រាជធានីភ្នំពេញ ៖ ក្រុមចោរ៣នាក់បានភ្ជង់មន្ត្រីប៉ូលិសម្នាក់ដែលកំពុងជិះម៉ូតូស្ពាយកាំភ្លើងប្លន់យកម៉ូតូទៅបាត់ដោយសុវត្ថិភាព ដែលហេតុការណ៍នេះកើតឡើងកាលពីវេលា…
រាជធានីភ្នំពេញ ៖ ក្រុមចោរ៣នាក់បានភ្ជង់មន្ត្រីប៉ូលិសម្នាក់ដែលកំពុងជិះម៉ូតូស្ពាយកាំភ្លើងប្លន់យកម៉ូតូទៅបាត់ដោយសុវត្ថិភាព ដែលហេតុការណ៍នេះកើតឡើងកាលពីវេលាម៉ោងប្រមាណជា៧ និង៣០នាទីយប់ ថ្ងៃទី២៦ ខែមករា ឆ្នាំ២០១៦ នៅចំណុចមុខខ្លោងទ្វារវត្តកំពែង ស្ថិតក្នុងភូមិត្រពាំងរំចេក សង្កាត់ចោមចៅ ខណ្ឌពោធិ៍សែនជ័យ ។
ប្រភពព័ត៌មាននៅកន្លែងកើតហេតុបានឲ្យដឹងថា ជនរងគ្រោះឈ្មោះ ឡេង ឡា ជាមន្ត្រីប៉ូលិស ហើយម៉ូតូដែលត្រូវចោរប្លន់យកទៅបាត់នោះម៉ាកហុងដា ឌ្រីម សេ១២៥ ពណ៌ខ្មៅ ស៊េរីឆ្នាំ២០១៣ ពាក់ស្លាកលេខ ភ្នំពេញ 1BR-538 ។
ប្រភពបន្តឲ្យដឹងទៀតថា មុនពេលកើតហេតុមន្ត្រីប៉ូលិសរងគ្រោះបានជិះម៉ូតូចេញពីម្តុំទួលពង្រមកយាមប្រចាំការនៅការដ្ឋានមួយកន្លែងក្បែរកន្លែងកើតហេតុដោយមានស្ពាយកាំភ្លើង១ដើមផង ខណៈមកដល់កន្លែងកើតហេតុជិតការដ្ឋាន ស្រាប់តែលេចមុខជនសង្ស័យ៣នាក់ប្រដាប់ដោយកាំភ្លើងចេញមកស្ទាក់ភ្ជង់ ហើយបាញ់គំរាមជាច្រើនគ្រាប់ ប្លន់យកម៉ូតូទៅបាត់ដោយសុវត្ថិភាព ។
ក្រោយពេលកើតហេតុ កម្លាំងសមត្ថកិច្ចទាំងប៉ូលិសទាំងអាវុធហត្ថជាច្រើននាក់បានចុះទៅអន្តរាគមន៍ភ្លាមៗដល់កន្លែងកើតហេតុ ប៉ុន្តែក្រុមចោរបានគេចខ្លួនបាត់អស់ទៅហើយ ៕
ចែករំលែកព័តមាននេះ