បង្កើតភូមិថ្មីមួយទៀត ឈ្មោះ «ភូមិព្រៃតាឡូញ» នៅខេត្តបាត់ដំបង
- ភ្នំពេញ
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសម្រេចបង្កើតភូមិមួយទៀត នៅក្នុងខេត្តបាត់ដំបង ឈ្មោះ «ភូមិព្រៃតាឡូញ»។…
ភ្នំពេញ៖ សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានសម្រេចបង្កើតភូមិមួយទៀត នៅក្នុងខេត្តបាត់ដំបង ឈ្មោះ «ភូមិព្រៃតាឡូញ»។ សេចក្ដីសម្រេចនេះ ចេញនៅថ្ងៃទី២២ ខែតុលា ឆ្នាំ២០២១។
តាមសេចក្ដីសម្រេច «ភូមិព្រៃតាឡូញ» បំបែកចេញពីភូមិទំនប់ទឹក ភូមិកំពង់ឆ្នាំង១ និងភូមិស្ទឹងដាច់ នៃឃុំបវេល ស្រុកបវេល ខេត្តបាត់ដំបង។
កាលពីថ្ងៃទី២០ ខែសីហា ឆ្នាំ២០២១ រាជរដ្ឋាភិបាល បានចេញអនុក្រឹត្យ ដាច់ដោយឡែកពីគ្នា ចំនួន ៦ ស្តីពី ការសម្រេចបង្កើតឃុំសង្កាត់ថ្មី ចំនួន ៦ឃុំសង្កាត់។ ឃុំសង្កាត់ថ្មីទាំង ៦ រួមមាន៖ ១-ឃុំបួវិល ក្នុងស្រុកបវេល ខេត្តបាត់ដំបង ២-ឃុំយាយម៉ៅពេជ្រនិល ក្នុងស្រុកភ្នំស្រួច ខេត្តកំពង់ស្ពឺ ៣-ឃុំអូរកណ្តៀរសែនជ័យ ក្នុងស្រុកសំបូរ ខេត្តក្រចេះ ៤-ឃុំបុស្បូវ ក្នុងស្រុកព្រះនេត្រព្រះ ខេត្តបន្ទាយមានជ័យ ៥-សង្កាត់អូរជ្រៅ ក្នុងក្រុងប៉ោយប៉ែត ខេត្តបន្ទាយមានជ័យ និង៦-សង្កាត់អូរឬស្សី ក្នុងក្រុងប៉ោយប៉ែត ខេត្តបន្ទាយមានជ័យ។
ការបំបែក ឬបង្កើតរដ្ឋបាលភូមិឃុំសង្កាត់ថ្មីៗនេះ ត្រូវបានផ្អែកលើកត្តា២ គឺកត្តាប្រជាសាស្ត្រ និងភូមិសាស្ត្រ ក្នុងន័យដើម្បីឱ្យការបំរើសេវាសាធារណៈ ជូនពលរដ្ឋបានកាន់តែល្អប្រសើរ។
នៅកម្ពុជា បានរៀបចំការបោះឆ្នោតឃុំសង្កាត់ លើកដំបូង កាលពីថ្ងៃទី៣ ខែកុម្ភៈ ឆ្នាំ២០០២។ កាលណោះ កម្ពុជា មាន ១៦២១ឃុំសង្កាត់។ ក្នុងការបោះឆ្នោតឃុំសង្កាត់ អាណត្តិទី២ នៅឆ្នាំ២០០៧ ចំនួនឃុំសង្កាត់ ត្រូវបានរក្សាទុកដដែល គឺ១៦២១ឃុំសង្កាត់។ ចំណែកការបោះឆ្នោតឃុំសង្កាត់ អាណត្តិទី៣ នៅឆ្នាំ២០១២ កើនដល់ ១៦៣៣ឃុំសង្កាត់។ នៅឆ្នាំ២០១៧ កើនឡើងដល់ ១៦៤៦ឃុំសង្កាត់។
ចំណែកនៅឆ្នាំ២០២២ ការបោះឆ្នោតឃុំសង្កាត់ អាណត្តិទី៥ ដែលនឹងធ្វើឡើង នាថ្ងៃទី៥ ខែមិថុនា ឃុំសង្កាត់ ត្រូវកើនឡើងដល់ ១៦៥២ឃុំសង្កាត់ គឺកើនឡើង ៦ឃុំសង្កាត់៕
ចែករំលែកព័តមាននេះ