រាជធានីភ្នំពេញ ៖ ចាត់ទុកថា ជារឿងមួយគួរឲ្យចាប់អារម្មណ៍ដោយសារតែតារាចម្រៀងរាងខ្ពស់មុខដូចកូនកាត់ឥណ្ឌាកញ្ញាឈីងឈីង ត្រូវមេកោយរៀបចំពិធីខួបកំណើតជូនដល់ទៅ២ឆ្នាំជាប់គ្នា ។
រាជធានីភ្នំពេញ ៖ ចាត់ទុកថា ជារឿងមួយគួរឲ្យចាប់អារម្មណ៍ដោយសារតែតារាចម្រៀងរាងខ្ពស់មុខដូចកូនកាត់ឥណ្ឌាកញ្ញាឈីងឈីង ត្រូវមេកោយរៀបចំពិធីខួបកំណើតជូនដល់ទៅ២ឆ្នាំជាប់គ្នា ។
តារាចម្រៀងថ្មីរបស់ផលិតកម្មកាលីបកញ្ញាឈីងឈីង ត្រូវអ្នកចាត់ការទូទៅផលិតកម្ម រៀបចំធ្វើខួបកំណើតឱ្យជាលើកទី២កាលពីរាត្រីថ្ងៃទី៣ ខែ មីនា ឆ្នាំ២០១៦ នៅភោជនីយដ្ឋានវីហ្វេន ក្រោមវត្តមានសិល្បករនិងភ្ញៀវកិត្តិយសជិត១០០នាក់ ។
កាលពីអំឡុងខែមីនាឆ្នាំមុន តារាចម្រៀងឈីងឈីងបានរៀបចំកម្មវិធីខួបកំណើតម្តងរួចមកហើយនៅភោជនីយដ្ឋានរហាត់លាភ ។ ជាថ្មីម្តងទៀតឈីងឈីងបានរៀបចំឡើង ក្រោមការខ្សឹបខ្សៀវថា មានការជួយជ្រោមជ្រែងពីមេកោយ ។ ទោះជាយ៉ាងណាក្តី តារាស្រីវ័យ២១ឆ្នាំរូបនេះបដិសេធមិនបកស្រាយទេ ។ ឈីងឈីង និយាយថា ការរៀបចំកម្មវិធីនេះដើម្បីជួបជុំមិត្តរួមអាជីពដែលនាងស្គាល់គ្រាចូលប្រឡូកក្នុងអាជីពសិល្បៈក្នុងរយៈពេលចុងក្រោយនេះ ។ ម្យា៉ងអបអរសាទរការងារសិល្បៈរបស់នាងដែលកាន់តែរីកចម្រើនឡើង ។ សម្រាប់ឱកាសចូលឆ្នាំថ្មីប្រពៃណីជាតិខាងមុខនេះ ឈីងឈីងត្រៀមចេញបទចម្រៀង២បទ គឺបទ «សង្សារខ្ញុំបែកស្លុយ» និងបទ «មានប្តីដែរនៅតែយ៉ាប់» ។
កញ្ញាឈីងឈីង មិនបញ្ជាក់អំពីការចំណាយលើការរៀបចំពិធីខួបកំណើតនេះទេ ខណៈមិនទាន់សរុបអំពីការចំណាយ ផ្សេងៗប៉ុន្តែនាងពិតជារីករាយដែលបានជួបជុំសិល្បករជាច្រើនបង្ហាញពីការរាប់អាន និងបង្ហាញការរីកចម្រើននៃការងារសិល្បៈរបស់នាង ។
ឈីងឈីង មានទំនុកចិត្តថា នៅពេលខាងមុខនាងអាចលេចធ្លោជាងនេះ ស្របពេលផលិតកម្មកាលីបមានវិធីសាស្ត្រល្អក្នុងការវាយលុកទីផ្សារចម្រៀងសម្រាប់នាង ។ ហេតុនេះហើយទើបឈីងឈីងចាប់អាជីពជាអ្នកចម្រៀងពេញទំហឹង ស្របពេលដែលផលិតកម្មកាលីបផ្តល់ឱកាសឱ្យនាងធ្វើជាតារាចម្រៀងប្រចាំផលិតកម្ម ។ក្រៅពីការច្រៀងឈីងឈីង ក៏កំពុងតែរីកចម្រើនលើការងារបង្ហាញម៉ូដផងដែរ បើទោះបីជានាងមិនចូលក្នុងក្រុមម៉ូដែលធំៗក៏ដោយ ។
ចំពោះរឿងរ៉ាវស្នេហាវិញតារាចម្រៀងឈីងឈីង បញ្ជាក់ថា នាងមិនទាន់មានគូកំណាន់ចិត្តនៅឡើយ ហើយនាងចង់ប្រឡូកនឹងការងារសិល្បៈឲ្យបានច្រើនជាងនេះ ។ ទោះជាយ៉ាងណាក្តី អ្នកក្នុងចង្កោមសិល្បៈលើកឡើងថាឈីងឈីងទទួលបានការយកចិត្តទុកដាក់ជាពិសេសពីអ្នកចាត់ការទូទៅរបស់ផលិតកម្ម ដែលសូម្បីតែការរៀបចំខួបកំណើតក៏បុរសម្នាក់នោះរៀបចំឱ្យ៕
ចែករំលែកព័តមាននេះ