ខ្លាចប្តីដឹងលួចលុយ ប្រើល្បិចថាចោរប្លន់ ផ្អើលដល់សមត្ថកិច្ច
ខេត្តបន្ទាយមានជ័យ ៖ ស្ត្រីម្នាក់ជាប្រពន្ធជំនួយការភូមិដែលថាមានចោរចូលប្លន់ផ្ទះរបស់ខ្លួន ទីបំផុតបានចេញមុខសារភាពពីទោសកំខុសរបស់ខ្លួននៅចំពោះមុខ …
ខេត្តបន្ទាយមានជ័យ ៖ ស្ត្រីម្នាក់ជាប្រពន្ធជំនួយការភូមិដែលថាមានចោរចូលប្លន់ផ្ទះរបស់ខ្លួន ទីបំផុតបានចេញមុខសារភាពពីទោសកំខុសរបស់ខ្លួននៅចំពោះមុខលោកឧត្តមសេនីយ៍ទោ អាត់ ខែម ស្នងការនគរបាលខេត្តបន្ទាយមានជ័យ ក៏ដូចជាប្រជាពលរដ្ឋ និងកម្លាំងសមត្ថកិច្ច បន្ទាប់ពីធ្វើឲ្យខាតបង់ពេលវេលាក្នុងការចុះស្រាវជ្រាវជុំវិញករណីនេះអស់រយៈពេល១យប់១ថ្ងៃ ព្រោះតែជាការប្រឌីតដើម្បីចង់បានលុយប្តី និងព្រោះតែខឹងនឹងប្តីមិនគិតគូរ ព្រោះតែខ្លួនជាអ្នកញៀននឹងល្បែង ។
ហេតុការណ៍ប្រឌីតរឿង និងបង្កឲ្យមានការភ្ញាក់ផ្អើលនេះបានកើតឡើងកាលពីវេលាម៉ោង៧ និង៤០នាទីយប់ ថ្ងៃទី០៣ ខែកុម្ភៈ ឆ្នាំ២០១៦ នៅភូមិទំនប់ដាច់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ហើយនៅរសៀលថ្ងៃទី០៤ ខែកុម្ភៈ ឆ្នាំ២០១៦ ទើបស្ត្រីរូបនេះបានចេញមុខបំភ្លឺ និងសុំការអធ្យាស្រ័យនៅស្នងការដ្ឋាននគរបាលខេត្ត ។
លោកវរសេនីយ៍ឯក សិទ្ធ ឡោះ ស្នងការរង ទទួលបន្ទុកការិយាល័យកណ្តាល នគរបាលព្រហ្មទណ្ឌ បានឲ្យដឹងថា បន្ទាប់ពីទទួលបានព័ត៌មានថា មានមានករណីប្លន់លើនៅផ្ទះប្រជាពលរដ្ឋដែលមានឈ្មោះ ឃុត សុផាត ជាជំនួយការភូមិទំនប់ដាច់ ក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីយប់ថ្ងៃទី០៣ ខែកុម្ភៈ ឆ្នាំ២០១៦ លោកឧត្តមសេនីយ៍ទោ អាត់ ខែម ស្នងការនគរបាលខេត្ត បានដាក់បទបញ្ជាឲ្យលោកដឹកនាំកម្លាំងជំនាញ រួមមានកម្លាំងវរៈការពារព្រំដែន៩១១នៅទីនោះផង និងកម្លាំងនគរបាលស្រុកអូរជ្រៅផង ចុះធ្វើការត្រួតពិនិត្យនៅទីតាំងកើតហេតុ ឃើញភស្តុតាងផ្ទុយនឹងការពិតជាច្រើន ដែលមិនមែនជាករណីចោរប្លន់ ឬចោរលួច និងបានឈានដល់ការសាកសួរស្ត្រីម្ចាស់ផ្ទះជាប្រពន្ធមានឈ្មោះ ជា សន អាយុ៣៦ឆ្នាំ ទើបដឹងការពិតថា មិនមែនជាករណីចោរប្លន់ ឬចោរលួចឡើយ ទើបធ្វើអោយស្ត្រីជាប្រពន្ធម្ចាស់ផ្ទះពេលដែលនាំមកស្នងការនគរបាលបានសហការ និងសារភាពថា ខ្លួនប្រឌីតរឿងនេះឡើងដោយសារតែខ្លួនបានយកលុយរបស់ប្តីអស់២៧.០០០បាត និងជៀសវាងប្តីដឹង និងដោយសារតែខឹងនឹងប្តីដែលជាប្តីចុងមិនដែលគិតគូរផ្គត់ផ្គង់ប្រពន្ធ កូន ទើបបែកគំនិតបង្កើតថា មានចោរចូលរើកកកាយអីវ៉ាន់ក្នុងផ្ទះ និងប្លន់យកលុយអស់ចំនួនតែម្តង ។
ព័ត៌មានលម្អិតនឹងផ្សាយជូននៅលើកាសែតកោះសន្តិភាព
ចែករំលែកព័តមាននេះ