាកូនបង្កើតនាងមែន ប៉ុន្តែតាមពិតជាក់ស្តែងក្មេងស្រីរូបនោះមិនមែនជាកូនបង្កើតនាងឡើយ»។ នាងបន្ថែមថា «ក្មេងស្រីម្នាក់នោះ គឺគ្រាន់តែជាក្មួយបង្កើតរបស់នាងតែប៉ុណ្ណោះ តែដោយសារគ្រួសារគាត់មានបញ្ហា ទើបនាងបានយកមករស់នៅជាមួយនាង។
ពីយ៉ា ពីន បានលើកឡើងទៀតថា «ប៉ាម៉ាក់របស់គាត់បានលែងលះគ្នា ហើយពេលលែងលះ ប៉ារបស់គាត់បានរត់ទៅបួស ចំណែកម៉ាក់គាត់ក៏បានទៅមានគ្រួសារថ្មីទៀត។ ហេតុដូចនេះ ទើបនាង និងម្តាយរបស់នាង បានសម្រេចយកគាត់មកចិញ្ចឹម ហើយចាត់ទុកគាត់ដូចជាកូនបង្កើតដូច្នេះដែរ»។
យ៉ាងណា បើតាម ពីយ៉ា ពីន ថា កាលពីម្តាយនាងនៅមានជីវិតគឺគាត់តែងបារម្ភថា បើអត់ពីគាត់ទៅ មិនដឹងមានអ្នកណាមើលថែចៅគាត់នោះទេ។ ដូច្នេះក្រោយអត់ពីម្តាយនាងទៅ នាងក៏បានយកក្មួយមកមើលថែដូចកូនស្រីរបស់ខ្លួន ខណៈពេលនោះក្មួយបានស្រឡាញ់ និងហៅនាងម៉ាក់ៗផងដែរ»។
ស្រីពីន បន្ថែមថា ជាទូទៅមហាជនមួយចំនួនតែងតែមានការយល់ច្រឡំថា នាងមានកូនស្រីម្នាក់រួចហើយ ក្នុងនោះពួកគេក៏បានយល់ថា នាងជាអ្នកសិល្បៈ គឺត្រូវមានការលាក់បាំងពីបញ្ហាគ្រួសារជារឿងធម្មតា»។
ទោះជាយ៉ាងណា នាងក៏មិនចង់លាក់បាំងអ្វីឡើយ ប្រសិនបើនាងពិតជាមានគ្រួសារ និងមានកូននោះ ប៉ុន្តែសម្រាប់ពេលនេះនាងចង់បញ្ជាក់ថា បេះដូងរបស់នាងគឺនៅទំនេរ មិនទាន់មានទាក់ទងជាមួយបុរសណាម្នាក់ឡើយ»។
ដោយពាក់ព័ន្ធនឹងបញ្ហាពីទំនានក់ទំនងក្រៅឆាកជាមួយលោក អៀង ចេនឡា នោះ តារាសម្តែង និងកំប្លែងនាង ពីយ៉ា ពីន ក៏បានលើកឡើថា «វាជារឿងមិនអាចកើតឡើងឡើយ ព្រោះនាង និងលោក អៀង ចេនឡា ស្គាល់គ្នាយូរ និងបានរាប់អានគ្នាដូចជាបងប្អូនតែប៉ុណ្ណោះ»៕
ចែករំលែកព័តមាននេះ