ខេត្តសៀមរាប ៖ ក្នុងឱកាសអញ្ជើញចូលរួមបើកការផ្សព្វផ្សាយ យន្តការវាយតម្លៃនៃការទទួលស្គាល់គុណវឌ្ឍន៍អ្នកជំនាញទេសចរណ៍ជាតិ និងអាស៊ាន នាព្រឹកថ្ងៃទី០៣ ខែឧសភា ឆ្នាំ២០១៦ ធ្វើឡើងនៅសណ្ឋាគារ សេនជូរីអង្គរ នាក្រុងសៀមរាបក្រោមអធិបតីភាព លោក ប៉ាក់ សុខុម រដ្ឋលេខាធិការក្រសួងទេសចរណ៍ ប្រតិភូអមដំណើរមន្ត្រីទេសចរណ៍ និស្សិត ចូលរួមយ៉ាងច្រើនកុះករផងដែរ ដើម្បីត្រៀមទទួលភ្ញៀវចិន២លាននាក់ នៅឆ្នាំ២០២០ខាងមុខ ។
លោក ប៉ាក់ សុខុម រដ្ឋលេខាធិការក្រសួងទេសចរណ៍ បានបញ្ជាក់នៅក្នុងកិច្ចប្រជុំផ្សព្វផ្សាយស្តីពីយន្តការវាយតម្លៃទទួលស្គាល់គុណវឌ្ឍន៍អ្នកជំនាញទេសចរណ៍ជាតិ និងអាស៊ាន ជារៀងរាល់ឆ្នាំ វិស័យទេសចរណ៍កម្ពុជាបានរួមចំណែកប្រមាណជា១៦%នៃផលិតផលក្នុងស្រុក (GDP)។ ជាក់ស្តែង នៅឆ្នាំ២០១៥កន្លងមកនេះវិស័យទេសចរណ៍កម្ពុជាសម្រេចបាន ៦,១% ជាមួយនឹងការមកដល់នៃទេសចរណ៍អន្តរជាតិប្រមាណជា ៤លាន៨សែននាក់ ដែលក្នុងនោះមកពីតំបន់អាស៊ីប៉ាស៊ីហ្វិកតំណាងឲ្យ៧៤.១%(អាស៊ានប្រមាណ៤៤.៣%)ទ្វីបអ៊ឺរ៉ុបតំណាងឲ្យ ១៨.៣% ទ្វីបអាមេរិកតំណាងឱ្យ ៧.២% ទ្វីបអាហ្វ្រិកនិងតំបន់មជ្ឈឹមបូព៌ាតំណាងឱ្យ ០.៥% ។
ហើយរយៈពេល២ខែដើមឆ្នាំ២០១៦នេះ កម្ពុជាទទួលបានភ្ញៀវទេសចរណ៍អន្តរជាតិប្រមាណជា៩១ម៉ឺន៤ពាន់នាក់ ជាមួយនិងកំណើន២.៧%បើប្រៀបធៀបរយៈពេលដូចគ្នាឆ្នាំ២០១៥។
ហើយកម្ពុជាក៍សង្ឃឹមផងដែរថានឹងទទួលបានភ្ញៀវទេសចរណ៍អន្តរជាតិប្រមាណជា៧,៥ ទៅ ៨លាននាក់នៅឆ្នាំ២០២០ និងនាំមកនូវចំណូលសេដ្ឋកិច្ចជាតិប្រមាណជា៥ពាន់លានដុល្លាអាមេរិក ហើយបង្កើនការងារធ្វើដោយផ្ទាល់ប្រមាណជា១លាននាក់ផងដែរ។
លោក ប៉ាក់ សុខុម បានបញ្ជាក់បន្ថែមថា តាមការព្យាករណ៍របស់អង្គការទេសចរណ៍ពិភពលោក(UNWTO) ប្រទេសចិននឹងក្លាយជាប្រទេសដែលទទួលភ្ញៀវទេសចរណ៍អន្តរជាតិច្រើនជាងគេ និងមានភ្ញៀវទេសចរណ៍ចេញក្រៅប្រទេសច្រើន ជាងគេលើពិភពលោក ប្រមាណជា (២០០លាននាក់ ឬ អាចច្រើនជាងនេះក៏ថាបាន ) ដែលនឹងបានផ្តល់កាលានុវត្តភាពដល់វិស័យទេសចរណ៍កម្ពុជាក្នុងការចាប់យកភ្ញៀវទេសចរណ៍ចិន ដ៍ច្រើនសន្ធឹកសន្ធាប់។ ហើយក្នុងនោះដែរក្រសួងទេសចរណ៍បានរៀបចំឯកសារយុទ្ធសាស្ត្រទីផ្សារទេសចរណ៍កម្ពុជា សម្រាប់ឆ្នាំ២០១៦ដល់ឆ្នាំ២០២០ ដែលយុទ្ធសាស្ត្រទាំងនេះ គឺទីផ្សារទេសចរណ៍ចិន និងសៀវភៅស ស្តីពី(China Ready )សម្រាប់ទេសចរណ៍កម្ពុជា ហើយរំពឹងថា នឹងទទួលបានទេសចរណ៍ចិន ប្រមាណជា២លាននាក់ នៅឆ្នាំ២០២០ ខណៈពេលកម្ពុជា ត្រៀមអនុវត្តការ ផ្តល់ទិដ្ឋាការរយៈពេលវែង 3Yer Multiple Visa ដើម្បីសម្រួលការធ្វើដំណើរ និងទាក់ទាញភ្ញៀវទេសចរណ៍ចិន មកទស្សនាកម្ពុជា ឱ្យកាន់តែច្រើនថែមទៀតនៅឆ្នាំ ២០១៦នេះ។
ហើយដើម្បីទ្រទ្រង់នូវសេចក្តីត្រូវការខាងលើ អ្នកជំនាញទេសចរណ៍ដែលមានសមត្ថភាពប្រកបដោយវិជ្ជាជីវៈ ធានាបាននូវឧត្តមភាពប្រកួតប្រជែងទីផ្សារការងារក្រសួងទេសចរណ៍ និងគណៈកម្មការជាតិជំនាញទេសចរណ៍បានរៀបចំយន្តការវាយតម្លៃទទួលស្គាល់គុណវឌ្ឍន៍អ្នកជំនាញទេសចរណ៍ជាតិនិងអាស៊ាន ដែលយន្តការនេះ និងជំរុញឱ្យមានការទទួលស្គាល់គុណវឌ្ឍន៍ទេសចរណ៍កម្ពុជា ក្នុងកម្រិតជាតិ និងអាស៊ាន ក្នុងការលើកទឹកចិត្ត ឱ្យអ្នកជំនាញជ្រើសរើសវិថីសិក្សាសមស្របដើម្បីអភិវឌ្ឍន៍សមត្ថភាពរបស់ខ្លួន និងផ្សព្វផ្សាយដល់គ្រប់ភាគីពាក់ព័ន្ធ ឱ្យមានការយល់ដឹងកាន់តែច្បាស់ អំពីជំនាញវិជ្ជាជីវៈទេសចរណ៍ សំដៅអភិវឌ្ឍន៍ប្រកបដោយប្រសិទ្ធិភាពខ្ពស់៕
ចែករំលែកព័តមាននេះ