រាជធានីភ្នំពេញ ៖ តារាសម្តែង ពិធីករ និងតារាចម្រៀងជាច្រើនដួងបានជួបជុំគ្នាច្រៀងរាំ ដើម្បីអបអរពិធីបុណ្យចូលឆ្នាំថ្មី ប្រពៃណីជាតិខ្មែរ ក្នុងភាពសប្បាយរីករាយ ។ កម្មវិធីនេះរៀបចំដោយសមាគមទូរទស្សន៍កម្ពុជា
រាជធានីភ្នំពេញ ៖ តារាសម្តែង ពិធីករ និងតារាចម្រៀងជាច្រើនដួងបានជួបជុំគ្នាច្រៀងរាំ ដើម្បីអបអរពិធីបុណ្យចូលឆ្នាំថ្មី ប្រពៃណីជាតិខ្មែរ ក្នុងភាពសប្បាយរីករាយ ។ កម្មវិធីនេះរៀបចំដោយសមាគមទូរទស្សន៍កម្ពុជា កាលពីថ្ងៃទី២៩ មីនា ឆ្នាំ២០១៦ នៅស្ថានីយទូរទស្សន៍អាស៊ីអាគ្នេយ៍ ។
ក្រុមការងារសមាគមទូរទស្សន៍ប្រាប់អ្នកយកព័ត៌មានកោះសន្តិភាពថា មិនខុសពីបណ្តាឆ្នាំមុនៗទេ សមាគមទូរទស្សន៍ដែលមានប្រមាណ១៨ស្ថានីយនៅទូទាំងកម្ពុជា បានរៀបចំការសម្តែងអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ។ សិល្បករ-សិល្បការិនីទាំងនោះរំលេចដោយសម្លៀកបំពាក់ស្រស់ស្អាតស្តែងឲ្យឃើញពីលក្ខណៈប្រពៃណីជាតិខ្មែរ ដូចជាហូល ផាមួង អាវប៉ាក់ ដែលនេះជាអត្តសញ្ញាណជាតិខ្មែរយើងសម្រាប់រដូវបុណ្យទាន ។ សិល្បករ ម្នាក់ៗគ្រងសម្លៀកបំពាក់ ប្លែកៗគ្នាយ៉ាងប្រណីតបញ្ជាក់ពីភាពប៉ិនប្រសប់រចនារបស់ជាងកាត់ដេរខ្មែរយើងផងដែរ ។
ក្រុមការងារបានលើកទម្រង់សិល្បៈជាច្រើនទាំងបុរាណ និងសម័យ ដូចជាការរាំរបាំជូនពរចាប៉ីដងវែង ព្រមទាំងការរាំកម្សាន្តចង្វាក់ខ្មែរយើងដូចជារាំវង់ ឡាំលាវ និងកន្ទ្រឹមជាដើមកំដរបរិយាកាសឆ្នាំថ្មីឲ្យកាន់តែសប្បាយរីក រាយ ។ កាន់តែពិសេសមានអ្នកសិល្បៈជាច្រើនដួងទាំងចាស់ទាំងថ្មីចាប់គូគ្នាសម្តែងដើម្បីធ្វើឱ្យបរិយាកាសកាន់តែពិសេសឡើង ។ «ក្នុងឱកាសបុណ្យចូលឆ្នាំខ្មែររយៈពេល៤ថ្ងៃ ចាប់ពីថ្ងៃទី១៣ដល់១៦មេសាខាងមុខ ទស្សនិកជនទាំងអស់សូមតាមដានទស្សនាផ្ទាំងទស្សនីយភាពសិល្បៈផលិតដោយសមាគមទូរទស្សន៍កុំបីខាន ព្រោះមានឈុតឆាកសម្តែង និងចម្រៀងជាច្រើនរៀបចំទុកចាក់ផ្សាយរួចជាស្រេច ដើម្បីបានសប្បាយទាំងអស់គ្នាក្នុងពេលជួបជុំសាច់ញាតិសន្តានក្នុងឆ្នាំថ្មី» ។ ក្រុមការងារនិយាយបែបនេះ ។
អ្នកសិល្បៈចូលរួមនាឱកាសនោះ មានដូចជាលោកយ៉ែម សំអូន, អេឡិច ចិន្ត្រា, អ្នកស្រីហ៊ឹម ស៊ីវន, លោកលាង ឧត្តម, លោកអុឹម ជីវ៉ា, លោកនី រតនា, លោកសយ រតនៈ, លោកហួរ ឡាវី, កញ្ញាសូដានីតា, កញ្ញាអាវីហ្សា, កញ្ញាវី ឌីណែត, កញ្ញាចំរើន សុភ័ក្រ, កញ្ញាបាន មុនីលក្ខ័, កញ្ញាបរមី, កញ្ញាស្រីរត្ន័, ពិធីការិនីជីជី, លោកសាយ រតនៈ, លោកគន់ រៀមរតនៈ, អ្នកនាងសួន ចន្ថា, អ្នកនាងកែវ ច័ន្ទសម្ជស្ស, ឌីជេរស្មី, កញ្ញាឈិត សុជាតា, កញ្ញាឡេង ជូលី, កញ្ញាឌី សូនីតា, កញ្ញាហ៊ិន ច័ន្ទនិរត្ន័, កញ្ញាស៊ិន នារីរត្ន័, លោកជា សុវណ្ណារិទ្ឋិ, កញ្ញាព្រះកាយច័ន្ទ, លោកសុធា ពិសិដ្ឋ, លោកអេឡិច ហ្សូរ៉ា, និងលោកចន ច័ន្ទតារា ជាដើម ៕
ចែករំលែកព័តមាននេះ