ខេត្ដកំពង់ស្ពឺ ៖ បុរសម្នាក់ដែលល្បីថាចេះអាបធ្មប់ឬមន្ដអាគមចាប់ហែកមនុស្សស៊ីឆៅនិងចាប់ហែក មាន់-ទាស៊ីឆៅនៅភូមិគោកឃុំអមលាំង ស្រុកថ្ពង បង្កឱ្យមានការភ្ញាក់ផ្អើលកាលពីល្ងាចថ្ងៃទី៨ ឧសភា ឆ្នាំ ២០១០ នោះតាមពិតគឺមិនមែនដូច្នោះទេគឺបុរសនោះគ្រាន់តែស៊ីជោរនិងអួតអាងខ្លួនតែប៉ុណោះហើយក៏មិនចេះមន្ដអាគតអាបធ្មប់អ្វីដែរ ។ សូមបញ្ជាក់ថាកាលពីល្ងាចថ្ងៃទី៨ ឧសភា ឆ្នាំ២០១០ នៅភូមិគោកឃុំអមលាំង ស្រុកថ្ពង មានហេតុការណ៍ភ្ញាក់ផ្អើលមួយបង្កឱ្យអ្នកភូមិភ័យខ្លាចផងដែរដោយសារតែមានបុរសម្នាក់ចាប់ប្រតាយប្រតប់មនុស្សស្រីខ្វិនជើងម្នាក់ធ្វើជាចង់ខាំហែកស៊ី។ សេចក្ដីរាយការណ៍បានឱ្យដឹងថាបុរសដែលប៉ុនប៉ងស៊ីសាច់មនុស្សដូចគ្នានោះឈ្មោះពេញមានទីលំនៅក្នុងភូមិកើតហេតុខាងលើមុនពេលកើតហេតុវេលាម៉ោង៣រសៀលមានស្ដ្រីម្នាក់ខ្វិនជើងអាយុជាង៥០ឆ្នាំ បានអង្គុយលើ រទេះរុញពេលរំកិលមកដល់ចំណុចមុខផ្ទះបុរសចម្លែកនោះស្រាប់តែត្រូវគេស្ទុះទៅចាប់ក្រញិចបំណងហែកសាច់ស៊ីបង្កឱ្យអ្នកភូមិផ្អើលឆោឡោចូលមកជួយស្ដ្រីរងគ្រោះ ។
លោកអធិការស្រុកថ្ពងបានឱ្យដឹងថាតាមពិតនៅថ្ងៃផ្អើលឆោឡោនោះគឺបុរស ឈ្មោះពេញ ដែលជាអ្នកមកពីខេត្ដកំពង់ឆ្នាំងបានមកសែនព្រេនប្រពន្ធម្នាក់រស់នៅភូមិ-ឃុំកើតហេតុខាងលើលុះពេលផឹកស៊ីគេតែងតែអួតអាងរឿងមន្ដអាគមអាបធ្មប់ធ្វើជាទមិឡចូលចាប់មាន់រស់ឬទារស់ហែកឱ្យចេញឈាមរួចលិទ្ធនិងអួតថាស៊ីកែវ និងស៊ី សាច់មនុស្សប៉ុន្ដែគេមិនដែលឃើញស៊ីកែវឬស៊ីសាច់មនុស្សនោះទេឃើញតែលិទ្ធឈាម មាន់-ទាទៅតាមការអួតអាង (ស៊ីជោរ) ប៉ុណ្ណោះ ។ពេលឆែកមើលប្រវត្ដិរូបនៅខេត្ដកំពង់ឆ្នាំង បានឱ្យដឹងថាជននោះគ្រាន់តែជាអ្នកអួតអាងឬស៊ីជោរតែប៉ុណ្ណោះគេធ្វើជាទមិឡចូលអួតថាស៊ីសាច់ឆៅឬសាច់មនុស្ស… តាមពិតគេអត់ចេះអ្វីទេហើយគេក៏មិនដែលមានប្រវត្ដិខូចកាចអ្វីដែរ ។ លោកអធិការស្រុកថ្ពងបាននិយាយថាបើជននេះនៅតែអួតអាងអញ្ចឹងទៀតច្បាស់ជាអ្នកស្រុកថ្ពងកាប់ចោលជាមិនខាន ។ ដោយខ្លាចគេមានគ្រោះថ្នាក់សមត្ថកិច្ចក៏ស្រាវជ្រាវហៅឪពុកម្ដាយសាច់ញាតិរបស់គេឱ្យមកធានាយកបុរសឈ្មោះពេញនេះទៅខេត្ដកំពង់ឆ្នាំង វិញ៕
ចែករំលែកព័តមាននេះ