រាជធានីភ្នំពេញ ៖ រហូតមកទល់ពេលនេះ រលកកំដៅនៃការវាយប្រហារដោយពាក្យសម្តីដាក់គ្នារវាងកញ្ញា លីវ ជីលី និងអ្នកឆ្នៃម៉ូតមួយរូប ហាក់នៅមិនទាន់ស្ងប់នៅឡើយទេ ក្នុងពេលដែលអ្នកទាំងពីរបានបកស្រាយរកភាពត្រឹមត្រូវដូចគ្នា។
អ្នកច្នៃម៉ូតហាក់មិនស្ងប់អារម្មណ៍ និងស្ងប់ចិត្តនៅឡើយទេ ក្នុងពេលដែល Miss Grand Cambodia 2020 កញ្ញា លីវ ជីលី បានផ្តល់ប្តូរឈុតដែលខ្លួនត្រៀមបម្រុងរួចជាស្រេចសម្រាប់នាងស្លៀកឡើងឆាកកម្មវិធីប្រលងវគ្គផ្តាច់ព្រ័ត្រ MGC2021 ដែលបានបញ្ចប់ទៅកាលពីពេលថ្មីៗនេះ។ អ្នកច្នៃម៉ូតរូបនេះ បានចាត់ទុកការសម្រេចផ្លាស់ប្តូរឈុតរបស់ខ្លួនភ្លាមៗពី លីវ ជីលី គឺជាចេតនារបស់នាងផ្ទាល់ ពោលគឺមិនមែនជារឿងអចេតនាដែលនាងមិនចង់ធ្វើនោះឡើយ។
អ្នកច្នៃម៉ូប្រចាំហាង zuperior ឈ្មោះ ជានិច គង់ បានអះអាងប្រាប់កោះសន្តិភាពតាមសារអេឡិចត្រូនិចថា លោកនៅមិនអស់ចិត្តនៅពេលដែល លីវ ជីលី បានផ្លាស់ប្តូរមិនស្លៀកឈុតដែលខ្លួនបានព្រមព្រៀងគ្នា សម្រាប់ឡើងឆាកកម្មវិធី MGC វគ្គផ្តាច់ព្រ័ត្រ។
លោកបញ្ជាក់ថា កាលពីដំបូង គាត់មកសុំឈុតខ្ញុំពេលទៅប្រលងនៅថៃ ខ្ញុំបដិសេធរួចម្តងហើយ រហូតដល់លើកទី២ ជិតដល់ថ្ងៃផ្ទេរម្កុដ គាត់ក៏មកពឹងពាក់ខ្ញុំម្តងទៀត។ លោកថា ខ្ញុំក៏សម្រេចថាជួយ ប៉ុន្តែបានបញ្ជាក់ និងព្រមព្រៀងគ្នារួចហើយថា លុះត្រាតែឈុតខ្ញុំប្រើសម្រាប់ដើរលើឆាក លាតំណែង ទើបខ្ញុំធ្វើអោយ។ ស្រាប់តែដល់ថ្ងៃ គាត់ប្រើឈុតរបស់គេផ្សេងទៅវិញ ហើយប្រើលេសថារ៉ូបរបស់ខ្ញុំពិបាកដើរ ទាំងដែលការពិត ពេលដែលនៅជាមួយខ្ញុំ គាត់ថាស្រួលដើរណាស់បង អត់មានពិបាកដើរទេ ។ យ៉ាងណាបើតាមលោក ជានិច គង់ ថា រឿងបន្តខ្ញុំកំពុងរៀបចំ ប៉ុន្តែពុំអាចប្រាប់បាន ព្រោះគាត់ធ្វើឡើងដោយចេតនា មិនមែនអចេតនា។
ដោយពាក់ព័ន្ធករណីខាងលើនេះ កញ្ញា លីវ ជីលី ក៏បកស្រាយប្រាប់កោះសន្តិភាពតាមសារអេឡិចត្រូនិចដែរថា សម្រាប់ឈុតរបស់គាត់នោះ នាងបានស្នើសុំអោយគាត់ Sponsor អោយនាងសម្រាប់កម្មវិធីវគ្គ Final នេះ ហើយគាត់ក៏ ok និងសន្យានឹងធ្វើអោយនាងនឹងក្លាយជាព្រះនាង (Queen) នៅក្នុងកម្មវិធីនេះ។
នាងបញ្ជាក់ថា ពេលនោះនាងបានស្នើសុំអោយគាត់ផ្ញើម៉ូតនោះមកអោយនាងមើល តែគាត់មិនព្រម ព្រោះនាងចង់ដឹងម៉ូតនោះអាចស្លៀកបាន ឬមិនបាន ចាំគិតក្រោយទៀត។ នាងថា ពេលកាត់រួចនាងក៏បានលសាកល្បងដែល ពេលនោះនាងមិនបានពាក់ស្បែកជើងកែងចោទនោះឡើយ។ លុះដល់ថ្ងៃប្រកួតនាងបានស្លៀកសាកល្បងនៅក្រោមឆាក ហើយឃើញរ៉ូបនោះវានៅប្រឡោះជើងដែលដើរទៅជាន់ និងអាចធ្វើអោយនាងដួល ហើយទាមទារអោយកាត់បន្ថែម។
លីវ ជីលី បន្ថែមថា ក្រោយមានបញ្ហាខាងលើនេះ នាងបានប្រាប់ទៅអ្នកច្នៃម៉ូតអោយនាងពីការមិនបានស្លៀករ៉ូបនោះឡើយ ខណៈពេលដែលនាងបានធ្វើការសុំទោស និងបញ្ជាក់ពីមូលហេតុផ្សេងៗដែលនាងមិនបានអាចស្លៀកឈុតនេះបានឡើយ។
យ៉ាងណា បើតាម លីវ ជីលីថា បើទោះបីជានាងបានពន្យល់ហេតុផលទាំងនេះក៏ដោយ ក៏អ្នកច្នៃម៉ូតនោះមិនបានទទួលយក និងស្តាប់ហេតុផលរបស់នាងនោះឡើយ។ នាងបញ្ជាក់ថា គាត់នៅមិនព្រមស្តាប់ គាត់នៅតែចង់អោយយើងពាក់ឈុតគាត់ឡើងឆាកទើបគាត់អស់ចិត្ត ខុសពីម្ចាស់ Sponsor ផ្សេងទៀត ដែលគេមិនគិតបែបនេះឡើយ សំខាន់អោយតែបានពាក់ឈុតរបស់គេ។
នាងថា ប្រសិនបើឈុតគាត់ពាក់បាន នាងនឹងពាក់មិនចោលឡើយ តែនេះនាងពាក់មិនកើត ព្រោះខ្លាចមានបញ្ហា តែគាត់មិនស្តាប់ហេតុផលយើងឡើយ។ ទោះជាយ៉ាងណា លីវ ជីលី បានចាត់ទុករឿងនេះ គឺជាការតូចមួយប៉ុណ្ណោះ ប៉ុន្តែអ្នកច្នៃម៉ូតនោះបានពង្រីកអោយទៅជាធំ និងបានអោយអ្នកផ្សេងបង្ហោះរឿងរ៉ាវនេះ ដែលធ្វើអោយខូចកិត្តិយសរបស់នាង។
គួររំលឹកថា ៖ ផ្ទុះសង្គ្រាមរវាង ស្រីស្អាត លីវ ជីលី និងអ្នកច្នៃម៉ូត បោះពាក្យសម្តីយ៉ាងចាក់ដោត ៕
ចែករំលែកព័តមាននេះ