WHO ព្រមានថា ការរាតត្បាតកូវីដនឹងអូសបន្លាយដល់ឆ្នាំ២០២២ ខណៈប្រទេសក្រីក្រជាច្រើនមិនទទួលបានវ៉ាក់សាំង
WHO ៖ អង្គការសុខភាពពិភពលោក (WHO) បាននិយាយថា ការរាតត្បាតរបស់ជំងឺកូវីដ ១៩នឹងបន្តកើតមានមួយឆ្នាំទៀត
WHO ៖ អង្គការសុខភាពពិភពលោក (WHO) បាននិយាយថា ការរាតត្បាតរបស់ជំងឺកូវីដ ១៩នឹងបន្តកើតមានមួយឆ្នាំទៀត ដោយសារតែប្រទេសក្រីក្រជាច្រើនមិនបានទទួលវ៉ាក់សាំងដែលពួកគេត្រូវការឡើយ។
លោកវេជ្ជបណ្ឌិត Bruce Aylward មេដឹកនាំជាន់ខ្ពស់នៅអង្គការនេះនិយាយថា វាមានន័យថាវិបត្តិកូវីដ ១៩អាចនឹងអូសបន្លាយដល់ឆ្នាំ ២០២២។
ការព្រមានរបស់លោកកើតឡើងដោយសារតែប្រជាជននៅទ្វីបអាហ្វ្រិចតិចជាង ៥ភាគរយទទួលបានវ៉ាក់សាំង ធៀបទៅនឹង ៤០ភាគរយសម្រាប់ប្រជាជនក្នុងទ្វីបដទៃ។
ចក្រភពអង់គ្លេសបានផ្តល់វ៉ាក់សាំងចំនួន ១០លានទៅដល់ប្រទេសដែលកំពុងត្រូវការ។ អង់គ្លេសសន្យាផ្តល់វ៉ាក់សាំងចំនួន ១០០លានដូស។
លោក Bruce Aylward បានអំពាវនាវទៅដល់ប្រទេសអ្នកមានបោះបង់ចោលការកុម្ម៉ង់ខ្លះដើម្បីឲ្យក្រុមហ៊ុនផលិតឱសថផ្តល់អាទិភាពទៅដល់ប្រទេសមានក្រីក្រវិញ។
អង្គការមនុស្សធម៌ឈ្មោះ The People’s Vaccine បានបញ្ចេញតួលេខថ្មីថា មានតែមួយដូសប៉ុណ្ណោះក្នុងចំណោម ៧ដូសដែលសន្យាដោយក្រុមហ៊ុនឱសថ និងប្រទេសអ្នកមានបានទៅដល់គោលដៅពួកគេក្នុងប្រទេសក្រីក្រ។
វ៉ាក់សាំងភាគច្រើនត្រូវបានគេផ្តល់ឲ្យប្រទេសមានប្រាក់ចំណូលខ្ពស់ ឬប្រទេសមានប្រាក់ចំណូលមធ្យមកម្រិតខ្ពស់។ ប្រទេសនៅទ្វីបអាហ្វ្រិចដែលទទួលបានវ៉ាក់សាំងមានប្រមាណ ២,៦ភាគរយប៉ុណ្ណោះ។
ក្រុមអង្គការសម្បុរសធម៌មានដូចជា Oxfam និង UNAids ក៏បានរិះគន់ប្រទេសកាណាដា និងអង់គ្លេសផងដែរ ចំពោះការផ្តល់វ៉ាក់សាំងសម្រាប់តែប្រជាជនពួកគេតាមរយៈអង្គការ Covax ដែលជាកម្មវិធីសកលដើម្បីចែកចាយវ៉ាក់សាំងដោយស្មើភាព។
តួលេខផ្លូវការបានបង្ហាញថា ដើមឆ្នាំនេះ ចក្រភពអង់គ្លេសទទួលបានវ៉ាក់សាំងប្រភេទ Pfizer ចំនួន ៥៣៩.៣៧០ដូស ខណៈកាណាដាទទួលបានវ៉ាក់សាំង AstraZeneca តិចជាង ១លានដូស។
សូមរម្លឹកថា វីរុសកូវីដ ១៩ បានផ្ទុះដំបូងកាលពីចុងឆ្នាំ ២០១៩ ចេញពីប្រទេសចិន និងបានរាតត្បាតយ៉ាងលឿនទូទាំងពិភពលោក។ រហូតមកដល់ពេលនេះ វីរុសមរណៈនេះបានឆក់យកជីវិតមនុស្ស ៤,៩១លាននាក់ និងឆ្លងទៅកាន់មនុស្សជាង២៤២លាននាក់ទូទាំងពិភពលោក៕ (យោងតាមប្រភព៖ BBC)
ចែករំលែកព័តមាននេះ