ខេត្ដកំពង់ចាម ៖ កសិករម្នាក់ឈ្មោះហាន ហេង អាយុ៤៤ឆ្នាំ រស់នៅភូមិម៉ាស៊ីនស្រូវ ឃុំបឹងព្រួល ស្រុកត្បូងឃ្មុំ បានចុះស្ដារអណ្ដូង នៅចំហៀងខាងមុខផ្ទះដែលមានជំរៅ៩ម៉ែត្រ កាលពីវេលាម៉ោង៨ និង៣០ នាទីព្រឹកថ្ងៃទី២១ ឧសភា ព្រមទាំងយកម៉ាស៊ីនបូមទឹកដាក់នៅបាតអណ្ដូងថែមទៀតដើម្បីបញ្ឆេះបូមទឹកចេញ ហើយផ្សែងបានហុយខ្មួលខ្មាញ់បណ្ដាលឱ្យឈ្លក់សន្លប់ ប៉ុន្ដែភ្លាមៗនោះបានបងប្អូនអ្នកភូមិ២នាក់នាំគ្នាចុះសង្គ្រោះចងទាញឡើងមកលើរួចផុតពីគ្រោះ ថ្នាក់ដល់អាយុជីវិត ។បុរសរងគ្រោះរូបនេះបាននិយាយថា នាព្រឹកនោះដោយឃើញអណ្ដូងទឹកនៅមុខផ្ទះល្អក់កករនោះ ទើបរូបគាត់ដាក់ខ្សែរ៉ក ចងទំលាក់ចុះស្ដារតែម្នាក់ឯង ហើយអ្នកផ្សេងទៀតនៅខាងលើចាំទាញយកភក់ចេញចាក់ចោលក្បែរមាត់អណ្ដូង ។
គាត់បានដាក់ម៉ាស៊ីនដើម្បីបូមទឹកអណ្ដូងចេញបានប្រហែល១៥នាទីប៉ុណ្ណោះ ទឹកអណ្ដូងក៏រីង អស់ហើយគាត់ចាប់ផ្ដើមស្ដារភក់ជាបណ្ដើរៗ បានជិត១០ប៉ោត ក៏ងងឹតមុខទន់ដៃទន់ជើង និយាយមិនកើត ។ ចំណែកអ្នកនៅលើមាត់ អណ្ដូងស្រែកហៅមិនឮ ភ្លាមៗនោះមានមនុស្ស២នាក់ គឺឈ្មោះស្រ៊ាង អូន និងឈ្មោះ គឹម ស្រ៉ី បានប្រញាប់ប្រញាល់នាំគ្នាជួយជាបន្ទាន់ ដោយយកក្រមាចងទាញឡើងមកលើ ឯគាត់ក៏សន្លប់ប្រហែល៣០នាទី ប៉ុន្ដែក្រោមការជួយជ្រោមជ្រែងពីសំណាក់បងប្អូនជាអ្នកភូមិផងរបងជាមួយគាត់ក៏បានរួចផុតពីគ្រោះថ្នាក់ដល់អាយុជីវិត ។
ស្ដ្រីឈ្មោះស៊ាន ញុល ជាប្រពន្ធរបស់ជនរងគ្រោះបានប្រាប់ថា ខណៈគាត់កំពុងអង្គុយនៅក្រោមផ្ទះចងសន្លឹកថ្នាំជក់នាព្រឹកថ្ងៃ ទី២១ ឧសភា នោះស្រាប់តែមានការភ្ញាក់ផ្អើល និងមានមនុស្សពេញណែននៅខាងមុខផ្ទះរបស់គាត់ ព្រោះតែប្ដីដែលចុះទៅស្ដារអណ្ដូងបានសន្លប់ ។ គ្រាន់តែឃើញបែបនេះគាត់បានស្រែកទ្រហោយំយ៉ាងខ្លាំង ឯប្ដីរបស់គាត់បានបងប្អូនអ្នកជិតខាងជួយកោសរឺត និងធ្វើចលនាបេះដូងចុះឡើងៗរយៈពេលជិត៣០នាទី ទើបបានដឹងខ្លួនឡើងវិញ ។អណ្ដូងទឹកនេះ ត្រូវបានប្ដីគាត់ចុះជីក រយៈពេល៣ឆ្នាំមកហើយ និងបច្ចុប្បន្នមានប្រជាពលរដ្ឋរស់នៅជុំវិញជិត២០គ្រួសារប្រើប្រាស់ទឹកអណ្ដូងនេះ ។ លុះខណៈជួប គ្រោះថ្នាក់ស្ទើរតែស្លាប់បាត់បង់អាយុជីវិតបែបនេះ នាពេលក្រោយៗទៀតគាត់នឹង មិនឱ្យប្ដីរបស់គាត់ចុះស្ដារអណ្ដូងទៀតឡើយ ។
ចំណែកបុរសរងគ្រោះបាននិយាយថា ពិតជាសំណាងណាស់ ដែលបានអ្នកភូមិនាំគ្នាសស្រាក់សស្រាំជួយសង្គ្រោះយ៉ាងទាន់ពេលវេលា បើយឺតយ៉ាវតែបន្ដិចនោះ គាត់នឹងត្រូវស្លាប់ជាក់ជាមិនខាន ហើយអណ្ដូងទឹកនេះ គឺនៅពេលដំបូង រូបគាត់ជាអ្នកចុះ ជីកយកទឹកសំរាប់ប្រើប្រាស់ ។លោកហ៊ាន ម៉េងស្រ៉ីន នាយប៉ុសិ៍្ដរដ្ឋបាល ឃុំទ្រៀនបានរំលឹកថា នាពេលកន្លងមកនៅ ភូមិទ្រាន ឃុំទ្រាន ស្រុកកំពង់សៀម ប្រជា ពលរដ្ឋបាននាំគ្នាចុះបូមទឹកអណ្ដូងដោយដាក់ ម៉ាស៊ីនបូមទឹកទៅក្នុងអណ្ដូង ហើយផ្សែង បានហុយពេញក្នុងអណ្ដូង ខ្វះអុកស៊ីហ្សែន ជា ហេតុបណ្ដាលឱ្យពុលស្លាប់ម្នាក់ លុះពេលអ្នក នៅខាងលើនាំគ្នាចុះទៅជួយសង្គ្រោះចុះ បាត់ៗ ស្លាប់រហូតដល់ទៅ៦នាក់ឯណោះ ឯ អ្នកទី៧បំរុងចុះទៅទៀត តែបានអ្នកផ្សេង ជួយឃាត់ទាន់ពេល ។ ចំណែកពិធីបុណ្យសព គំរប់១០០ថ្ងៃក៏បានធ្វើឡើងរួមគ្នាតែម្ដងនារសៀលថ្ងៃទី២២ ឧសភា ឆ្នាំ២០១០ ។
ចែករំលែកព័តមាននេះ