រាជធានីភ្នំពេញ ៖ បុគ្គលិកណាហ្គាវើលបានឧបត្ថម្ភ និងចែកអង្ករចំនួន១តោនដល់មណ្ឌលកុមារកំព្រាចំនួន១១ ក្នុងរាជធានីភ្នំពេញក្នុងរដូវបុណ្យចូលឆ្នាំចិនឆ្នាំ២០១៦ កាលពីពេលថ្មីនេះៗ ។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា ៖«រដូវបុណ្យទាន គឺតែងតែនិយាយពីការចែករំលែក ។ ក្នុងឱកាសបុណ្យចូលឆ្នាំចិន ឆ្នាំ២០១៦ ណាហ្គាវើលបេះដូងសប្បុរសបានរៀបចំ និងចែកអង្ករចំនួន១តោនដល់មណ្ឌលកុមារកំព្រាចំនួន១១ នៅក្នុងរាជធានីភ្នំពេញ ។ អង្ករដែលបានឧបត្ថម្ភដោយមិត្តរួមការងាររបស់យើងត្រូវបានចែកជូនដល់កុមារកំព្រា និងកុមារក្រីក្រ ។ យើងសូមអរគុណដល់បុគ្គលិកណាហ្គាវើលរបស់យើងដែលបានគាំទ្រកម្មវិធីនេះ ហើយយើងសូមជូនពរកុមារ និងសហការីរបស់យើងទទួលបាននូវភាពជោគជ័យ និងរកស៊ីមានបាននៅឆ្នាំថ្មីនេះ» ។
លោក ចាន់ សារិន នាយកអង្គការជំនួយនៃក្តីសង្ឃឹមសហគមន៍ បានមានប្រសាសន៍ថា ៖«ខ្ញុំសូមអរគុណដល់ណាហ្គាវើលបេះដូងសប្បុរសអស់ពីចិត្តដែលតែងតែមកលេង និងបានគាំទ្រកុមាររបស់យើង ។ កាលបុណ្យណូអែលកន្លងទៅ ពួកគេបានជូនកាដូបុណ្យណូអែលដល់កុមាររបស់យើង ។ ហើយឥឡូវនេះ ពួកគេបានបរិច្ចាគអង្ករដល់មណ្ឌលកុមារកំព្រារបស់យើងទៀត ។ តាងនាមឲ្យនាយកអង្គការជំនួយនៃក្តីសង្ឃឹមសហគមន៍ ខ្ញុំបានប្រគល់វិញ្ញាបនបត្រថ្លែងអំណរគុណដល់ណាហ្គាវើលបេះដូងសប្បុរស ដូចជាការទទួលស្គាល់នូវការរួមចំណែករបស់ពួកគេ ។ យើងសូមជូនពរឲ្យបុគ្គលិក និងក្រុមហ៊ុនណាហ្គាវើលទទួលបានភាពជោគជ័យយ៉ាងត្រចះត្រចង់នាឆ្នាំថ្មីនេះ» ។
លោកស្រី ឃូ សេដ្ឋឈូករ័ត្ន នាយិកាអង្គការដើមឈើរីករាយ បានមានប្រសាសន៍ថា៖«បុណ្យចូលឆ្នាំចិនជាច្រើនឆ្នាំកន្លងមកនេះ យើងមិនដែលបានទទួលការឧបត្ថម្ភអ្វីពីក្រុមហ៊ុនឯកជនដល់កុមាររបស់យើងទេ ។ ឆ្នាំនេះគឺខុសពីឆ្នាំមុន យើងបានទទួលការឧបត្ថម្ភអង្ករពីណាហ្គាវើលបេះដូងសប្បុរស ។ ខ្ញុំមិនដែលរំពឹងថានឹងមាននរណាម្នាក់នឹងមកបំពេញនូវការខ្វះខាតអង្កររបស់យើងឡើយ ។ ខ្ញុំសូមអរគុណព្រះជាម្ចាស់ និងសូមកោតសរសើរចំពោះការចូលរួមចំណែកដែលធ្វើឡើងដោយណាហ្គាវើលបេះដូងសប្បុរសចំពោះពួកយើង ។ យើងសូមជូនពរក្រុមហ៊ុនណាហ្គាវើល និងបុគ្គលិកទាំងអស់ឲ្យរកស៊ីមានបានរីកចម្រើនទៅមុខឆ្នាំថ្មីនេះ និងហេងហេងទាំងអស់គ្នា» ។
អ្នកស្រី ប្រាក់ សុធី ប្រធានមណ្ឌលសមាគមអភិវឌ្ឍន៍គ្រួសារពលី និងកុមារកំព្រា បានមានប្រសាសន៍ថា៖«យើងសូមអរគុណដល់បុគ្គលិកណាហ្គាវើលដែលបានបរិច្ចាគអង្ករដល់អង្គការរបស់យើង ។ នេះមានន័យខ្លាំងណាស់ ពីព្រោះពីមុនមកយើងមិនដែលទទួលបានការឧបត្ថម្ភអ្វីមួយក្នុងរដូវបុណ្យចូលឆ្នាំចិនឡើយ ។ យើងនឹងចងចាំនូវការចូលរួមចំណែកដែលបានធ្វើឡើងដោយបុគ្គលិកណាហ្គាវើលដល់ពួកយើង» ៕
ចែករំលែកព័តមាននេះ