ភ្ញៀវទេសចរជាង ១៧ ម៉ឺននាក់បានចេញដើរកម្សាន្តនៅចុងសប្តាហ៍មុន
- ភ្នំពេញ
រាជធានីភ្នំពេញ ៖ នៅថ្ងៃទី ៦ និង ៧ ខែវិច្ឆិកា ដែលជាចុងសប្តាហ៍កន្លងមកនេះ មានភ្ញៀវទេសចរចំនួន ១៧៤,៥៤៣…
រាជធានីភ្នំពេញ ៖ នៅថ្ងៃទី ៦ និង ៧ ខែវិច្ឆិកា ដែលជាចុងសប្តាហ៍កន្លងមកនេះ មានភ្ញៀវទេសចរចំនួន ១៧៤,៥៤៣ នាក់បានដើរកម្សាន្ត នៅក្នុងនោះភ្ញៀវទេសចរជាតិ ១៦៩,៥៣២ នាក់ និងភ្ញៀវបរទេសផ្ទៃក្នុង ៥,០១១ នាក់ ។
លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា រមណីយដ្ឋានទេសចរណ៍ និងគោលដៅទេសចរណ៍ទូទាំងប្រទេសបានបើកដំណើរការទទួលភ្ញៀវទេសចរ ខណៈដែលមូលដ្ឋានអាជីវកម្មទេសចរណ៍ដែលបានផ្អាកសកម្មភាពកន្លងមក ក៏បានរៀបចំដើម្បីទទួលភ្ញៀវទេសចរ ក៏ដូចជាត្រៀមខ្លួនទទួលភ្ញៀវទេសចរនាពេលថ្ងៃឈប់សម្រាកព្រះរាជពិធីបុណ្យអុំទូកខាងមុខផងដែរ ។
គោលដៅទេសចរណ៍សំខាន់ៗនៅ ៦ ខេត្ត-ក្រុងដែលអ្នកទេសចរបានដើរកម្សាន្តនាពេលកន្លងមកនេះ ខេត្តព្រះសីហនុទទួលបានភ្ញៀវ ៣៧,៦៤១ នាក់ រាជធានីភ្នំពេញទទួលបានភ្ញៀវ ៣៥,២១០ នាក់ ខេត្តកំពត ទទួលបានភ្ញៀវ ១៦,៥០១ នាក់ ខេត្តសៀមរាបទទួលបានភ្ញៀវ ១៥,១០០ នាក់ និងខេត្តពោធិ៍សាត់ ទទួលបានភ្ញៀវ ១០,៤៤៧ នាក់ ។
លោកបានបន្តថា ចំពោះការទប់ស្កាត់ការរីករាលដាលជំងឺកូវីដ-១៩ រដ្ឋមន្ត្រីក្រសួងទេសចរណ៍រូបនេះបានសង្កេតឃើញថា ទាំងម្ចាស់មូលដ្ឋានអាជីវកម្ម និងភ្ញៀវទេសចរមានការយល់ដឹងកាន់តែប្រសើរ និងបានចូលរួមអនុវត្តវិធានការនានាកាន់តែសកម្ម ពិសេសវិធានការ «៣កុំ និង ៣ការពារ» ស្របពេលដែលរដ្ឋបាលរាជធានី-ខេត្ត មន្ទីរទេសចរណ៍បានបន្តជំរុញការអនុវត្តវិធានសុវត្ថិភាពទេសចរណ៍ និងនីតិវិធីប្រតិបត្តិស្តង់ដារអប្បបរមា (SOP) ឲ្យបានគ្រប់មូលដ្ឋានអាជីវកម្ម ៕ សុខ សារ៉ាយ
ចែករំលែកព័តមាននេះ