រាជធានីភ្នំពេញ ៖ គម្រោងកម្មវិធីជំរុញកំណើនវិស័យជលផលប្រកបដោយចីរភាព និងបរិយាប័ន្ន (ផ្នែកវារីវប្បកម្ម)” មានទឹកប្រាក់ចំនួនប្រមាណ ៣៥ លានអឺរ៉ូ ដែលជាហិរញ្ញប្បទានរបស់សហភាពអឺរ៉ុប និងហិរញ្ញប្បទានរបស់រាជរដ្ឋាភិបាលកម្ពុជាផងដែរនោះ បានចាប់ផ្ដើមអនុវត្តន៍ជាផ្លូវការដើម្បី ពង្រឹងវិស័យវារីវប្បកម្មកម្ពុជាបន្ថែមទៀត ។ នេះបើតាមសេចក្ដីប្រកាសព័ត៌មានរបស់ក្រសួងកសិកម្មរុក្ខាប្រមាញ់និងនេសាទ នៅថ្ងៃទី៣០ មិថុនា ២០២១នេះ ។
យោងតាមឯកឧត្តមវេង សាខុន រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទបានឱ្យដឹងថា គម្រោងនេះ មានរយៈពេលអនុវត្តចំនួន ០៦ ឆ្នាំ គឺគិតចាប់ពីឆ្នាំ២០១៨ រហូតដល់ឆ្នាំ២០២៣ជាគម្រោងហិរញ្ញប្បទានឥតសំណងដោយសហភាពអ៊ឺរ៉ុប លើកទី១ ដែលត្រូវបានឯកភាពគ្នាឱ្យប្រើប្រាស់នីតិវិធីរួម របស់រាជរដ្ឋាភិបាល ។ កម្មវិធីនេះ ត្រូវបានចុះហត្ថលេខារវាងរាជរដ្ឋាភិបាល ជាមួយនិងតំណាងសហភាពអ៊ឺរ៉ុប កាលពីថ្ងៃទី២៧ ខែវិច្ឆិកា ឆ្នាំ២០១៧ ដែលគម្រោងនេះកំពុងស្ថិតក្នុងដំណាក់កាលចាប់ផ្តើមអនុវត្ត ។ ជារួម គិតត្រឹមខែមិថុនា ឆ្នាំ២០២១ ការអនុវត្តគម្រោងគឺសម្រេចបាន ១៥ % ធៀបនឹងពេលវេលាប្រើប្រាស់អស់ ៥៨ % និង គម្រោងនេះ គ្រោងបញ្ចប់នៅខែធ្នូ ឆ្នាំ២០២៣។
ឯកឧត្តមបន្តថា កម្មវិធីនៃគម្រោងនេះ មានគោលបំណង ដើម្បីគាំទ្រដល់រាជរដ្ឋាភិបាលកម្ពុជាក្នុងការសម្រេចឱ្យបាននូវការអភិវឌ្ឍប្រកបដោយនិរន្តរភាព ភាពធន់ទៅនឹងអាកាសធាតុនិងបរិយាប័ន្ននៃវារីវប្បកម្ម ដោយបានអនុលោមទៅតាមផែនការយុទ្ធសាស្ត្រសម្រាប់វិស័យជលផល ចូលរួមក្នុងសន្តិសុខស្បៀង និងការអភិវឌ្ឍសេដ្ឋកិច្ចសង្គម ដើម្បីភាពរុងរឿងរបស់ប្រទេសជាតិ និងសុខុមាលភាពរបស់ប្រជាជន និងបន្សាំនឹងបម្រែបម្រួលអាកាសធាតុ ក្នុងប្រទេសកម្ពុជា និង ដើម្បីសម្រេចបាននូវសូចនាករដែលបានចែងនៅក្នុងផែនការយុទ្ធសាស្ដ្រជាតិអភិវឌ្ឍន៍វារីវប្បកម្មកម្ពុជាឆ្នាំ២០១៦-២០៣០។
តាមរយៈគម្រោងនេះ កម្ពុជារំពឹងថានឹងអភិវឌ្ឍន៍វិស័យវារីវប្បកម្មរបស់ខ្លួនកាន់តែប្រសើរ និងអាចឈានទៅរកការផ្គត់ផ្គង់បានទាំងស្រុងនូវផលិតផលវារីវប្បកម្ម កាត់បន្ថយការនាំចេញព្រមទាំងឈានទៅដល់ការនាំចេញសម្រាប់ផ្គត់ផ្គង់ទីផ្សារអន្តរជាតិនៅពេលអនាគតផងដែរ ៕
ចែករំលែកព័តមាននេះ