សិស្សវិទ្យាល័យស្វាយរៀងម្នាក់ រអិលជើងធ្លាក់ក្នុងទឹកស្រះលង់ស្លា.ប់
ខេត្តស្វាយរៀង ៖ សិស្សថ្នាក់ទី១០នៃវិទ្យាល័យស្វាយរៀងម្នាក់ដើរលេងមាត់ស្រះរអិលជើងធ្លាក់ចូលទឹកស្រះលង់ស្លា.ប់គួរឲ្យសង្វេគ។
ខេត្តស្វាយរៀង ៖ សិស្សថ្នាក់ទី១០នៃវិទ្យាល័យស្វាយរៀងម្នាក់ដើរលេងមាត់ស្រះរអិលជើងធ្លាក់ចូលទឹកស្រះលង់ស្លាប់គួរឲ្យសង្វេគ។ ករណីនេះកើតឡើងកាលពីវេលាម៉ោង៩និង៣០នាទីព្រឹក ថ្ងៃទី០៣ ខែឧសភា ឆ្នាំ២០១៦ នៅក្នុងស្រះស្ថិតនៅភូមិគយត្របែក សង្កាត់គយត្របែក ក្រុងស្វាយរៀង។ បើតាមស្ត្រីឈ្មោះ ម៉ៅ សាវឿន អាយុ៣៧ឆ្នាំ ត្រូវជាម្តាយជនរងគ្រោះនៅភូមិវាលយន្ត សង្កាត់ស្វាយរៀង ក្រុងស្វាយរៀង បានឲ្យដឹងថាគាត់មានកូនប្រុស២នាក់ កូនប្រុសច្បងឈ្មោះ រ៉ន វិច្ឆិកា អាយុ១៧ឆ្នាំ រៀនថ្នាក់ទី១០G វិទ្យាល័យស្វាយរៀងបានលង់ទឹកស្លាប់ ហើយកូនប្រុសពៅឈ្មោះ រ៉ន ពិសិដ្ឋ អាយុ៤ឆ្នាំ។
នៅព្រឹកកើតហេតុកូនប្រុសរបស់គាត់បានទៅរៀនជាធម្មតា លុះដល់ម៉ោងប្រមាណជា៩និង៤០នាទីព្រឹក ណសមត្ថកិច្ចនគរបាលក្រុងស្វាយរៀងបានទូរសព្ទ័ប្រាប់ថាកូនប្រុសឈ្មោះ រ៉ន វិច្ឆិកា លង់ទឹកស្រះសន្លប់មិនដឹងខ្លួនទេ ត្រូវសមត្ថកិច្ចហៅរថយន្តដឹកទៅកាន់មន្ទីរពេទ្យខេត្តដើម្បីសង្គ្រោះក៏ប៉ុន្តែពេលរូបគាត់ទៅដល់មន្ទីរពេទ្យគ្រូពេទ្យប្រាប់ថា កូនប្រុសគាត់ស្លាប់បាត់ទៅហើយធ្វើឲ្យរូបគាត់លុតជង្គង់ស្លុតស្មារតីស្ទើរគាំងបេះដូងស្លាប់ មិនគួរសោះកូនទៅរៀនបែរជា ទៅលង់ទឹកស្លាប់តើម្តាយណាមិនស្លុត។ ហើយបើតាមមិត្តភក្ដិរួមថ្នាក់ជនរងគ្រោះបានប្រាប់ថា នៅព្រឹកថ្ងៃទី០៣នេះថ្នាក់ទី១០Gគឺ ទំនេរ២ម៉ោងចាប់ពីម៉ោង៩ដល់ម៉ោង១១ព្រឹកទើបចូលរៀនវិញ ។
ខណៈនោះសិស្សថ្នាក់ទី១០Gបានសម្រាកខ្លះក៏នាំគ្នាលេងបាល់ខ្លះគេទៅអានសៀវភៅនៅបណ្ណាល័យ រីឯជនរងគ្រោះ និងមិត្តភក្ដិផ្សេងទៀតនាំគ្នាជិះម៉ូតូចេញក្រៅសាលា ទៅដើលេងត្រង់ចំណុចភោជនីយដ្ឋានម្លប់ស្វាយ ស្ថិតនៅភូមិគយត្របែកហើយគេឃើញជនរងគ្រោះទៅលេងនៅមាត់ស្រះមិនដឹងយ៉ាងម៉ិចក៏ឃើញជនរងគ្រោះធ្លាក់ចូលក្នុងទឹកស្រះ មុនដំបូងស្មានថា ជនរងគ្រោះចុះហែលទឹកលេងក្រោយមកក៏ឃើញជនរងគ្រោះលង់ទឹកទើបស្រែកឆោឡោហៅឲ្យចាស់ទុំគេជួយ ក៏ផ្អើលដល់មនុស្សម្នាមកចោមរោមមើលមួយសន្ទុះទើបមានអ្នកចេះហែលទឹកមកដល់ចុះទឹកស្រះ ដែលគេជីកជម្រៅជិត០៣ម៉ែត្រអ្នកស្រង់ចុះមុជរាវរកឃើញជនរងគ្រោះស្រង់ឡើងលើគោកវិញ ។
ជនរងគ្រោះផឹកទឹកពេញពោះ សន្លប់ឈឹងដោយចាស់ទុំរលាក់ទឹកចេញ និងធ្វើចលនាបេះដូងមិនដឹងខ្លួនសមត្ថកិច្ចក៏ហៅរថយន្តដឹកបញ្ជូនទៅមន្ទីរពេទ្យខេត្តដើម្បីសង្គ្រោះតែអកុសលគ្រូពេទ្យមិនអាចសង្គ្រោះបានជនរងគ្រោះបានបាត់បង់ជិវិតទៅហើយម្តាយ និងជីដូនយំសោកអាឡោះអាល័យធ្វើឲ្យអ្នកចូលរួមមិនអាចទប់ទឹកភ្នែកបាន។ សាកសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារធ្វើបុណ្យតាមប្រពៃណី ៕
ចែករំលែកព័តមាននេះ