រាជធានីភ្នំពេញ ៖ វ៉ាក់សាំងបង្ការជំងឺកូវីដ១៩ ដែលជាជំនួយរបស់រដ្ឋអាមេរិកឈ្មោះថា« Johnson & Johnson»ដែលផ្តល់មកកម្ពុជានេះ គឺចាក់ទៅប្រជាពលរដ្ឋកម្ពុជាតែមួយដូសប៉ុណ្ណោះ ក្នុងការបង្ការជំងឺកូវីដដោយគ្មានភ្ជាប់លក្ខខណ្ឌ ។ នេះបើតាមឯកអគ្គរដ្ឋទូត អាមេរិកស្តីទី ។
ការបញ្ជាក់របស់ទូតស្តីទីអាមេរិកនេះ ខណៈរដ្ឋាភិបាលអាមេរិកបានផ្តល់វ៉ាក់សាំង Johnson & Johnsonមកដល់រដ្ឋាភិបាលកម្ពុជាចំនួន១លាន៦ម៉ឺន១០០ដូសជាប្រភេទវ៉ាក់សាំងចាក់តែមួយដូសប៉ុណ្ណោះហើយនឹងមកដល់កម្ពុជាជើងទី២ នៅថ្ងៃច័ន្ទទី២ ខែសីហា ឆ្នាំ២០២១ខាងមុខ តាមយន្តការកូវ៉ាក់ ។
ក្នុងពិធីទទួលវ៉ាក់សាំង Johnson & Johnson ជាជំនួយរបស់រដ្ឋាភិបាល និងប្រជាជនអាមេរិកតាមរយៈមជ្ឈមណ្ឌលកូវ៉ាក់ ប្រគល់ជូនរាជរដ្ឋាភិបាល និងប្រជាជនកម្ពុជា នាថ្ងៃទី៣០ ខែកក្កដានេះនៅព្រលានយន្តហោះអន្តរជាតិភ្នំពេញ លោក Benjamin Wohlauer ឯកអគ្គរដ្ឋទូតអាមេរិកស្តីទីបានថ្លែងថា ជាមួយនឹងការចូលរួមចំណែកនេះសហរដ្ឋាអារមរិកបានបញ្ជាក់ជាថ្មីនូវការប្ដេជ្ញាចិត្តយូរអង្វែងចំពោះសុខ ភាពសារធារណៈនៅកម្ពុជា ។
លោកបានបញ្ជាក់ថា រដ្ឋាភិបាលអាមេរិកផ្ដល់ឲ្យប្រទេសកម្ពុជា ចំនួនជាង១លានដូសមិនភ្ជាប់លក្ខខណ្ឌណាមួយឡើយ ផ្ទុយទៅវិញអាមេរិកចែករំលែកវ៉ាក់សាំងទាំងនេះ ដើម្បីសង្គ្រោះជីវិតមនុស្ស ហើយនឹងការការពារប្រជាជនកម្ពុជាជាង១លាននាក់ ។
ការប្ដេជ្ញាចិត្តនេះកាន់តែមានភាពច្បាស់លាស់ក្នុងអំឡុងពេលមានជំងឺរាតត្បាតទូទាំងពិភពលោកនេះ ។ លោកទូតបន្ថែមថា ការចូលរួមចំណែកនេះសហអាមេរិកនេះបញ្ជាក់ជាថ្មីនូវប្តេជ្ញាចិត្តយូរអង្វែងចំពោះសុខភាពសារធារណៈនៅកម្ពុជា ។ ការប្តេជ្ញានេះកាន់តែច្បាស់នៅអំឡុងពេលមានជំងឺរាតត្បាតទូទាំងពិភពលោកនេះ ។
លោកទូតគូសបញ្ជាក់ថា ៖«ខ្ញុំសូមធ្វើការបញ្ជាក់ថា យើងមិនចែករំលែកដូសទាំងនេះ ដើម្បីទទួលបានការអនុគ្រោះស្វែងរកសប្បទានទេ ។ វ៉ាក់សាំងរបស់យើងមិនមានភ្ជាប់ជាមួយលក្ខខណ្ឌណាមួយឡើយ យើងចែករំលែកវ៉ាក់សាំងទាំងនេះ ដើម្បីជួយសង្គ្រោះជីវិត និងដឹកនាំកិច្ចខិតិខំប្រឹងប្រែងជាសកល ដើម្បីបញ្ចប់ការរីករាលនៃជំងឺរាតត្បាត» ។
លោកបន្ដថា សហរដ្ឋអាមេរិកបានប្ដេជ្ញាចិត្តនូវថវិកាចំនួន៤ពាន់លានដុល្លារដល់យន្ដការកូវ៉ាក់ដែលធ្វើឲ្យប្រទេសនេះក្លាយជាប្រទេសចូលរួមធំជាងគេតែមួយគត់ក្នុងការឆ្លើយតបជាអន្ដរជាតិ ទៅនឹងកូវីដ-១៩ ។ នៅប្រទេសកម្ពុជា សហរដ្ឋអាមេរិក បានផ្ដល់ថវិកាជាង១១លានដុល្លារជាជំនួយដល់ការពារកូវីដ-១៩ ចាប់តាំងពីការរាលត្បាតដំបូងបានផ្ទុះឡើង ។
ជាមួយគ្នានោះដែរ លោកទូតក៏បានលើកឡើងថា ចាប់តាំងពីការផ្ទុះជំងឺកូវីដមកភ្នាក់ងារសុខាភិបាលអាមេរិក និងកម្ពុជាបានខិតខំក្នុងការស្វែងរកអ្នកឆ្លងជំងឺកូវីដដើម្បីមកព្យាបាល ។ ចំពោះកិច្ចសហប្រតិបត្តិការភាពជាដៃគូ លោកឯកអគ្គរដ្ឋទូតអាមេរិកគូសបញ្ជាក់ថា ៖«សហរដ្ឋអាមេរិកនៅតែមោទនភាពក្នុងការធ្វើជាដៃគូរជាមួយអស់លោក លោកស្រីទាំងអស់គ្នា និងជួយផ្តល់ជាឧបករណ៍ ដើម្បីបញ្ចប់ការរីករាលដាលជំងឺរាតត្បាត និងដើម្បីការពារជំងឺជំងឺរាតត្បាតនៅពេលបន្ទាប់» ។
ឆ្លៀតឱកាសនោះដែរ ឯកឧត្តមសាស្ត្រចារ្យ ម៉ម ប៊ុនហេង រដ្ឋមន្ដ្រីក្រសួងសុខាភិបាល ក៏បានថ្លែងអំណរគុណចំពោះរដ្ឋាភិបាល និងប្រជាជនអាមេរិកដែលបានផ្ដល់ជំនួយមកដល់ប្រទេសកម្ពុជានាពេលនេះ ដើម្បីប្រយុទ្ធប្រឆាំងជំងឺនៅកម្ពុជា ។ ឯកឧត្តមលើកឡើងថាវ៉ាក់សាំងរបស់រដ្ឋាភិបាលអាមេរិកមកដល់នេះមានចំនួន៤៥ម៉ឺន៥ពាន់ដូស ដែលជាជំហានដំបូងហើយនឹងមកដល់ជំហានទី២ នៅថ្ងៃទី២ ខែសីហាខាងមុខ ។
កម្ពុជាសង្ឃឹមថា នឹងទទួលបានវ៉ាក់សាំងប្រហែល៧លានដូស ស្មើ២០%នៃចំនួនប្រជាពលរដ្ឋពីមជ្ឈមណ្ឌលកូវ៉ាក់នឹងត្រូវដឹកជញ្ជូនមកជាបន្តបន្ទាប់នៅក្នុងឆ្នាំ២០២១នេះ ។ ឯកឧត្តមក៏បានផ្ដាំផ្ញើដល់ប្រជាពលរដ្ឋគ្រប់ទោះបីចាក់វ៉ាក់សាំងហើយក៏ដោយ ការអនុវត្តវិធានការរបស់រាជរដ្ឋាភិបាល និងក្រសួងសុខាភិបាលត្រូវអនុវត្តបានជាប់ជានិច្ច ៣ការពារ ៣កុំ ។
យោងតាមរបាយការណ៍របស់ក្រសួងសុខាភិបាលបានឲ្យដឹងថា គិតត្រឹមថ្ងៃទី២៩ ខែកក្កដា ឆ្នាំ២០២១ ក្រសួងសុខាភិបាល និងក្រសួងការពារជាតិបានចាក់វ៉ាក់សាំងការពារកូវីដ-១៩ ជូនមន្ត្រីរាជការប្រជាពលរដ្ឋ និងកងកម្លាំងប្រដាប់អាវុធ នៅទូទាំងប្រទេស ចំនួន ៧,១៣១,១៨៤នាក់ ។ ដោយឡែកលទ្ធផលចាក់វ៉ាក់សាំងគោលដៅ១០លាននាក់បានចំនួន៧១.៣១% ហើយ ៕
ចែករំលែកព័តមាននេះ