រាជធានីភ្នំពេញ ៖ តាមការសង្កេតរបស់អ្នកជំនាញបានរកឃើញថា ស្ត្រីមានផ្ទៃពោះសរុបប្រមាណពី៤ទៅ១០ភាគរយដែលកើតមានជំងឺទឹកនោមផ្អែម ។ ជំងឺនេះកើតឡើងនៅពេលដែលក្នុងខ្លួនរបស់ស្ត្រីមានការប្រែប្រួលអ័រម៉ូន
រាជធានីភ្នំពេញ ៖ តាមការសង្កេតរបស់អ្នកជំនាញបានរកឃើញថា ស្ត្រីមានផ្ទៃពោះសរុបប្រមាណពី៤ទៅ១០ភាគរយដែលកើតមានជំងឺទឹកនោមផ្អែម ។ ជំងឺនេះកើតឡើងនៅពេលដែលក្នុងខ្លួនរបស់ស្ត្រីមានការប្រែប្រួលអ័រម៉ូនសម្របទៅតាមទារកដែលនៅក្នុងផ្ទៃ ទើបមានការប្រែប្រួលអ័រម៉ូនជាយថាហេតុ ។
អ័រម៉ូនស្ត្រីនៅពេលមានផ្ទៃពោះ ធ្វើឱ្យជាតិស្កររបស់ស្ត្រីកើនឡើង ។ តាមធម្មតាលំពែងរបស់ស្ត្រីធ្វើការចំនួន៣ដងច្រើនជាងមុនពេលមានផ្ទៃពោះដើម្បីទប់ទល់នឹងអ័រម៉ូនដែលបានបញ្ចេញមក ។ បើសិនជាលំពែងស្ត្រីនោះមិនអាចទប់ទល់នឹងការកើនឡើងជាតិស្ករក្នុងឈាមបានទេ គឺស្ត្រីបានកើតជំងឺមួយដែលគេហៅថាជំងឺទឹកនោមផ្អែម ។ នេះជាប្រសាសន៍លោកវេជ្ជបណ្ឌិត ស៊ុំ សត្ថា ប្រធានអ៊ុយនីតេជំងឺទូទៅនៃមន្ទីរពេទ្យកាល់ម៉ែត ក្នុងកិច្ចសម្ភាសន៍ជាមួយអ្នកសារព័ត៌មាន ។
លោកវេជ្ជបណ្ឌិតស៊ុំ សត្ថា បានមានប្រសាសន៍ទៀតថា ជំងឺនេះអាចកើតមានទៅលើស្ត្រី ដែលមុនពេលមានគភ៌មានគីឡូច្រើន ឬមួយស្ត្រីនោះមានប្រវត្តិរលូតកូន កូនកើតមិនគ្រប់ខែ ឬមួយក៏ស្ត្រីធ្លាប់មានប្រវត្តិមានផ្ទៃពោះលើកមុននោះមានទឹកភ្លោះច្រើនពេក។ តើអាការរបស់ជំងឺនេះយ៉ាងដូចម្តេច ? ជាធម្មតាជំងឺទឹកនោមផ្អែម ដែលកើតទៅលើស្ត្រីមានផ្ទៃពោះ មិនមានលេចចេញជាអាការឱ្យយើងដឹងទេ ហេតុដូច្នេះហើយ ទើបស្ត្រីមួយចំនួនមិនបានចាប់អារម្មណ៍ ទាំងក្រុមគ្រួសារ និងអ្នកជំងឺផ្ទាល់មិនបានស្វែងរកការពិនិត្យជំងឺទឹកនោមផ្អែមនេះទេ ពីព្រោះថា ជំងឺនេះអត់មានរោគសញ្ញា ទាស់តែទៅធ្វើតេសទើបបានដឹង ។ នៅមន្ទីរពេទ្យកាល់ម៉ែតក៏ដូចជាប្រទេសជឿនលឿនជិតខាង គឺរាល់ស្ត្រីដែលមានផ្ទៃពោះទាំងអស់តម្រូវឱ្យទៅធ្វើតេសដើម្បីស្វែងរកជំងឺទឹកនោមផ្អែមនេះ ។ បើសិនជាស្ត្រីដែលមានកត្តាប្រឈមមុខខ្ពស់ យើងធ្វើតេសរកជំងឺទឹកនោមផ្អែមនេះនៅពេលដែលយើងមកជួបលោកគ្រូពេទ្យជំនាញផ្នែកសម្ភពលើកដំបូង ។ បើសិនស្ត្រីដែលមិនមានកត្តាប្រឈមច្រើនលើកដំបូងទេ គឺយើងរង់ចាំរហូតដល់សប្តាហ៍ទី២៤ចន្លោះពីសប្តាហ៍ទី២៤ និងសប្តាហ៍ទី២៨ ចាំយើងធ្វើតេស ។
ផលវិបាកដែលកើតឡើងជាយថាហេតុចំពោះជំងឺទឹកនោមផ្អែមនេះគ្មានរោគសញ្ញានោះទេ គឺផលវិបាកនឹងកើតមានទៅលើម្តាយ និងទារកចៀសមិនផុត។ តើផលវិបាកទៅលើទារកមានអ្វីខ្លះ? ផលវិបាកទៅលើទារកមានដូចជា ទារកនោះធាត់ពេកធ្វើឱ្យមានការលំបាកក្នុងការសម្រាល ហើយទារកនោះអាចមានបញ្ហាចង្វាក់ដង្ហើមនៅពេលកើត ឬមួយកើតមិនគ្រប់ខែ ឬរលូត ហើយទារកអាចប្រឈមមុខនឹងការកើតជំងឺទឹកនោមផ្អែមប្រភេទទី២នៅពេលដែលទារកនោះពេញវ័យ ។ ទាំងនេះ ជាផលវិបាកដែលកើតឡើងចំពោះទារក ។ ដោយឡែក ចំពោះស្ត្រីជាម្តាយក៏មានផលវិបាកដែរ គឺអ្នកម្តាយអាចប្រឈមនឹងជំងឺលើសឈាម ជំងឺព្រាយក្រឡាភ្លើង ហើយគាត់ខ្លួនឯងក៏ប្រឈមនឹងជំងឺទឹកនោមផ្អែមប្រភេទទី២ដែរ នៅពេលខាងមុខ ឬក៏អាចកើតជំងឺទឹកនោមផ្អែមនៅពេលដែលគាត់មានផ្ទៃពោះលើកក្រោយ ។ ដូច្នេះសូមចាប់អារម្មណ៍ថា ជំងឺនេះមិនមានរោគសញ្ញាលេចចេញទេ តែវាមានផលលំបាកច្រើន ដូច្នេះយើងត្រូវតែចាប់អារម្មណ៍ ហើយធ្វើការរុករកដើម្បីកុំឱ្យស្ថានភាពនេះលំបាកស្មុគស្មាញក្នុងការព្យាបាល ។ ការព្យាបាលជំងឺនេះគឺថា មិនមានអីស្មុគស្មាញនោះទេ អ្នកត្រូវទៅរកគ្រូពេទ្យជំនាញផ្នែកទឹកនោមផ្អែមនៅមន្ទីរពេទ្យកាល់ម៉ែតដើម្បីឱ្យគ្រូពេទ្យប្រឹក្សាយោបល់អំពីរបបចំណីអាហារ ដែលនេះមានសារៈសំខាន់ណាស់ចំពោះស្ត្រីមានផ្ទៃពោះ។
ការទទួលទានអាហារត្រូវឲ្យបានគ្រប់គ្រាន់ ពីព្រោះមានគភ៌នៅក្នុងផ្ទៃបើយើងទទួលទានមិនបានគ្រប់គ្រាន់ ផលប៉ះពាល់ទៅលើផ្ទៃរបស់យើងក៏មានផលប៉ះពាល់ដែរ តែផ្ទុយទៅវិញ នៅពេលអ្នកជំងឺលើសជាតិស្ករបើទទួលទានច្រើនពេកគឺថា ធ្វើឲ្យមានផលវិបាកដូចគ្នា ។ ដូច្នេះការដែលមកប្រឹក្សាជាមួយគ្រូពេទ្យដែលអាចណែនាំពន្យល់ពីរបបចំណីអាហារ និងលំហាត់ប្រាណ គឺអាចជួយអ្នកបាន ។ មធ្យោបាយទី២អាចមានថ្នាំគ្រាប់សម្រាប់អ្នកជំងឺទទួលទានដើម្បីបញ្ចុះជាតិស្ករ ។
លោកវេជ្ជបណ្ឌិតស៊ុំ សត្ថា ប្រធានអ៊ុយនីតេជំងឺទូទៅនៃមន្ទីរពេទ្យកាល់ម៉ែតបានរំលឹកថា សម្រាប់អ្នកដែលកើតជំងឺនេះ តើជាតិស្កររបស់គាត់មានក្នុងកម្រិតណា ? ដែលថាមានសុវត្ថិភាពផលប៉ះពាល់គឺថា សម្រាប់ស្ត្រីមានផ្ទៃពោះកម្រិតជាតិស្ករដែលល្អបំផុតដើម្បីជៀសវាងកុំឱ្យមានផលវិបាក គឺបានសេចក្តីថា នៅពេលព្រឹកមុននឹងទទួលទានអាហារ កម្រិតជាតិស្កររបស់ស្ត្រីនោះត្រូវតែទាបជាង ឬស្មើនឹង៩៥មីល្លីក្រាមប៉ាក់ដេស៊ីលីត្រ ឬមួយក៏ជាតិស្ករ២មោ៉ងក្រោយពីទទួលទានអាហារតិចជាង១២០មីល្លីក្រាមប៉ាក់ដេស៊ីលីត្រ កម្រិតនេះត្រូវតែទាបហើយល្អយ៉ាងនេះឯងដើម្បីការពារកុំឲ្យអ្នកជំងឺមានផលវិបាក ។ នៅពេលស្ត្រីនោះសម្រាលរួច ជាធម្មតាជំងឺវានឹងស្វះស្វែងដោយខ្លួនឯង ពីព្រោះថា នៅពេលសម្រាលទារករួចអ័រម៉ូនស្ត្រីនឹងត្រឡប់មករកភាពប្រក្រតីដូចមុនពេលដែលមានផ្ទៃពោះយ៉ាងដូច្នេះឯង ។ ជាតិស្កររបស់គាត់ក្នុងរយៈពេល៦សប្តាហ៍វានឹងត្រឡប់មករកភាពប្រក្រតីវិញ ប៉ុន្តែចំពោះការវិវត្តរយៈពេលវែងគឺម្តាយដែលមានជំងឺនេះអាចប្រឈមនឹងជំងឺទឹកនោមផ្អែមប្រភេទទី២នៅពេលអនាគត ។ ដូច្នេះទោះបីក្រោយពីសម្រាលបុត្ររួច និងបន្ទាប់ពីជាតិស្ករត្រឡប់មកធម្មតាហើយ ជាគោលការណែនាំរបស់គ្រូពេទ្យសម្រាប់មាតាត្រូវតែបន្តការហាត់ប្រាណ ការទទួលទានអាហារដោយប្រុងប្រយ័ត្នមិនសម្បូរកាល់ឡូរីខ្ពស់ និងការឡើងទម្ងន់ពេកដើម្បីជៀសវាងការកើតជំងឺទឹកនោមផ្អែមប្រភេទទី២ជាយថាហេតុ។ ពីព្រោះថា បើស្ត្រើមានផ្ទៃពោះធ្លាប់កើតជំងឺទឹកនោមផ្អែមហើយគឺ៥០ភាគរយនៃមាតានោះអាចប្រឈមនឹងការកើតជំងឺទឹកនោមផ្អែមប្រភេទទី២ ។
សូមស្ត្រីទាំងឡាយចាប់អារម្មណ៍រឿងនេះដើម្បីបង្ការកុំឲ្យធ្លាក់ទៅរកការកើតជំងឺទឹកនោមផ្អែមប្រភេទទី២ដែលជាជំងឺរ៉ាំរ៉ៃ និងមានភាពស្មុគស្មាញក្នុងការព្យាបាល ៕
ចែករំលែកព័តមាននេះ