រាជធានីភ្នំពេញ ៖ ជនសង្ស័យជាមុខសញ្ញាគាស់ផ្ទះម្នាក់ កាលពីរសៀលថ្ងៃទី៦ ខែកក្កដា ឆ្នាំ២០២១ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារព្រៃជាបណ្តោះអាសន្ន ក្រោមការចោទប្រកាន់ពីបទ
រាជធានីភ្នំពេញ ៖ ជនសង្ស័យជាមុខសញ្ញាគាស់ផ្ទះម្នាក់ កាលពីរសៀលថ្ងៃទី៦ ខែកក្កដា ឆ្នាំ២០២១ ត្រូវបានចៅក្រមស៊ើបសួរសាលាដំបូងរាជធានីភ្នំពេញ សម្រេចឃុំខ្លួនដាក់ពន្ធនាគារព្រៃជាបណ្តោះអាសន្ន ក្រោមការចោទប្រកាន់ពីបទ.លួចមានស្ថានទម្ងន់ទោស (ដោយធ្វើសកម្មភាពគាស់ទម្លុះទម្លាយលួចយកទ្រព្យសម្បត្តិអ្នកដទៃ) ។
ជនសង្ស័យខាងលើឈ្មោះ ម៉ៅ ដា ភេទប្រុស អាយុ៣០ឆ្នាំ មុខរបរមិនពិតប្រាកដ ស្នាក់នៅផ្ទះជួលគ្មានលេខ ផ្លូវជាតិលេខ៦A សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
ទាក់ទិននឹងការឃុំខ្លួនមុខសញ្ញាជាចោរគាស់ផ្ទះខាងលើនេះ ត្រូវបានសមត្ថកិច្ចឲ្យដឹងថា កាលពីថ្ងៃទី២ ខែកក្កដា ឆ្នាំ២០២១ វេលាម៉ោងប្រមាណ៤រសៀល កម្លាំងសមត្ថកិច្ចនគរបាលជំនាញការិយាល័យនគរបាលព្រហ្មទណ្ឌកម្រិតស្រាល រាជធានីភ្នំពេញ បានធ្វើការស៊ើបអង្កេត និងស្រាវជ្រាវរហូតឈានដល់ការឃាត់ខ្លួនជនសង្ស័យម្នាក់នៅចំណុចខាងលិចគល់ស្ពានជ្រោយចង្វារ ផ្លូវលេខ៤៧ កែងផ្លូវជាតិលេខ៥ សង្កាត់ស្រះចក ខណ្ឌដូនពេញ ពាក់ព័ន្ធករណីលួចគាស់ទ្វារបង្អូចចូលលួចទ្រព្យសម្បត្តិប្រជាពលរដ្ឋ ដែលជនរងគ្រោះមានឈ្មោះ ស៊ាង វួចណៃ ភេទស្រី ស្នាក់នៅផ្ទះលេខ V៣A ផ្លូវជាតិលេខ៦A ក្រុម១៣ ស្ថិតក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ មុខរបរនៅផ្ទះ ។
សូមរម្លឹកថា កាលពីថ្ងៃទី២១ ខែមិថុនា ឆ្នាំ២០២១ វេលាម៉ោងប្រហែល១១និង៣០នាទីយប់ ជនសង្ស័យបានដើរចេញពីផ្ទះជួលទៅពួនសំងំក្នុងដីឡូតិ៍គ្មានលេខ ជិតបុរីហ្គ្រេនជ្រោយចង្វារ ក្នុងសង្កាត់ជ្រោយចង្វារ ខណ្ឌជ្រោយចង្វារ លុះដល់ពាក់កណ្តាលយប់ជនសង្ស័យរូបនេះក៏បានឡើងតាមដំបូលខាងក្រោយ នៅចំណុចផ្ទះជនរងគ្រោះ រួចធ្វើសកម្មភាពដោយយកដៃទាញគាស់បង្អូចដែលពុំមានលក្ខណៈរឹងមាំ រួចចូលទៅក្នុងផ្ទះលួចយកទ្រព្យសម្បត្តិរបស់ជនរងគ្រោះបានសម្រេច និងគេចខ្លួនបាត់ដោយសុវត្ថិភាព ។
សមត្ថកិច្ចបានឲ្យដឹងទៀតថា ជនរងគ្រោះបានបាត់បង់សម្ភារៈមាន ៖ មាសមួយដុំទម្ងន់កន្លះគីឡូ, ប្រាក់រៀលចំនួន៤,០០០,០០០រៀល, ប្រាក់ដុល្លារចំនួន ៥០០ដុល្លារអាមេរិក, ពេជ្រ២ឈុតតម្លៃ៣៨,០០០ដុល្លារអាមេរិក និងទូរសព្ទ័ដៃម៉ាកអាយហ្វូន១១ ប្រូ ចំនួន១គ្រឿង។
ក្រោយពេលកើតមានអំពើចោរកម្មនោះ លោកឧត្តមសេនីយ៍ឯក ស ថេត អគ្គស្នងការរងនគរបាលជាតិ ជាស្នងការនគរបាលរាជធានីភ្នំពេញ និងលោកឧត្តមសេនីយ៍ទោ សុង លី ស្នងការរង និងជាប្រធានការិយាល័យកណ្តាលនគរបាលយុត្តិធម៌ នៃស្នងការដ្ឋាននគរបាលរាជធានីភ្នំពេញ បានដាក់បទបញ្ជាឲ្យកម្លាំងការិយាល័យជំនាញព្រហ្មទណ្ឌកម្រិតស្រាល ដឹកនាំដោយលោកវរសេនីយ៍ឯក ប៊ុន សត្យា ជានាយការិយាល័យ បើកការស៊ើបអង្កេត និងស្រាវជ្រាវលើករណីនោះ រហូតឈានដល់ការចាប់ខ្លួនមុខសញ្ញាជាចោរគាស់ផ្ទះនោះតែម្តង ។
ពេលឃាត់ខ្លួនជនសង្ស័យបានហើយ សមត្ថកិច្ចបានដកហូតសម្ភារៈពីចោរមកវិញនូវ ៖ ប្រាក់ដុល្លារចំនួន២២,០០០ដុល្លារអាមេរិក (ពីរម៉ឺនពីរពាន់ដុល្លារអាមេរិក), នាឡិកាដៃចំនួន១គ្រឿងម៉ាក LONGINE ខ្សែពណ៌ខ្មៅ, ទូរសព្ទ័ដៃម៉ាកអាយហ្វូនអ៊ីចម៉េក ពណ៌ទឹកមាស១គ្រឿង និងទូរស័ព្ទដៃម៉ាក អាយហ្វូន ១១ ProMax ពណ៌បៃតង ១គ្រឿង ។
បន្ទាប់មក ទាំងជនសង្ស័យ រួមទាំងវត្ថុតាង ត្រូវបានកម្លាំងសមត្ថកិច្ចនគរបាលជំនាញការិយាល័យព្រហ្មទណ្ឌកម្រិតស្រាល កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ដើម្បីចាត់ការតាមនីតិវិធី ទើបតំណាងអយ្យការធ្វើការចោទប្រកាន់លើជនសង្ស័យជាផ្លូវការ និងទៅទីបំផុតចៅក្រមស៊ើបសួរក៏សម្រេចឃុំខ្លួនចោរគាស់ផ្ទះលួចបានមាស ពេជ្រ និងលុយរាប់ម៉ឺនដុល្លារនោះ ដែលគ្មានវាសនាបានចាយវាយលុយនោះទេ ដាក់ពន្ធនាគារព្រៃ.សជាបណ្តោះអាសន្ន ដើម្បីរង់ចាំកាត់ទោសតាមអំពើដែលចោរប្រព្រឹត្ត ៕
ចែករំលែកព័តមាននេះ