រាជធានីភ្នំពេញ ៖ ក្នុងរយៈពេល៦ខែដំបូងនៃឆ្នាំ២០២១នេះ ក្រុមប្រឹក្សាអភិវឌ្ឍន៍កម្ពុជាហៅកាត់ថាCDC បានសម្រេចចេញវិញ្ញាបនបត្រចុះបញ្ជីជូនក្រុមហ៊ុនវិនិយោគចំនួន៦៩គម្រោង មានទឹកប្រាក់វិនិយោគសរុបចំនួនជតិ២,៤ពាន់លានដុល្លារអាមេរិក ។ នេះបើតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាដែលកោះសន្តិភាពបានបូកសរុបតាំងពីខែមករាដល់ដំណាច់ខែមិថុនា ២០២១ ។
យោងតាមរបាយការណ៍និងសេចក្តីប្រកាសដដែលនោះ ឃើញថារយៈពេល៦ខែនេះ គម្រោងលេចធ្លោជាងគេដែលក្រុមប្រឹក្សាអភិវឌ្ឍន៍កម្ពុជាបានអនុម័តនៅក្នុងរយៈពេល៦ខែនេះ គឺ ជាគម្រោងវិនិយោគរោងចក្រថាមពលអគ្គិសនីដើរដោយធ្យូងថ្ម មានទុនវិនិយោគប្រមាណ១.២៨៣លានដុល្លារអាមេរិក និងគម្រោងវិនិយោគផលិតក្រដាសមានទុនវិនិយោគ៥០៤លានដុល្លារអាមេរិក នៅក្នុងខេត្តកំពត ។
ដោយឡែកក្នុងខែមិថុនា ២០២១នេះ មានគម្រោងវិនិយោគចំនួន១២គម្រោងត្រូវបានក្រុមប្រឹក្សាអភិវឌ្ឍន៍កម្ពុជាសម្រេចចេញវិញ្ញាបនបត្រវិនិយោគចំនួន១២គម្រោងមានទឹកប្រាក់សរុបជាង១៤៣លានដុល្លារអាមេរិក និងភាគច្រើននៃគ្រោងវិនិយោគទាំងនេះគឺផ្ដោតលើរោងចកក្រកាត់ដេរសម្លៀកបំពាក់និងស្បែកជើង និងផលិតផលធ្វើដំណើរ ។
បើតាមលោកវង្សី វិស្សុត រដ្ឋលេខាក្រសួងសេដ្ឋកិច្ច និងហិរញ្ញវត្ថុបានឱ្យដឹងថា ទោះបីជាកម្ពុជាជួបនឹងវិបត្តិនៃការឆ្លងរាលដានៃកូវីដ១៩ធ្ងន់ធ្ងរយ៉ាងនេះក្ដី តែកម្ពុជានៅតែទទួលបានការវិនិយោគជាហូរហែទាំងក្នុងនិងក្រៅប្រទេស ជាក់ស្ដែងនៅក្នុងអំឡុងនៃការរាលដាលនេះ កម្ពុជានៅតែអាចទទួលវិនិយោគិនចូលមកស្វែងរកការការវិនិយោគជាបន្តបន្ទាប់ជាពិសេសវិនិយោគិនមកពីប្រទេសចិន ដែលធ្វើឱ្យចិនក្លាយជាចលករដ៏សំខាន់ក្នុងការរុញច្រើនកំណើនសេដ្ឋកិច្ចរបស់កម្ពុជាក្នុងបរិការណ៍កូវីដ១៩នេះ ។
លោកថា៖«តាមរយៈការវិនិយោគជាបន្តបន្ទាប់ទាំងវិនិយោគិនក្នុងនិងក្រៅប្រទេសបានបង្ហាញថាសេដ្ឋកិច្ចកម្ពុជាក្នុងរយៈពេលកន្លះឆ្នាំមកនេះ អាចទប់ទល់បាន និងមិនធ្វើឱ្យសេដ្ឋកិច្ចកម្ពុជាដួលរលំឡើយ » ។
បើតាមអ្នកជំនាញនៃវិស័យអចលនទ្រព្យកម្ពុជា លោកឌឹត ចណ្ណាបានឱ្យដឹងថា នៅក្នុងវិបត្តិនៃជំងឺកូវីដ១៩វិស័យផ្សេងៗបានជួបប្រទះនឹងបញ្ហា តែវិស័យឧស្សាហកម្មរោងចក្រ នៅតែមានការវិនិយោគជាបន្តបន្ទាប់ ដែលធ្វើឱ្យវិស័យនេះ ក្លាយជាវិស័យសំខាន់មួយក្នុងបរិបទកូវីដ១៩ ជាក់ស្ដែងយើងបានឃើញវិនិយោគិនជាច្រើនបានស្វែងរកទីតាំងដើម្បីដាក់ការវិនិយោគរបស់ខ្លួន ដូចជាទីតាំងសម្រាប់សង់រោងចក្រ សង់ជាឃ្លាំងជាដើម ៕
ចែករំលែកព័តមាននេះ