ខេត្តបន្ទាយមានជ័យ៖ នគរបាលក្រុងប៉ោយប៉ែត បានបង្ក្រាបក្រុមជនសង្ស័យ ចំនួន ០៩នាក់ ជាបន្តបន្តាប់ ដែលតែងធ្វើសកម្មភាពលួចគាស់ទម្លុះទម្លាយផ្ទះរបស់ប្រជាពលរដ្ឋយ៉ាងសកម្ម នៅក្រុងប៉ោយប៉ែត។ ជនសង្ស័យទាំង ០៩នាក់នោះ ត្រូវបានបញ្ជូនមកស្នងការដ្ឋាននគរបាល ខេត្តបន្ទាយមានជ័យ កាលពីរសៀលថ្ងៃទី២ ខែសីហា ឆ្នាំ២០២១។
លោកវរសេនីយ៍ឯក សៅ សារឿន អធិការនគរបាលក្រុងប៉ោយប៉ែត បានឲ្យដឹងថា ដើម្បីភាពសុខសាន្តរបស់ប្រជាពលរដ្ឋ នៅក្នុងមូលដ្ឋាន លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានក្រើនរំលឹកដល់កម្លាំងនគរបាលគ្រប់អធិការដ្ឋាន ស្រុក ក្រុង មិនត្រូវព្រលែងដៃចោលនោះទេ ចំពោះបញ្ហាសន្តិសុខសណ្តាប់ធ្នាប់ ជូនប្រជាពលរដ្ឋនៅមូលដ្ឋាននោះ ទន្ទឹមនឹងយើងមានភារកិច្ចការពារគោលដៅចត្តាឡីស័ក គោលដៅព្យាបាលជំងឺកូវីដ១៩ ក៏ដោយ បញ្ហាសន្តិសុខ សណ្តាប់ធ្នាប់ សុវត្ថិភាព របស់ប្រជាពលរដ្ឋ គឺជាភារកិច្ចដ៏ចំបងរបស់នគរបាល។ ជាលទ្ធផល នៅថ្ងៃទី៣១ ខែកក្កដា ឆ្នាំ២០២១ វេលាម៉ោង ១២យប់ ស្ថិតក្នងភូមិផ្សារកណ្តាល កំលាំងប៉ុស្តិ៍ផ្សារកណ្តាល បានល្បាតដល់ចំណុចផ្លូវបេតុងមុខវត្តផ្សារកណ្តាល ក៏បានជួបជនសង្ស័យ ០២នាក់ ១/- ឈ្មោះ សៅ ពុំ ភេទប្រុស អាយុ២៨ឆ្នាំ ២/- យ៉ុន សារ៉ាត់ ភេទប្រុស អាយុ ១៨ឆ្មាំ ជនទាំង២ ស្នាក់នៅភូមិផ្សារកណ្តាល ដើរស្ពាយការ៉ុង បានធ្វើការត្រួតពិនិត្យឃើញមានក្បាលរ៉ូមីណេទឹក កន្លះការ៉ុង ហើយបាននាំខ្លួន មកសួរនាំនៅអធិការ។
លោកអធិការនគរបាលក្រុងប៉ោយប៉ែត បានបន្តថា ក្រោយពីសាកសួរជនសង្ស័យទាំង ០២នាក់នេះហើយ នៅវេលាម៉ោង ១១ និង ៣០នាទី ថ្ងៃទី០១ ខែសីហា ឆ្នាំ២០២១ កម្លាំងនគរបាលអធិការដ្ឋាននគរបាលក្រុងប៉ោយប៉ែត បានបន្តទៅឃាត់ខ្លួនជនសង្ស័យ ដែលជាបក្សពួកគេ ចំនួន ០៧នាក់បន្ថែមទៀត នៅចំណុចបន្ទប់ជួល ក្នុងភូមិផ្សារកណ្តាល សង្កាត់ផ្សារកណ្តាល មាន៖១/-ឈ្មោះ មិត្ត ណាសឿត ភេទប្រុស អាយុ២១ឆ្នាំ ២/-ឈ្មោះធៀង លាភហេង ហៅហើម ភេទប្រុស អាយុ២៧ឆ្នាំ,.៣/-ឈ្មោះកែវ ម៉ៅ ភេទប្រុស អាយុ១៥ឆ្នាំ ,៤/-ឈ្មោះទីម ភ័ក្ត្រ ភេទ.ប្រុស អាយុ១៩ឆ្នាំ,៥/-ឈ្មោះយ៉ាន ស្រិន ភេទប្រុស អាយុ៣០ឆ្នាំ៦/-ឈ្មោះឆោម ម៉ាន ភេទប្រុស អាយុ២៥ឆ្នាំ, ៧/-ឈ្មោះយ៉ុម ឈី ភេទប្រុស អាយុ១៧ឆ្នាំ។
ជនទាំងអស់នោះ ស្នាក់នៅភូមិផ្សារកណ្តាល សង្កាត់ផ្សារកណ្តាល។ ក្នុងនោះ ដកហូតវត្ថុតាង រួមមាន កង្ហាត្រជាក់០១ ចានបង្គន់០១ ភ្លើងហ្វា ០៦ ឧបករណ៍បន្ទប់ទឹក+ខ្សែភ្លើងមួយចំនួន កញ្ចក់សុលឡា ០៦ ដុំឌីសង់ទ័រ១៦, រម៉កកង់បី ០១ កាំបិតក្វែវ ០១ ពូថៅ ០២ ដាវ០១ ដបជក់គ្រឿងញៀន ០៣។
លោកវរសេនីយ៍ឯក សៅ សារឿន បានបញ្ជាក់ថា ជនសង្ស័យទាំង ០៩នាក់នេះ ជាជនប្រើប្រាស់គ្រឿងញៀន ហើយភាគច្រើន គឺដើរធ្វើសកម្មភាពចូលលួចគាស់ផ្ទះរបស់ប្រជាពលរដ្ឋ ដែលបានបិទទ្វារចាក់ចោលយកសម្ភារៈ និងទ្រព្យសម្បិត្ត ដោយម្ចាស់ផ្ទះជាប់រវល់ទៅលក់ដូរនៅផ្សាររុងគ្លឿង ខាងទឹកដីថៃ។
ជនសង្ស័យ រួមទាំងវត្ថុតាង ត្រូវនគរបាលជំនាញ បានរៀបចំសំណុំរឿង បញ្ជូនខ្លួនទៅស្នងការដ្ឋាននគរបាលខេត្ត ដើម្បីចាត់ការបន្ត តាមនីតិវិធីច្បាប់៕ ណុប រក្សា
ចែករំលែកព័តមាននេះ