រាជធានីភ្នំពេញ ៖ ដំណើរកម្សាន្តរបស់អតិថិជនហ្វដ រយៈពេលបួនថ្ងៃបីយប់ កាលពីសប្ដាហ៍មុននេះ ពីថ្ងៃទី១០ ដល់ថ្ងៃទី១៣ ធ្នូ ដែលធ្វើដំណើរកាត់តាមខេត្តបាត់ដំបង ប៉ៃលិន និងចូលទៅប្រទេសថៃ
រាជធានីភ្នំពេញ ៖ ដំណើរកម្សាន្តរបស់អតិថិជនហ្វដ រយៈពេលបួនថ្ងៃបីយប់ កាលពីសប្ដាហ៍មុននេះ ពីថ្ងៃទី១០ ដល់ថ្ងៃទី១៣ ធ្នូ ដែលធ្វើដំណើរកាត់តាមខេត្តបាត់ដំបង ប៉ៃលិន និងចូលទៅប្រទេសថៃ បានបញ្ចប់ដោយបន្សល់ទុកនូវអនុស្សាវរីយ៍ជាច្រើននៅតាមតំបន់រមណីយដ្ឋាននានានៅខេត្តប៉ៃលិន និងខេត្តចន្ថាបុរី ប្រទេសថៃ ជាពិសេសនោះ អនុស្សាវរីយ៍នៃការបោះជំរំស្នាក់នៅក្នុងតង់លើវាលស្មៅ នៃតំបន់ភ្នំខេត្តប៉ៃលិន និងការបោះជំរំនៅជាប់សមុទ្រនៃប្រទេសថៃផងដែរ ។
បន្ទាប់ពីបានបោះជំរំស្នាក់នៅក្នុងខេត្តប៉ៃលិន១យប់ ក្បួនដំណើរកម្សាន្តផ្សងព្រេងបានចូលក្នុងទឹកដីនៃព្រះរាជាណាចក្រថៃ ដោយបានបោះជំរំនៅរមណីយដ្ឋានមាត់សមុទ្រមួយឈ្មោះថា រមណីយដ្ឋានឆ្នេរសមុទ្រឆៅឡៅ ។ មិនត្រឹមតែការបោះជំរំនៅក្នុងទឹកដីថៃប៉ុណ្ណោះទេ ដំណើរកម្សាន្តដែលមានអ្នកចូលរួមជាង៣០០នាក់ និងរថយន្តប្រមាណជាង៥០គ្រឿង ក៏បានធ្វើដំណើរទៅកាន់តំបន់រមណីយដ្ឋានទឹកធ្លាក់ ព្រៃកោងកាង និងមើលត្រីក្នុងពិភពសមុទ្រ ព្រមទាំងបទពិសោធន៍ដើរឡើងភ្នំផងដែរ ។
អ្វីដែលកាន់តែពិសេសជាងនេះទៀតនោះ អតិថិជនហ្វដ ក៏បានចូលទិញទំនិញដែលមានតម្លៃទាបមិនគួរឱ្យជឿ បើធៀបនឹងតម្លៃទំនិញនៅតាមបណ្ដាផ្សារនានាក្នុងប្រទេសថៃ និងកម្ពុជា នោះគឺផ្សារលក់ទំនិញបោះដុំម៉ាក្រូក្នុងខេត្តចន្ថាបុរី ។
តំណាងក្រុមហ៊ុន អ អិម អេ កម្ពុជា លោក ញ៉ែម រឹទ្ធី បានឱ្យដឹងថា ដំណើរកម្សាន្តផ្សងព្រេងរបស់អតិថិជនហ្វដ បានរៀបចំធ្វើឡើងជារៀងរាល់ឆ្នាំ ចាប់តាំងពីឆ្នាំ២០០៧មក ដោយក្នុងឆ្នាំ២០០៧ក្រុមហ៊ុនបាននាំអតិថិជនធ្វើដំណើរទៅកាន់ខេត្តមណ្ឌលគីរី ឆ្នាំ២០០៨ ទៅខេត្តរតនគីរី ឆ្នាំ២០០៩ទៅខេត្តប៉ៃលិន ឆ្នាំ ២០១០និងឆ្នាំ២០១១ ធ្វើដំណើរទៅខេត្តចម្ប៉ាសាក់ ប្រទេសឡាវ ឆ្នាំ២០១២ ទៅខេត្តមណ្ឌលគីរី ឆ្នាំ២០១៣ ទៅប្រទេសឡាវសាជាថ្មី និងឆ្នាំ ២០១៤ ទៅកាន់ខេត្តត្រាត ប្រទេសថៃ ហើយអ្នកចូលរួមបានកើនឡើងជាបន្តបន្ទាប់ ។
អតិថិជនហ្វដមួយរូប ដែលនាំគ្រួសារចូលរួមធ្វើដំណើរកម្សាន្តនេះដែរបាននិយាយថា គ្រួសារគាត់បានចូលរួមធ្វើដំណើរកម្សាន្តជាមួយក្រុមហ៊ុនជាច្រើនឆ្នាំមកហើយ ដោយសារតែគាត់បានទិញរថយន្តហ្វដប្រើប្រាស់ក្នុងអាជីវកម្មនិងការធ្វើដំណើរនានា ។ តែរាល់ការរៀបចំដំណើរកម្សាន្តរបស់ក្រុមហ៊ុនហ្វដ តែងតែផ្ដល់នូវបទពិសោធន៍ថ្មីៗសម្រាប់រូបគាត់ ជាក់ស្ដែងបទពិសោធន៍នៃការបើកបរផ្លូវឆ្ងាយៗ ផ្លូវពិបាក ឡើងភ្នំ និងអាចបញ្ជាក់ពីកម្លាំងម៉ាស៊ីនរថយន្តហ្វដបានផងដែរ ។ ម្យ៉ាងទៀត អតិថិជនទាំងអស់ដែលបានចូលរួមក៏អាចទទួលបានបទពិសោធន៍នៃការបោះតង់ស្នាក់នៅលើវាលស្មៅ លើភ្នំ និងនៅមាត់សមុទ្រ ខុសពីផ្ទះដែលយើងស្នាក់នៅជាប្រចាំ ។
អតិថិជនរូបនេះបន្តថា អ្វីដែលពិសេសទៀតនោះ អតិថិជនហ្វដទាំងអស់ក៏អាចបង្កើតទំនាក់ទំនងរវាងគ្នាក្នុងន័យទំនាក់ទំនងជាមិត្តភក្ដិ និងក្នុងន័យទំនាក់ទំនងអាជីវកម្មផងដែរ។ ដូចនេះការធ្វើដំណើរកម្សាន្តផ្សងព្រេងជាមួយក្រុមហ៊ុនហ្វដ អាចទទួលបានផលចំណេញច្រើន ទោះបីជាមានការហត់នឿយបន្តិចក្តី ៕
ចែករំលែកព័តមាននេះ