រាជធានីភ្នំពេញ ៖ នៅពេលការបើកទទួលអ្នកទេសចរវ៉ាក់សាំងកាន់តែខិតជិតមកដល់គេសង្កេតឃើញក្រសួងទេសចរណ៍បានកំពុងធ្វើការទាក់ទាញអ្នកទេសចរពីប្រទេសមួយចំនួន តាមរយៈការជំរុញកិច្ចសហប្រតិបត្តិការវិស័យទេសចរណ៍រវាងក្រសួង និងស្ថានទូតប្រទេសទាំងនោះប្រចាំនៅភ្នំពេញ ។ កន្លងមកគេសង្កេតឃើញ លោក ថោង ខុន បានជួបពិភាក្សាការងារពីរឿងនេះទូតរុស្ស៊ីនៅភ្នំពេញ ទូតជប៉ុន និងពេលថ្មីនេះៗលោកបានជួបពិភាក្សាការងារជាមួយលោក ផាក ឃឿងយ៉ុង (Park Heung-Kyeong) ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា ផងដែរ ។
លោករដ្ឋមន្ត្រី ថោង ខុន បានលើកឡើងថា កម្ពុជាគ្រោងនឹងបើកទទួលទេសចរអន្តរជាតិនៅតំបន់ក្រុងព្រះសីហនុ ក្រុងកោះរ៉ុង និងតំបន់តារាសាគរនៃខេត្តកោះកុង ចាប់ពីថ្ងៃទី ៣០ ខែវិច្ឆិកា ឆ្នាំ ២០២១ តទៅ ហើយសៀមរាបអង្គរនឹងបើកឡើងវិញនៅខែមករា ឆ្នាំ ២០២០ រួចនឹងបន្តពិនិត្យបើករាជធានីភ្នំពេញ និងទូទាំងប្រទេសជាបន្តបន្ទាប់និងស្នើដល់លោកឯកអគ្គរដ្ឋទូតបង្កើនកិច្ចសហប្រតិបត្តិនៅក្នុងការជំរុញលើកកម្ពស់វិស័យទេសចរណ៍រវាងប្រទេសទាំងពីរ ។
លោកឯកអគ្គរដ្ឋទូត ផាក ឃឿងយ៉ុង បានគាំទ្រនូវគំនិតផ្តួចផ្តើមលើការបើកទេសចរណ៍អន្តរជាតិចាក់វ៉ាក់សាំងពេញលេញ និងចូលរួមជំរុញកិច្ចសហប្រតិបត្តិការជំរុញទេសចរកូរ៉េមកទស្សនាកម្ពុជាបន្ថែមទៀត ដោយប្រជាពលរដ្ឋនៃប្រទេសទាំងពីរមានអត្រាខ្ពស់ក្នុងការទទួលបានការចាក់វ៉ាក់សាំងពេញលេញ ក្រោមយុទ្ធសាស្ត្របើកទេសចរណ៍វ៉ាក់សាំង ដែលរាជរដ្ឋាភិបាលបានប្រកាសដាក់ចុះតាមគោលដៅសុវត្ថិភាព ជាពិសេសនៅតាមតំបន់ទេសចរណ៍បែបធម្មជាតិ និងខេត្តសៀមរាបដែលប្រជាជនកូរ៉េចូលចិត្តមកទស្សនា ។
ស្ថានទូតសាធារណរដ្ឋកូរ៉េក៏នឹងជួយផ្សព្វផ្សាយពីសក្តានុពលទេសចរណ៍កម្ពុជា ក៏ដូចជាកិច្ចសហប្រតិបត្តការល្អៗជាមួយកម្ពុជាដល់ពលរដ្ឋកូរ៉េ តាមរយៈការចុះផ្សាយអត្ថបទជាដើម ៕
ចែករំលែកព័តមាននេះ