រាជធានីភ្នំពេញ៖ ទោះបីជាជាប់រវល់នៅក្នុងអំឡុងពេលស្ថានភាពទឹកជំនន់នៅក្នុងភូមិសាស្ត្ររបស់ខ្លួនក្ដី តែនគរបាលខណ្ឌដង្កោ ពុំបានភ្លេចនូវការការពារសន្តិសុខជូនប្រជាពលរដ្ឋនៅក្នុងមូលដ្ឋានឡើយ ។ ការស្រាវជ្រាវបង្ក្រាបបទល្មើសផ្សេងៗ ជាពិសេសអំពើចោរកម្មនៅតែបន្តធ្វើ ហើយជាក់ស្ដែង កម្លាំងនគរបាលព្រហ្មទណ្ឌខណ្ឌដង្កោ បានសហការជាមួយកម្លាំងប៉ុស្តិ៍នគរបាលដង្កោ ដឹកនាំដោយផ្ទាល់ពីសំណាក់លោកវរសេនីយ៍ឯក ជឹម ស៊ីថា អធិការនគរបាលខណ្ឌ បានធ្វើការស្រាវជ្រាវរហូតឃាត់ខ្លួនចោរប្លន់១សម្បុកចំនួន៦នាក់តែម្តង ដែលបានធ្វើសកម្មភាពកា.ប់ប្លន់យកស្លាកលេខម៉ូតូអស់ជាច្រើនគ្រឿងមកហើយ។
ការចាប់ខ្លួនខាងលើនោះ បានធ្វើឡើងកាលពីថ្ងៃទី២៧ ខែតុលា ឆ្នាំ២០២១ វេលាម៉ោង១៩យប់ ស្ថិតនៅក្នុងសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ។
ជនសង្ស័យខាងលើនេះ រួមមាន ៖ ១- ឈ្មោះ បាន ពេជ្រ ហៅ ទូ ភេទប្រុស អាយុ១៨ឆ្នាំ ២- ឈ្មោះ វ៉ាន់ លីវ៉ាយ ភេទប្រុស អាយុ១៨ឆ្នាំ ៣- ឈ្មោះ ភី វិបុល ហៅ បឿន ភេទប្រុស អាយុ១៨ឆ្នាំ ៤- ឈ្មោះ ធូ ចាន់រិទ្ធិសែម ភេទប្រុស អាយុ១៨ឆ្នាំ ៥- ឈ្មោះ គង់ កុសល ភេទប្រុស អាយុ១៨ឆ្នាំ និង៦- ឈ្មោះ ឈៀង សីហា ភេទប្រុស អាយុ១៨ឆ្នាំ។ នគរបាលក៏បានដកហូតម៉ូតូម៉ាកស៊ុយហ្ស៊ុយគីនិច ពណ៌លឿងលាយ.ស ពាក់ស្លាកលេខភ្នំពេញ 1FI-2877 មួយគ្រឿង, ម៉ូតូម៉ាកហុងដាសេ១២៥ ពណ៌ខ្មៅ គ្មានស្លាកលេខ១គ្រឿង និងទូរស័ព្ទដៃចំនួន០៣គ្រឿងផងដែរ។ ចំណែកជនរងគ្រោះមាន២នាក់ ក្នុងនោះ ១-ឈ្មោះ សាត សំណេត ភេទប្រុស អាយុ១៦ឆ្នាំ និង២- ឈ្មោះ យ៉ាន យ៉ាន់ ភេទប្រុស អាយុ១៧ឆ្នាំ ដែលបានជិះម៉ូតូ០១គ្រឿងម៉ាកហុងដាសេ១២៥ ពណ៌ខ្មៅ ស៊េរីឆ្នាំ២០១៦ ពាក់ស្លាកលេខភ្នំពេញ 1BK-8868 ។
បើតាមនគរបាលបានប្រាប់ថា កាលពីថ្ងៃទី២៥ ខែតុលា ឆ្នាំ២០២១ វេលាម៉ោង៥ល្ងាច ជនរងគ្រោះបានឌុបគ្នាទៅលេងបាល់ទះនៅតារាងបាល់ហ្គាឡាក់ស៊ី ស្ថិតនៅតាមផ្លូវបេតុង ភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។ លុះពេលទៅដល់ចំណុចខាងលើ ក៏ត្រូវបានជនសង្ស័យមួយក្រុមនោះជិះម៉ូតូចំនួន០៤គ្រឿងទៅដល់ រួចក៏យកកាំបិតប៉័ងតោរត់សំដៅចូលទៅកា.ប់ជនរងគ្រោះឈ្មោះ យ៉ាន យ៉ាន់ បណ្ដាលឲ្យរងរបួសត្រង់ចង្កេះផ្នែកខាងក្រោយ ចំហៀងខាងស្តាំ (របួសធ្ងន់) ។
នគរបាលបន្តថា ក្រោយមកជនសង្ស័យកា.ប់ជនរងគ្រោះឈ្មោះ សាត សំណេត រងរបួសស្មាខាងស្តាំមួយកាំបិត (របួសស្រាល) បន្ទាប់មកទៀត ក៏បានកា.ប់យកស្លាកលេខម៉ូតូ ភ្នំពេញ 1BK-8868 របស់ជនរងគ្រោះឈ្មោះ សាត សំណេត រួចជិះគេចខ្លួនបាត់ស្រមោល។
ប្រភពដដែលបានបន្តទៀតថា បន្ទាប់មកកម្លាំងនគរបាលប៉ុស្តិ៍ដង្កោ និងនគរបាលព្រហ្មទណ្ឌខណ្ឌដង្កោ បានចុះទៅអន្តរាគមន៍នាំជនរងគ្រោះទាំង០២នាក់ទៅព្យាបាលនៅគ្លីនិកឯកជនសួគ៌ា ព្រមទាំងធ្វើការស្រាវជ្រាវ រហូតដល់ថ្ងៃទី២៧ ខែតុលា ឆ្នាំ២០២១ វេលាម៉ោង១៩យប់នេះ ទើបឈានដល់ការឃាត់ខ្លួនជនសង្ស័យបានចំនួន០៦នាក់ជាបន្តបន្ទាប់ នៅក្នុងភូមិសាស្ត្រសង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ រួចក៏នាំយកទៅធ្វើការសាកសួរនៅអធិការដ្ឋាននគរបាលខណ្ឌដង្កោ ដើម្បីចាត់ការតាមច្បាប់។
ប្រភពខាងលើ បានបញ្ជាក់ថា ក្រោយសាកសួរជនសង្ស័យបានសារភាពថា ធ្លាប់បានធ្វើសកម្មភាពកា.ប់ប្លន់យកស្លាកលេខ បានជាច្រើនគ្រឿងមកហើយ ដើម្បីយកទៅលក ជាក់ស្ដែងលើកទី១ នៅថ្ងៃទី១២ ខែតុលា ឆ្នាំ២០២១ វេលាម៉ោង១៣រសៀល បានកា.ប់ឈ្មោះ ធីវ ចាន់រតនៈ ភេទប្រុស អាយុ១៦ឆ្នាំ ប្លន់យកស្លាកលេខម៉ូតូ១បន្ទះ ដែលមានលេខ ភ្នំពេញ 1CB-5670។ ព្រមទាំងកា.ប់បំផ្លាញម៉ូតូរបស់ជនរងគ្រោះម្នាក់ទៀត ឈ្មោះ ភ័ក្ត្រ សុផាត់ ភេទប្រុស អាយុ១៩ឆ្នាំ បណ្ដាលឲ្យខូចខាតទាំងស្រុង។សកម្មភាពនេះ ធ្វើឡើងនៅត្រង់ចំណុចផ្ទះលេខ៣៥ ផ្លូវលេខ១៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ ។
លុះលើកទី០២ នៅថ្ងៃទី២៣ ខែតុលា ឆ្នាំ២០២១ វេលាម៉ោង១៧និង១០នាទី បានធ្វើសកម្មភាពកា.ប់បំផ្លាញម៉ូតូម៉ាកស៊ុយហ្ស៊ុយគីនិច ពណ៌ស ពាក់ផ្លាកលេខ ភ្នំពេញ1IY-5167 ជាកម្មសិទ្ធិរបស់ឈ្មោះ ទ្រី សុគន្ថា ភេទប្រុស អាយុ២២ឆ្នាំ ត្រង់ចំណុចផ្ទះលេខ៧២ ផ្លូវលេខ៧ បុរីពិភពថ្មី ស្ថិតនៅភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ៕
ចែករំលែកព័តមាននេះ