ខេត្តកំពង់ចាម៖ ដោយសារតែការឆ្លងជំងឺកូវីដ១៩ ជាច្រើននាក់ អាជ្ញាធរសម្រេចបិទភូមិតាណេង ក្នុងសង្កាត់សំបួរមាស ក្រុងកំពង់ចាម មួយផ្នែក ដែលមានប្រមាណ ៧០គ្រួសារ។ ជាមួយនោះ មន្ត្រីសុខាភិបាល បានធ្វើតេស្តតាមឧបករណ៍រហ័ស លើប្រជាពលរដ្ឋជាង ៣០០ នាក់ ដើម្បីរកអ្នកវិជ្ជមានកូវីដ១៩។ នេះជាប្រសាសន៍លើកឡើងរបស់ឯកឧត្តម អ៊ុន ចាន់ដា អភិបាលខេត្ត ថ្លែងក្នុងពិធីចែកអំណោយជូនដល់ប្រជាពលរដ្ឋ ដែលមានជីវភាពខ្វះខាតប្រមាណ ១៧០គ្រួសារ នាព្រឹកថ្ងៃទី៣កក្កដា ឆ្នាំ២០២១ នៅសួនគ្រញូង ក្នុងក្រុងកំពង់ចាម។
ឯកឧត្តម អ៊ុន ចាន់ដា អភិបាលខេត្ត មានប្រសាសន៍ ដោយគូសបញ្ជាក់ថា ទោះបីជាជំងឺកូវីដ១៩ ត្រូវបានរកឃើញជាបន្តបន្ទាប់ នៅក្នុងខេត្តកំពង់ចាម រហូតមកដល់ពេលនេះ គឺអាជ្ញាធរ និងជំនាញសុខាភិបាលខេត្ត គឺអាចគ្រប់គ្រងស្ថានការណ៍បាន។ ប្រសិនបើរកឃើញមានលើសមាជិកក្រុមគ្រួសារណាមួយនោះ អ្នកផ្សេងទៀត នៅក្នុងក្រុមគ្រួសារ មិនបានចេញទៅប្រកបរបរលក់ដូរ ដើម្បីដោះស្រាយជីវភាពនោះទេ ដូច្នេះនឹងត្រូវរងផលប៉ះពាល់សេដ្ឋកិច្ចគ្រួសារ។ ជាមួយនោះ គឺមានចៅសង្កាត់ នាយប៉ុស្តិ៍ ក្រុមគ្រូពេទ្យ មេភូមិ។ អង្គទាំងបួននេះ គឺមានសារៈសំខាន់ណាស់ ប្រសិនណាបើរកឃើញអ្នកណាម្នាក់ វិជ្ជមានវីដ១៩ គឺត្រូវប្រញាប់យកទៅព្យាបាលជាបន្ទាន់។
ឯកឧត្តម អ៊ុន ចាន់ដា អភិបាលខេត្ត មានប្រសាសន៍បន្តថា តាមរយ:មេភូមិ ត្រូវតែយកចិត្តទុកដាក់តាមដានអ្នកចំណូលស្រុកពិសេសលើបុគ្គល ដែលមកពីតំបន់ក្រហម ជាកន្លែង ដែលផ្ទុះឡើងនូវជំងឺកូវីដ១៩។ បើសិនជាឃើញម្នាក់នោះ ចូលមកស្នាក់នៅផ្ទះសាច់ញាតិណាមួយ ត្រូវប្រញាប់ នាំមកធ្វើតេស្តតាមឧបករណ៍រហ័ស ប្រសិនបើឃើញវិជ្ជមានកូវីដ១៩ ត្រូវបញ្ជូនទៅព្យាបាលជាបន្ទាន់។ ការធ្វើរបៀបនេះ គឺដើម្បីកាត់បន្ថយអត្រាមរណៈ និងសង្គ្រោះអ្នកជំងឺបានទាន់ពេលវេលា និងមួយវិញទៀត មិនឲ្យជំងឺនេះ ឆ្លងចូលក្នុងសហគមន៍។
សូមបញ្ជាក់ថា នៅក្នុងក្រុងកំពង់ចាម គឺមានមន្ទីរពេទ្យ សម្រាប់ព្យាបាលជំងឺកូវីដ១៩ ចំនួន ៣កន្លែង ក្នុងនោះ រួមមាន៖ ១.មន្ទីរពេទ្យខេត្ត ២.មន្ទីរពេទ្យមេគង្គក្រុងកំពង់ចាម និង៣.វិទ្យាល័យព្រះសីហនុ។ ប្រសិនណាបើមន្ត្រីសុខាភិបាល ធ្វើតេស្តរកឃើញអ្នកផ្ទុកវិជ្ជមានកូវីដ១៩ លើបុគ្គលណាមួយ ដែលមានលក្ខណៈស្រាល ត្រូវបញ្ជូនមកព្យាបាលនៅវិទ្យាល័យព្រះសីហនុ ហើយក្នុងករណីធ្ងន់ធ្ងរ ត្រូវបញ្ជូនព្យាបាល នៅមន្ទីរពេទ្យមេគង្គ។ មួយវិញទៀត ប្រសិនបើយើងមានការធ្វេសប្រហែស មិនគោរព តាមវិធានរបស់ក្រសួងសុខាភិបាល ជំងឺកូវីដ១៩ នឹងឆ្លងមកដល់រូបយើង ហើយអាចនឹងបន្តឆ្លងដល់សមាជិកក្រុមគ្រួសារ។ សំខាន់ ត្រូវតែអនុវត្តឲ្យបានពេលមុននឹងចេញទៅខាងក្រៅជួបអ្នកណាម្នាក់ ត្រូវតែពាក់ម៉ាសឱ្យបានជាប្រចាំ ឬមានអាល់កុល សម្រាប់លាងដៃ ហើយជំងឺដ៏កាចសាហាវនេះ គឺវាច្រើនតែឆ្លងនៅកន្លែង ដែលមានមនុស្សច្រើន ក្នុងនោះ មានដូចជាទីប្រជុំជនផ្សារ ជាដើម។
សូមបញ្ជាក់ថា មួយរយៈចុងក្រោយនេះ អាការៈនៃជំងឺកូវីដ មិនបានចេញរកសញ្ញាឲ្យយើងបានដឹង ដូចជាក្អក ក្តៅខ្លួនលើសពី ៣៧អង្សារ ដូចគ្រាមុនទៀតនោះទេ ដែលមើលទៅហាក់បីដូចជា មានសុខភាពល្អធម្មតា លុះពេលដែលតេស្ត តាមឧបករណ៍រហ័ស ទើបដឹងវិជ្ជមានកូវីដ១៩។
លោក ចាន់ ផល្លី អភិបាលក្រុងកំពង់ចាម ប្រាប់ថា ដំបូង មានកម្មករនៅភូមិតាណេង បានទៅលើកត្រីចំហុយ ឲ្យគេគេ ក៏ត្រូវបានរកឃើញវិជ្ជមានកូវីដ។ ក្រោយមកទៀត មានបុរសម្នាក់ បើករថយន្តដឹកដីនៅក្រុងតាខ្មៅ ខេត្តកណ្ដាល បានមួយខែ ពេលដែលឈឺ មិនស្រួលខ្លួន ក៏ត្រឡប់មកផ្ទះនៅភូមិតាណេង លុះពេលមន្ត្រីសុខាភិបាល ពិនិត្យ ក៏ឃើញវិជ្ជមានកូវីដ។ ដោយឡែក នៅថ្ងៃទី២ កក្កដា ក្មេងស្រី អាយុ ៥ឆ្នាំម្នាក់ ក្តៅខ្លួន ពេលពិនិត្យ ឃើញវិជ្ជមានកូវីដ។ ក្នុងនោះ មានអ្នកប៉ះពាល់ផ្ទាល់ ម្នាក់ ក៏ឆ្លងកូវីដ រីឯមនុស្ស ៩នាក់ ត្រូវបានយកទៅធ្វើចត្តាឡីស័ក។
លោកអភិបាលក្រុង បន្តថា នៅយប់ថ្ងៃទី២កក្កដា អាជ្ញាធរខេត្ត សម្រេចបិទខ្ទប់ភូមិតាណេងមួយផ្នែក ដើម្បីកុំឲ្យមានការរីករាលដាលនៃជំងឺកូវីត រហូតមកដល់ព្រឹកថ្ងៃទី៣ កក្កដា មន្ត្រីសុខាភិបាល បានធ្វើតេស្តដោយឧបករណ៍រហ័ស លើប្រជាពលរដ្ឋជាង ២០០នាក់ ក្នុងនោះ គេឃើញមានវិជ្ជមាន ១១នាក់ សរុបទាំងមុន និងក្រោយ អ្នកផ្ទុកវិជ្ជមានកូវីដ មានជាង ២០នាក់ ត្រូវបាននាំទៅសម្រាកព្យាបាលនៅវិទ្យាល័យព្រះសីហនុ ក្រុងកំពង់ចាម៕ ចាន់ ថេត
ចែករំលែកព័តមាននេះ