រាជធានីភ្នំពេញ ៖ ផ្ទះ១ខ្នងដែលសង់ពីឈើខាងលើ និងរៀបបន្ទប់ថ្មខាងក្រោម ត្រូវបានអគ្គិភ័យឆាបឆេះ បណ្តាលឱ្យរងការខូចខាតអស់ទាំងស្រុង ខណៈពេលដែលម្ចាស់ផ្ទះកំពុងស្ថិតនៅខាងក្រោមផ្ទះ ហើយអណ្តាតភ្លើងបានឆាបឆេះនៅផ្នែកខាងលើមុន ។ លុះពេលដឹងថា ភ្លើងឆេះនោះ គឺអណ្ដាតភ្លើងបានគ្របដណ្ដប់អស់១ចំហៀងផ្ទះបាត់ទៅហើយ ចំណែកអ្នកភូមិក៏នាំគ្នាជួយពន្លត់ដែរ តែអាចមិនឈ្នះឡើយ ហើយណាមួយរថយន្តពន្លត់អគ្គិភ័យក៏នៅឆ្ងាយថែមទៀត ទំរាំតែទៅដល់ផ្ទះកើតហេតុនោះ ផ្ទះជនរងគ្រោះត្រូវអណ្តាតភ្លើងឆាបឆេះអស់ទាំងស្រុងបាត់ទៅហើយ។
ដោយឡែកស្ត្រីជាម្ចាស់ផ្ទះ ដោយសារតែមានការតក់ស្លុត និងសោកស្ដាយផ្ទះ រួមនឹងទ្រព្យសម្បត្តិផងនោះ ក៏បានស្រែកទ្រហោយំ រហូតដល់សន្លប់បាត់ស្មារតី។ ហេតុការណ៍នេះ បានកើតឡើងកាលពីវេលាម៉ោង១១និង៤០នាទីថ្ងៃត្រង់ ថ្ងៃទី៣ ខែវិច្ឆិកា ឆ្នាំ២០២១ នេះ ស្ថិតនៅក្នុងភូមិខ្វិត សង្កាត់សាក់សំពៅ ខណ្ឌដង្កោ រាជធានីភ្នំពេញ។
តាមប្រភពព័ត៌មានបានឲ្យដឹងថា ផ្ទះដែលទទួលរងនូវការឆាបឆេះខាងលើនោះ សាងសង់ពីឈើខាងលើ និងបន្ទប់ថ្មក្រោមប្រក់ស័ង្កសី មានទំហំ៤ម៉ែត្រគុណនិង៥ម៉ែត្រ ដែលមានម្ចាស់ឈ្មោះ យ៉ង់ ពៅ ភេទស្រី អាយុ៦៨ឆ្នាំ ត្រូវជាម្តាយ មុខរបរមើលថែកូនឲ្យគេ និងកូនស្រីឈ្មោះហួ ចន្ធី អាយុ២៩ឆ្នាំ មុខរបរកម្មការិនីរោងចក្រកាត់ដេរ ។ ចំណែកទ្រព្យសម្បត្តិនៅក្នុងផ្ទះទាំងប៉ុន្មាន គឺត្រូវភ្លើងឆេះអស់ទាំងស្រុងទៅជាមួយផ្ទះដែរ ប៉ុន្តែពុំទាន់ដឹងថា តើសរុបជាទឹកប្រាក់អស់ចំនួនប៉ុន្មាននៅឡើយទេ? ហើយក៏ពុំបានបណ្ដាលឲ្យមានមនុស្សណាម្នាក់រងរបួសនោះដែរ។
បើតាមស្ត្រីជាម្ចាស់ផ្ទះបាននិយាយទាំងការយំស្រែកផងថា នៅមុនពេលកើតហេតុនោះ គឺគាត់កំពុងស្ថិតនៅខាងក្រោមផ្ទះ ហើយភ្លើងបានចាប់ផ្ដើមឆាបឆេះនៅខាងលើ ពេលនោះគាត់ពុំបានដឹងភ្លាមៗនោះឡើយ។ លុះពេលភ្លើងឆេះដល់១ចំហៀងផ្ទះទៅហើយ ទើបគាត់ដឹង ហើយអ្វីៗគឺហួសពេលអស់ទៅហើយ ហើយអ្នកជិតខាងក៏បានជួយពន្លត់ដែរ តែមិនអាចពន្លត់ឈ្នះភ្លើងនោះទេ តែមួយប៉ប្រិចភ្នែកប៉ុណ្ណោះ ផ្ទះរបស់គាត់ក៏ត្រូវភ្លើងឆេះអស់។
ស្ត្រីរូបនេះបាននិយាយទៀតថា នៅក្នុងពេលឆោឡោបែបនេះ គាត់មានការតក់ស្លុតខ្លាំងណាស់ ហើយពុំអាចយកទ្រព្យសម្បត្តិអ្វីចេញពីក្នុងផ្ទះនោះបានឡើយ សូម្បីតែបន្តិច ហើយទ្រព្យសម្បត្តិដែលមានទាំងប៉ុន្មានក្នុងផ្ទះក៏ត្រូវអណ្តាតភ្លើងឆាបឆេះអស់រលីង ហើយពេលនេះគាត់គ្មាននៅសល់អ្វីទៀតនោះទេ គឺអស់ហើយ។
បន្ទាប់ពីនិយាយផង ស្រែកយំផង បានមួយសន្ទុះ ដោយសារតែការសោកស្ដាយផ្ទះ និងទ្រព្យសម្បត្តិដែលខំរក ខំសន្សំមកជាយូរ ត្រូវរលាយទៅវិញត្រឹមតែមួយភ្លែតបែបនេះ ធ្វើឱ្យស្ត្រីរងគ្រោះដួលសន្លប់បាត់បង់ស្មារតី គួរឲ្យអាណិតបំផុត។
បើតាមអ្នកភូមិវិញក៏បាននិយាយថា ផ្ទះដែលឆាបឆេះខាងលើនេះ នៅពេលទឹកស្ទឹងជន់ឡើងខ្លាំងកាលពីប៉ុន្មានថ្ងៃមុននេះ ក៏បានទទួលរងនូវការលិចលង់ផងដែរ ពេលនេះទឹកទើបតែស្រកទៅវិញមិនទាន់បានប៉ុន្មានផង ក៏ស្រាប់តែរងគ្រោះដោយសារគ្រោះអគ្គិភ័យបែបនេះទៀត។ ម្យ៉ាងទៀត ដោយសារតែផ្ទះនោះ គឺជាផ្ទះឈើ ទើបអណ្តាតភ្លើងឆេះលឿនខ្លាំងណាស់ ហើយគួបផ្សំនឹងម្ចាស់ផ្ទះដឹងថាផ្ទះត្រូវភ្លើងឆេះយឺតពេលផងនោះ ទើបពុំអាចជួយពន្លត់បានទាន់ពេលឡើយ ។
នៅពេលកើតមានហេតុការណ៍ខាងលើនេះឡើង លោកស្រី គឹម ញ៉ឹប អភិបាលខណ្ឌដង្កោ ក៏បានដឹកនាំមន្ត្រីក្រោមឱវាទចុះទៅកាន់ទីនោះភ្លាមៗ ដើម្បីជួយអន្តរាគមន៍ និងចូលរួមការសោកស្ដាយក្នុងពេលដែលប្រជាពលរដ្ឋរបស់លោកស្រី ជួបនឹងគ្រោះមហន្តរាយភ្លើងឆេះផ្ទះបែបនេះ ។ ចំណែករថយន្តពន្លត់អគ្គិភ័យដែលប្រចាំការនៅសាលាខណ្ឌដង្កោ ក៏បានទៅដល់ចំនួន២គ្រឿងផងដែរ ប៉ុន្តែដោយសារតែរថយន្តអគ្គិភ័យនៅឆ្ងាយផងនោះ ទើបពុំអាចទៅបានទាន់ពេលវេលា ព្រោះថាត្រឹមតែរយៈពេលប្រមាណជាង១០នាទីប៉ុណ្ណោះ ផ្ទះជនរងគ្រោះទាំងមូល រួមជាមួយនឹងទ្រព្យសម្បត្តិនៅក្នុងនោះទាំងអស់ត្រូវអណ្តាតភ្លើងឆាបឆេះអស់ទាំងស្រុងតែម្ដង ហើយរថយន្តពន្លត់អគ្គិភ័យក៏បានបាញ់ទឹកពន្លត់អស់ទឹក១ស៊ីទែន ដើម្បីឲ្យរលត់ទាំងស្រុង កុំឲ្យភ្លើងឆេះរាលដាលដល់ផ្ទះផ្សេងទៀត៕
ចែករំលែកព័តមាននេះ