ខេត្តប៉ៃលិន៖ នាឱកាសបុណ្យអុំទូក បណ្តែតប្រទីប សំពះព្រះខែ និងអកអំបុក នាឆ្នាំ២០២១នេះ មានភ្ញៀវទេសចរ ដែលរស់នៅក្នុងខេត្តប៉ៃលិន ក៏ដូចជាអ្នកធ្វើដំណើរ មកពីតាមបណ្តាខេត្តនានា…
ខេត្តប៉ៃលិន៖ នាឱកាសបុណ្យអុំទូក បណ្តែតប្រទីប សំពះព្រះខែ និងអកអំបុក នាឆ្នាំ២០២១នេះ មានភ្ញៀវទេសចរ ដែលរស់នៅក្នុងខេត្តប៉ៃលិន ក៏ដូចជាអ្នកធ្វើដំណើរ មកពីតាមបណ្តាខេត្តនានា បាននាំគ្នាចូលមកលេងក្នុងខេត្តប៉ៃលិន យ៉ាងច្រើនកុះករ គួរឱ្យកត់សម្គាល់ ជាហេតុធ្វើឱ្យប្រជាពលរដ្ឋ ប្រកបរបរលក់ដូរ នៅតាមរមណីយដ្ឋាននានា ក្នុងខេត្ត មមាញឹកយ៉ាងខ្លាំង។
ចំណែកនៅរមណីយដ្ឋានប្រវតិ្តសាស្ត្រភ្នំយ៉ាត ក៏មានភ្ញៀវយ៉ាងច្រើន ចូលទៅដុតធូប បន់ស្រន់សុំសេចក្តីសុខពីលោកយាយយ៉ាត។ អ្នកខ្លះទៀត រៀបចំនំចំណីផ្លែឈើ ក្បាលជ្រូក មាន់ខ្វៃ ទាខ្វៃ យកទៅ សែនព្រេនលាបំណន់ផ្សេងៗ ជាដើម។
ចំណែកព្រះសង្ឃ ជាច្រើនអង្គ ក៏បាននិមន្តមកពីតាមបណ្តាខេត្តផ្សេងៗ ចូលមកលេងកម្សាន្តនៅក្នុងខេត្តប៉ៃលិន រួមជាមួយនឹងក្រុមតាជី យាយជី ចូលទៅក្នុងវត្តយ៉ាត វត្តរតនសោភ័ណ ហៅ វត្តកោងកាង ជាដើម។
ភ្ញៀវទេសចរម្នាក់ ឈ្មោះ ចាន់ ចំណាន ភេទប្រុស រស់នៅខេត្តបាត់ដំបង បានឱ្យដឹងថា នាឱកាសបុណ្យអុំទូកនេះ ពួកគាត់បាននាំគ្នាមកលេងខេត្តប៉ៃលិន ដើម្បីឱ្យក្រុមគ្រួសារប្រពន្ធកូនលំហែអារម្មណ៍ ដោយនាំគ្នាសម្រាកនៅសណ្ឋាគារ ក្នុងក្រុងប៉ៃលិន ១យប់ លុះដល់ព្រឹកឡើង នាំគ្នាទៅហែលទឹកលេងនៅតាមស្ទឹង រហូតដល់ពេលល្ងាច ទើបនាំគ្នាត្រឡប់ទៅផ្ទះវិញ។ ពួកគាត់ពិតជាមានការសប្បាយរីករាយយ៉ាងខ្លាំង តែក៏មិនភ្លេចក្នុងការអនុវត្តតាមការណែនាំរបស់ប្រមុខរាជរដ្ឋាភិបាល ដោយលាងដៃនឹងអាល់កុល ឬជែល ពាក់ម៉ាសជាប្រចាំ ដើម្បីការពារកុំឱ្យមានការឆ្លងជំងឺកូវីដ១៩ ផងដែរ។
លោក លឹម វាសនា ប្រធានមន្ទីរទេសចរណ៍ ខេត្តប៉ៃលិន បានឱ្យដឹងថា សរុបចំនួនភ្ញៀវទេសចរ ដែលចូលមកទស្សនាកម្សាន្ត ក្នុងខេត្តប៉ៃលិន នាឱកាសពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក នៅថ្ងៃទី១៨-១៩-២០ ខែវិច្ឆិកា ឆ្នាំ២០២១ មានដូចតទៅ៖ ទី១. ចំនួនភ្ញៀវទេសចរជាតិ សរុបចំនួន ៥,៩៣២នាក់ ទី២.ចំនួនភ្ញៀវអន្តរជាតិ សរុបចំនួន ៣៤នាក់។
លោកបន្តទៀតថា ចំនួនភ្ញៀវសរុបរយៈពេល ៣ថ្ងៃ មានចំនួន ៥,៩៧២នាក់ ក្នុងឱកាសបុណ្យអុំទូក នៅឆ្នាំនេះ កើនឡើង ៥០.៥៧% បើបៀបធៀបទៅនឹងឆ្នាំ២០២០ កន្លងមក ដែលមានចំនួន ៣,៩៦៦នាក់៕ នីយ៉ា
ចែករំលែកព័តមាននេះ