រាជធានីភ្នំពេញ ៖ ជិតផុតរដូវប្រមូលផល ម្រេចកំពតឆ្នាំនេះអាចនឹងមានទិន្នផលប្រហាក់ប្រហែលនឹងឆ្នាំ២០២០កន្លងទៅដែរ គឺប្រមាណ៩០តោន ខណៈទីផ្សារម្រេចកំពតឆ្នាំ២០២១នេះ មានការកើនឡើងតិចតួចទៅលើប្រភេទម្រេចក្រហម ។ នេះបើតាមលោកងួន ឡាយប្រធានសមាគមលើកកម្ពស់ម្រេចខេត្តកំពតមានប្រសាសន៍តាមទូរសព្ទនៅរសៀលថ្ងៃទី០៥…
រាជធានីភ្នំពេញ ៖ ជិតផុតរដូវប្រមូលផល ម្រេចកំពតឆ្នាំនេះអាចនឹងមានទិន្នផលប្រហាក់ប្រហែលនឹងឆ្នាំ២០២០កន្លងទៅដែរ គឺប្រមាណ៩០តោន ខណៈទីផ្សារម្រេចកំពតឆ្នាំ២០២១នេះ មានការកើនឡើងតិចតួចទៅលើប្រភេទម្រេចក្រហម ។ នេះបើតាមលោកងួន ឡាយប្រធានសមាគមលើកកម្ពស់ម្រេចខេត្តកំពតមានប្រសាសន៍តាមទូរសព្ទនៅរសៀលថ្ងៃទី០៥ កក្កដា ២០២១នេះ ។
លោកងួន ឡាយបានឱ្យដឹងថា តាមពិតទៅរាល់ឆ្នាំចូលដល់ខែកក្កដាគឺកសិករប្រមូលផលស្ទើរតែចង់អស់ទៅហើយ ព្រោះម្រេចចាប់ផ្ដើមប្រមូលផលតាំងមេសា ឬឧសភា ម្ល៉េះ ប៉ុន្តែដោយសារតែអាកាសធាតុ មានម្រេចខ្លះផ្លែមុនខ្លះផ្លែក្រោយទើបឱ្យការប្រមូលផលម្រេចអូសបន្លាយដល់ខែកក្កដាហើយនៅតែមិនទាន់បញ្ចប់។ លោកថា៖«រហូតមកដល់ពេលនេះ ចំការម្រេចមួយចំនួនបានបញ្ចប់ការប្រមូលផល និងមួយចំនួនទៀតនៅបន្តប្រមូលផលដដែល ដោយខ្លះទើបតែបាន៣០ភាគរយខ្លះទៀតបាន៥០ភាគរយ ពីព្រោះកសិករចង់ទុកម្រេចឱ្យទុំ ដែលខុសពីឆ្នាំមុនពេលចាស់ល្មមពួកគាត់បេះមកផ្ទះហើយ » ។
លោកបន្តថា ដោយសារតែតម្រូវការទីផ្សារម្រេចឆ្នាំនេះគឺពួកម្រេចក្រហមច្រើន ដូច្នេះហើយកសិករត្រូវពន្យារការប្រមូលផលទុកឱ្យវាទុំ ហើយការទុំឱ្យទុំនេះ មិនសូវជាល្អដូចឆ្នាំមុនៗដែរ ព្រោះអាកាសធាតុមិនទៀងទាត់ ដូច្នេះហើយទើបធ្វើឱ្យការប្រមូលផលនៅអូសបន្លាយបែបនេះ ។
លោកបន្ថែមថាទិន្នផលឆ្នាំនេះ យើងរំពឹងថាប្រហាក់ប្រហាលនឹងឆ្នាំមុនដែរ គឺជុំវិញ៩០តោន ខណៈតម្រូវការរាល់ឆ្នាំគឺប្រមាណ៧០តោន តែឆ្នាំនេះអាចនឹងលើសនេះតិចតួច ។លោកថា៖«ឆ្នាំ២០២១នេះ ផ្ទះដីប្រមូលផលនៃម្រេចកំពតបានធ្លាក់ចុះប្រមាណ៥០ហិចតាទៅហើយ ហើយក៏មិនមានផ្ទៃដីដាំថ្មីដែរ គឺមានតែផ្ទៃដីថែទាំប៉ុណ្ណោះ ។ ការបាត់បង់ផ្ទៃដីចំការម្រេចភាគច្រើនទៅលើកសិករខ្នាតធំៗ ហើយសម្រាក់កសិករខ្នាតតូចវិញមិនជាបញ្ហាចោទក្នុងការបោះបង់ចោលនោះឡើយ ពីព្រោះគេថែទាំខ្លួនឯងចំណាយទុនខ្លួនឯង » ។
លោកងួន ឡាយបានបញ្ជាក់ថា ទោះបីជាទីផ្សារមានតម្រូវការជាងឆ្នាំមុនបន្តិចក្ដី តែតម្លៃម្រេចកំពតគឺនៅតែដដែល គឺខ្មៅ១៥ដុល្លារក្នុងមួយគីឡូក្រាម ក្រហម ២៥ដុល្លារអាមេរិកក្នុងមួយគីឡូក្រាម និងម្រេចសតម្លៃ២៨ដុល្លារអាមេរិកក្នុងមួយគីឡូក្រាម ។សមាគមក៏មិនទាន់មានផែនការក្នុងការដំឡើងតម្លៃម្រេចនោះដែរ តែសមាគមនឹងរកទីផ្សារសម្រាប់ម្រេចកំពតបន្ថែមទៀត ជាពិសេសទីផ្សារប្រទេសថ្មីៗ បន្ថែមទីលើទីផ្សារដែលយើងមាននៅពេលបច្ចុប្បន្ននេះ ។
ប្រជាកសិករដាំម្រេចជាច្រើនបាននិយាយស្រដៀងៗគ្នាថា ម្រេចជាដំណាំពិបាកថែ ហើយបើណាមានចំការម្រេចគឺប្រៀបដូចជាអ្នកមានកូនង៉ែតមួយអញ្ចឹងត្រូវទៅមើលព្រឹកទៅមើលល្ងាច ហើយបើសិនជាមានព្យុះមានភ្លៀងខ្លាំងក៏ត្រូវទៅមើលវាទាំងភ្លៀងដែរ ។
ទោះបីជាម្រេចកំពតមានសមាគមដែលអាចរកទីផ្សារជូនកសិករក្ដី តែតម្រូវការនៅមានតិចជាងការផ្គត់ផ្គង់និងការបង់លុយទៅកសិករយឺតយ៉ាវ ធ្វើឱ្យកសិករមួយចំនួនបង្ខំចិត្តលក់ម្រេចរបស់ខ្លួនទៅឈ្មួញក្រៅសមាគម ដែលមានតម្លៃទាបជាងទីផ្សារក្នុងសមាគមដើម្បីបានប្រាក់កម្រៃខ្លះមកដោះស្រាយជីវិតនិងសម្រាប់សងធនាគារឬមីក្រូហិរញ្ញវត្ថុព្រោះកសិករខ្លះបានយកទុនពីធនាគារឬមីក្រូហិរញ្ញវត្ថុមកចំណាយលើដំណាំម្រេច ។
កសិករខ្លះទៀត បានដកជន្លង់ម្រេចមកទុកនៅផ្ទះវិញ ដោយសារតែកាលពីប៉ុន្មានឆ្នាំផលិតម្រេចអត់មានអ្នកទិញ និងមានតម្លៃទាប ទោះបីជាសមាគមបានប្រាប់ថាឱ្យមានអត់ធ្មត់និងរង់ចាំបន្តិចក្ដី ៕
ចែករំលែកព័តមាននេះ