ទឹកស្ទឹងពោធិ៍សាត់ ឡើងហួសចំណុចប្រកាសអាសន្ន តែមិនបង្កផលប៉ះពាល់អ្វីធ្ងន់ធ្ងរទេ
- ពោធិ៍សាត់
ទឹកស្ទឹងពោធិ៍សាត់ បានជន់ឡើងខ្លាំងហួសចំណុចប្រកាសអាសន្ន ប៉ុន្តែមិនបង្កផលប៉ះពាល់អ្វីធ្ងន់ធ្ងរនោះទេ។ ស្ថិតក្នុងស្ថានភាពបែបនេះ
ទឹកស្ទឹងពោធិ៍សាត់ បានជន់ឡើងខ្លាំងហួសចំណុចប្រកាសអាសន្ន ប៉ុន្តែមិនបង្កផលប៉ះពាល់អ្វីធ្ងន់ធ្ងរនោះទេ។ ស្ថិតក្នុងស្ថានភាពបែបនេះ
ខេត្តពោធិ៍សាត់ ៖ នៅព្រឹកថ្ងៃទី១៦ ខែវិច្ឆិកា ឆ្នាំ២០២១នេះ ទឹកស្ទឹងពោធិ៍សាត់ បានជន់ឡើងខ្លាំងហួសចំណុចប្រកាសអាសន្ន ប៉ុន្តែមិនបង្កផលប៉ះពាល់អ្វីធ្ងន់ធ្ងរនោះទេ។ ស្ថិតក្នុងស្ថានភាពបែបនេះ លោក ជាវ តាយ អភិបាល នៃគណៈអភិបាលខេត្តពោធិ៍សាត់ បានដឹកនាំកម្លាំងចុះពិនិត្យមើលស្ថានភាពទឹកជំនន់ក្នុងក្រុងពោធិ៍សាត់ ដើម្បីមានវិធានការគ្រប់គ្រងសភាពការណ៍ ប្រសិនបើទឹកនៅតែបន្តជន់ថែមទៀតនោះ។
លោក កែវ វ័យ ប្រធានមន្ទីរធនធានទឹក និងឧតុនិយមខេត្ត បានឲ្យដឹងថា បន្ទាប់ពីបានធ្វើការសង្គេតតាមដានលើស្ថានភាពអាកាសធាតុរួចមក ឃើញថា មានភ្លៀងធ្លាក់នៅតំបន់ជួរភ្នំក្រវាញពីរបីយប់មកហើយ ធ្វើឲ្យស្ទឹងចំនួន០៣ គឺស្ទឹងអារ៉ៃ ស្ទឹ្ងងព្រៃខ្លុង និងស្ទឹងធំ នាំទឹកហូរចាក់មកលើដងស្ទឹងពោធិ៍សាត់ បង្កជាជំនន់ទឹកភ្លៀងលិចក្រុងពោធិ៍សាត់ និងស្រុកកណ្ដៀង ដែលនៅផ្នែកខាងក្រោម។
លោកប្រធានមន្ទីរធនធានទឹក និងឧតុនិយមខេត្ត បន្តទៀតថា នៅព្រឹកថ្ងៃទី១៦នេះ កម្ពស់ទឹកស្ទឹងនៅក្រុងពោធិ៍សាត់ ឡើងដល់ ៥,៩ម៉ែត្រ គឺហួសចំណុចប្រកាសអាសន្ន ប៉ុន្តែទឹកនៅស្រុកភ្នំក្រវាញ បានចាប់ផ្ដើមស្រកវិញបន្តិចហើយ។ បើយើងបើកឲ្យចេញបែកវាល វានឹងលិចស្រូវប្រជាកសិករដែលកំពុងទុំតាមស្រែ ដូច្នេះយើងឲ្យជន់តែក្នុងស្ទឹងពោធិ៍សាត់សិនចុះ លុះត្រាតែទប់លែងជាប់ ទើបយើងបញ្ចេញឲ្យបែកវាល។
លោក ជាវ តាយ អភិបាលនៃគណៈអភិបាលខេត្តពោធិ៍សាត់ បានលើកឡើងថា សម្ដេចតេជោ ហ៊ុន សែន មានការព្រួយបារម្ភខ្លាំងណាស់អំពីបញ្ហាទឹកជំនន់នេះ ដូច្នេះខេត្តដែលមានស្ទឹងធ្លាប់ជន់លិចរាល់ឆ្នាំ អភិបាលខេត្តនីមួយៗត្រូវតែត្រៀមលក្ខណៈឲ្យបានម៉ឺងម៉ាត់ក្នុងការទប់ទល់ និងជួយសង្គ្រោះប្រជាពលរដ្ឋរបស់ខ្លួន។
លោកអភិបាលខេត្ត មានប្រសាសន៍បន្តថា បើតាមការពិនិត្យជាក់ស្ដែង និងសេចក្ដីរាយការណ៍របស់លោកប្រធានមន្ទីរធនធានទឹក និងឧតុនិយម គឺថា ទឹកនៅប៉ែកខាងលើ បានស្រកបន្តិចវិញហើយ ហើយកំពុងចាល់មកប៉ែកខាងក្រោមវិញ។ បើពុំមានភ្លៀងធ្លាក់ទៀតទេ ក្នុងរយៈពេលពី០៥ទៅ០៦ម៉ោង ទឹកស្ទឹងពោធិ៍សាត់នឹងស្រកទៅវិញហើយ។
ទោះបីទឹកស្រកបន្តិចមែន ប៉ុន្តែនៅតំបន់ជួរភ្នំក្រវាញ មេឃនៅតែងងឹត អាចនឹងមានភ្លៀងធ្លាក់ បង្កជាទឹកជំនន់ទៀតក៏ថាបាន។ ដូច្នេះសូមអាជ្ញាធរគ្រប់លំដាប់ថ្នាក់ និងប្រជាពលរដ្ឋដែលរស់នៅតាមដងស្ទឹង សូមបង្កើនការប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងជាយថាហេតុ និងត្រៀមរកទីទួលសុវត្ថិភាពសម្រាប់ជន្លៀសប្រជាពលរដ្ឋដែលងាយរងគ្រោះ។
ទោះយ៉ាងណា ខេត្តបានត្រៀមលក្ខណៈរួចជាស្រេចនូវវិធានការសរុប កម្លាំងសរុប និងមធ្យោបាយសរុប ដើម្បីទប់ទល់នឹងជំនន់ទឹកភ្លៀងនេះ។ ជាមួយគ្នានេះ ឯកឧត្តមបានបួងសួងដល់ឧកញ៉ាឃ្លាំងមឿង ជំទាវខាន់ខៀវ ជួយបញ្ចៀសកុំឲ្យមានទឹកជំនន់ និងសូមឲ្យប្រជាពលរដ្ឋខេត្តពោធិ៍សាត់ ចៀសផុតពីជំងឺកូវីដ១៩ ទាំងអស់គ្នា។
បន្ទាប់មកក្នុងថ្ងៃដដែលនេះ ឯកឧត្តម ជាវ តាយ អភិបាលនៃគណៈអភិបាលខេត្តពោធិ៍សាត់ និងលោកជំទាវ បានអញ្ជើញទៅចុះឈ្មោះបោះឆ្នោតនៅសាលាសង្កាត់ផ្ទះព្រៃ ដើម្បីត្រៀមចូលរួមបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២២ និងបោះឆ្នោតសភាជាតិនៅឆ្នាំ២០២៣ បំពេញកាតព្វកិច្ចជាពលរដ្ឋរស់ក្នុងសង្គមកម្ពុជាផងដែរ៕
ចែករំលែកព័តមាននេះ