កម្ពុជាអាចឈានមុខប្រទេសថៃ និងវៀតណាម បើកូរ៉េជួយបង្កើតមន្ទីរពិសោធន៍សុវត្ថិភាពផលិតផលសត្វ
- ភ្នំពេញ
រាជធានីភ្នំពេញ ៖ Korea Agency of HACCP Accreditation and Services របស់សាធារណរដ្ឋកូរ៉េ…
រាជធានីភ្នំពេញ ៖ Korea Agency of HACCP Accreditation and Services របស់សាធារណរដ្ឋកូរ៉េ បង្ហាញគម្រោងសាងសង់មន្ទីរពិសោធន៍សុវត្ថិភាពផលិតផលសត្វ គុណភាពផលិតផលបសុសត្វ និងសារធាតុគីមីលើផលិតផលសត្វ និងកាកសំណល់បសុឱសថនៅក្នុងផលិតផលសត្វ និងសត្វ ដើម្បីចូលរួមចំណែកក្នុងការលើកកំពស់សុខុមាលភាពជាតិ តាមរយៈការបរិភោគផលិតផលសត្វដែលមានសុវត្ថិភាព និងលទ្ធភាពការនាំចេញផលិតផលសត្វនាពេលអនាគត ។
ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា រយៈពេលនៃការអនុវត្តគម្រោងមានរយៈពេល ៥ ឆ្នាំចាប់ពីឆ្នាំ ២០២៣ ដល់ ២០២៧ តាមការប៉ាន់ស្មានថវិកាជាបឋម គឺត្រូវការថវិកាចំនួន ៨ លានដុល្លារអាមេរិក ដោយផ្តោតទៅលើលើការងារធំៗក្នុងនោះមានដូចជា ៖ ពង្រឹងសមត្ថភាពធនធានមនុស្សលើការងារគ្រប់គ្រងបសុសត្វ និងសាច់សត្វ, ពង្រឹងសុវត្ថិភាព ប្រព័ន្ធគ្រប់គ្រងអនាម័យ និងភូតគាមអនាម័យ ហើយនិងបទដ្ឋានគិតិយុត្តក្រោមច្បាប់ និងការកសាងវិទ្យាស្ថានជាតិបសុសត្វ នៅកម្ពុជា ។
លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជួបជាមួយថ្នាក់ដឹកនាំ Korea Agency of HACCP Accreditation and Services កាលពីថ្ងៃទី ១១ ខែវិច្ឆិកា ឆ្នាំ ២០២១ ដើម្បីពិភាក្សាលើបញ្ហានេះ ។ លោករដ្ឋមន្ត្រីបានស្នើសុំឱ្យក្រុមការងារបេសកកម្មកូរ៉េជួយពិនិត្យមើល ពីបញ្ហាប្រឈមកម្ពុជា ទាក់ទងទៅនឹងកង្វះខាតបច្ចេកវិទ្យា និងហេដ្ឋារចនាសម្ព័ន្ធក្នុងការផលិត ស្រាវជ្រាវវ៉ាក់សាំង និងថ្នាំព្យាបាលសត្វ ក្នុងស្រុកដែលអាចទប់ស្កាត់ការរីករាលដាលជំងឺឆ្លងសត្វនៅកម្ពុជានាពេលខាងមុខ ។
តំណាងក្រុមបេសកកម្មកូរ៉េបានយល់ព្រមទទួលយកសំណូមពររបស់លោករដ្ឋមន្ត្រី ហើយបានសន្យាថា នឹងធ្វើការសិក្សារួមបញ្ជូលទៅក្នុងគម្រោង ដើម្បីចូលរួមចំណែកក្នុងការលើកកម្ពស់សុខុមាលភាពប្រជាជនកម្ពុជា និងបម្រើដល់ការនាំចេញសាច់សត្វរបស់កម្ពុជានាពេលអនាគត់ ។
លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា បានស្វាគមន៍គម្រោងនេះ ។ លោកថា សព្វថ្ងៃនេះ សូម្បីតែនៅប្រទេសវៀតណាម និងថៃ គុណភាពសាច់សត្វនៅមិនទាន់មានស្តង់ដារនៅឡើយទេ ហើយបើសិនជាកម្ពុជាដើរបានមុនពិតជាល្អ ធ្វើឱ្យការផលិតកម្មសត្វត្រូវគោរពទៅតាមស្តង់ដារ ហើយការនាំចូលសាច់សត្វក៏ត្រូវមានស្តង់ដារដូចគ្នា ហើយដល់ពេលនោះកម្ពុជាអាចនាំចេញសាច់សត្វទៅក្រៅប្រទេសបាន ៕
ចែករំលែកព័តមាននេះ