រាជធានីភ្នំពេញ ៖ កម្មវិធី Hennessy Artistry ក្នុងឆ្នាំ២០១៦នេះ ក្រុមហ៊ុនស្រា Hennessy នឹងរៀបចំព្រឹត្តិការណ៍កាន់តែធំ និងអស្ចារ្យជាងឆ្នាំមុនៗ ដោយមានការសម្ដែងរួមគ្នារវាងសិល្បករកម្ពុជា និងសិល្បករបរទេស។ កម្មវិធីនេះនឹងធ្វើឡើងនៅថ្ងៃទី២៥ មីនា ឆ្នាំ២០១៦ នៅសាលបុរីកោះពេជ្រ តែនៅមុនកម្មវិធីនេះចាប់ផ្ដើម ស្រា Hennessy នឹងរៀបចំឱ្យមានកម្មវិធី Hennessy Artistry Club Series នៅតាមក្លិបនានាក្នុងរាជធានីភ្នំពេញ ។
ថ្លែងនៅក្នុងសន្និសីទសារព័ត៌មានមួយកាលពីរសៀលថ្ងៃទី១៤ មករា នៅភោជនីយដ្ឋាន Forest លោក លីម សុខ ប្រធានផ្នែកអភិវឌ្ឍពាណិជ្ជកម្មជាន់ខ្ពស់របស់ក្រុមហ៊ុន Moët Hennessy Asia Pacific Pte. Ltd. បានឱ្យដឹងថា គោលបំណងនៃកម្មវិធី Hennessy Artistry គឺចង់បង្ហាញអំពីសិល្បៈលាយបញ្ចូលគ្នាជាសកល ដែលផ្តល់នូវបទពិសោធន៍ដ៏រីករាយតាមរយៈការសម្តែងទេពកោសល្យដ៏ល្អឯកនិងការផ្តល់ជូននូវស្រាលាយបញ្ចូលគ្នាដ៏ល្អបំផុត បង្កើតជាបរិយាកាសដ៏រីករាយលាយឡំនឹងតន្ត្រី ស្ទីលរាំ វប្បធម៌និងសិល្បករចម្រុះប្លែកៗដើម្បីផ្តល់នូវភាពសប្បាយរីករាយឥតដែនកំណត់ ។ បន្ទាប់ពីកម្មវិធី Hennessy Artistry នៅឆ្នាំ២០១៤ និងព្រឹត្តិការណ៍ Hennessy ជាច្រើនទៀតកាលពីឆ្នាំមុនទទួលបាននូវភាពជោគជ័យយ៉ាងខ្លាំងរួចមក បានជំរុញឱ្យយើងកាន់តែមានភាពរំភើបរីករាយ ក្នុងការរៀបចំកម្មវិធី Hennessy Artistry 2016 ជាលើកទី៦ ក្នុងប្រទេសកម្ពុជា។ ដូចលោកអ្នកដឹងហើយថា កម្មវិធី Hennessy Artistry នឹងចាប់ផ្តើមជាមួយកម្មវិធី Hennessy Artistry Club Series ជាច្រើននៅតាមក្លិបល្បីៗ ដើម្បីបន្តមហាព្រឹត្តិការណ៍ជាប់ៗគ្នាដែលមានតាំងពី៥ឆ្នាំកន្លងមកហើយនេះ Hennessy បានអញ្ជើញសិល្បករដែលមានទេពកោសល្យទាំងក្នុងប្រទេស និងនៅជុំវិញពិភពលោកដើម្បីអបអរក្នុងរយៈពេលបីខែខាងមុខនេះ ។
លោកបន្តថា មុនចាប់ផ្តើម Hennessy Artistry 2016 គឺមានកម្មវិធី Hennessy Artistry Club Series ដ៏សប្បាយរីករាយជាច្រើនដែលនឹងប្រព្រឹត្តទៅចាប់ពីថ្ងៃទី១៤ មករា ដល់ ១១ មីនា ២០១៦ ។ រាល់កម្មវិធី Hennessy Artistry Club Series ត្រូវបានរៀបចំឡើងនៅក្លិបល្បីៗ និងពេញនិយមបំផុតក្នុងរាជធានីភ្នំពេញ។ កម្មវិធីដ៏អស្ចារ្យនេះបានដំណើរការនៅទូទាំងពិភពលោកតាំងពីឆ្នាំ២០០៦ ហើយឆ្នាំនេះជាឆ្នាំទី៦ នៅប្រទេសកម្ពុជា ដែលបានចាប់ផ្ដើមតាំងពីឆ្នាំ២០០៩មក ។ កម្មវិធី Hennessy Artistry បានជួយលើកស្ទួយ«សិល្បៈលាយបញ្ចូលគ្នាជាសកល» តាមរយៈការបង្កើតបទពិសោធន៍ដ៏អស្ចារ្យ និងទាន់សម័យនៅទីក្រុងជាច្រើនជុំវិញពិភពលោករួមមាន ៖ ញូវយ៉ក ម៉ូស្គូ ហុងកុង សៀងហៃ ហូជីមិញ គូឡាឡាំពួ ម៉ានីល បាងកក ហ្សាការតា និងរាជធានីភ្នំពេញ ដើម្បីបង្ហាញពីសិល្បៈចម្រុះ និងតន្ត្រីរួមគ្នាជាសកល ។
គួរបញ្ជាក់ថា ដើម្បីញ៉ាំងឱ្យព្រឹត្តិការណ៍នេះកាន់តែអស្ចារ្យ DJ Lady Lee ដ៏ល្បីល្បាញទូទាំងពិភពលោក បានសម្ពោធបើកកម្មវិធី Hennessy Artistry Club Series នៅក្លិប EPIC កាលពីរាត្រីថ្ងៃទី១៤ មករា ។ កម្មវិធីបន្ទាប់ ក៏មានវត្តមានតារាចម្រៀងកម្ពុជាដ៏ល្បីចំនួនពីររូបគឺលោកឆន សុវណ្ណរាជ និងកញ្ញា Vanilla នៅក្លិបJet’s Club នាថ្ងៃទី ២៩ មករា ឆ្នាំ ២០១៦ ។ បន្ទាប់មកកម្មវិធីនឹងបន្ដនៅថ្ងៃទី ២៦ ខែកុម្ភៈ និងថ្ងៃទី៤ ខែមីនា និងបញ្ចប់នៅថ្ងៃទី១១ ខែមីនា ឆ្នាំ ២០១៦ ។ សម្រាប់ការចូលរួមមហាព្រឹត្តិការណ៍ដ៏អស្ចារ្យ Hennessy Artistry ២០១៦ ធំនៅថ្ងៃទី២៥ ខែមីនា ឆ្នាំ២០១៦ នៅសាលបុរីកោះពេជ្រគឺសម្រាប់តែអ្នកដែលមានលិខិតអញ្ជើញប៉ុណ្ណោះ ៕
ចែករំលែកព័តមាននេះ