ខេត្តស្ទឹងត្រែង ៖ បន្ទាប់ពីការខកខានទទួលភ្ញៀវទេសចរជាង២ឆ្នាំកន្លងមក ឆ្នាំនេះជាឆ្នាំលើកដំបូង ដែលខេត្តស្ទឹងត្រែងបានទទួលភ្ញៀវទេសចរមកលេង។ ក្នុងរយៈ៣ថ្ងៃនៃពិធីបុណ្យអុំទូកអកអំបុក និងសំពះព្រះខែ ខេត្តស្ទឹងត្រែងទទួលភ្ញៀវទេសចរជាតិក្នុងស្រុកបានចំនួន៦២០៨នាក់។ នេះបើយោងតាមរបាយការណ៍មន្ទីរទេសចរណ៍ដែលចេញនៅល្ងាចថ្ងៃទី២០ ខែវិច្ឆិកា…
ខេត្តស្ទឹងត្រែង ៖ បន្ទាប់ពីការខកខានទទួលភ្ញៀវទេសចរជាង២ឆ្នាំកន្លងមក ឆ្នាំនេះជាឆ្នាំលើកដំបូង ដែលខេត្តស្ទឹងត្រែងបានទទួលភ្ញៀវទេសចរមកលេង។ ក្នុងរយៈ៣ថ្ងៃនៃពិធីបុណ្យអុំទូកអកអំបុក និងសំពះព្រះខែ ខេត្តស្ទឹងត្រែងទទួលភ្ញៀវទេសចរជាតិក្នុងស្រុកបានចំនួន៦២០៨នាក់។ នេះបើយោងតាមរបាយការណ៍មន្ទីរទេសចរណ៍ដែលចេញនៅល្ងាចថ្ងៃទី២០ ខែវិច្ឆិកា ឆ្នាំ២០២១ ក្នុងបាយការបានបង្ហាញថា ក្នុងចំណោមភ្ញៀវចំនួន៦២០៨នាក់ ក្នុងនោះមានភ្ញៀវអន្តរជាតិផ្ទៃក្នុងចំនួន១៦នាក់ផងដែរ។
លោក លី មីនា អភិបាលស្រុកបុរីអូរស្វាយសែនជ័យ បានឱ្យដឹងថា ភ្ញៀវទេសចរឆ្នាំនេះ បានសម្រុកទៅលេងនៅស្រុកបុរីអូរស្វាយសែនជ័យច្រើន ពីព្រោះស្រុកនេះមានកន្លែងទាក់ទាញជាច្រើនកន្លែងសម្រាប់ភ្ញៀវទេសចរដូចជា តំបន់អន្លង់ផ្សោតអូរឈើទាល កោះលន កោះទន្សាយ កោះហាន តំបន់រ៉ាមសា និងតំបន់មួយចំនួនតាមដងទន្លេមេគង្គថែមទៀតផងដែរ។ ជាងនេះទៅទៀត លោក អ៊ន់ បោសឿន ប្រធានមន្ទីរទេសចរណ៍បានឱ្យដឹងថា៖
ក្នុងថ្ងៃឈប់សម្រាកបីថ្ងៃនេះ ភ្ញៀវទេសចរបានមកកក់បន្ទប់សណ្ឋាគារ ផ្ទះសំណាក់ តាំងពីមុនពេលថ្ងៃឈប់សម្រាកមកម្លេះ ដែលធ្វើឱ្យសណ្ឋាគារ និងផ្ទះសំណាក់ខ្លះពុំមានបន្ទប់សម្រាប់ទទួលភ្ញៀវឱ្យបានគ្រប់គ្រាន់នោះទេ។ លោកបន្តថា នាពេលបច្ចុប្បន្នបន្ទប់សណ្ឋាគារ និងផ្ទះសំណាក់ទាំងអស់មានចំនួនជាង៨០០បន្ទប់។ លោកថា ចំពោះតម្លៃវិញសេវាកម្មសណ្ឋាគារ និងផ្ទះសំណាក់ គឺមានតម្លៃលើសថ្ងៃធម្មតាប្រហែល៥ដុល្លារប៉ុណ្ណោះ ដែលភ្ញៀវអាចទទួលយកបាន៕ ដោយ ៖ រ៉ូ សាលី
ចែករំលែកព័តមាននេះ