រាជធានីភ្នំពេញ ៖ ទោះបីជាកម្ពុជាកំពុងស្ថិតនៅក្នុងដំណាក់កាលនៃវិបត្តិកូវីដ១៩យ៉ាងនេះក្ដី ក៏កម្ពុជានៅតែទទួលបានគម្រោងវិនិយោគ ជាបន្តបន្ទាប់ ជាពិសេសនៅក្នុងវិស័យឧស្សាហកម្មរោងចក្រសហគ្រាស ជាក់ស្ដែងយោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាកាលពីថ្ងៃទី២៣ មិថុនា២០២១នេះ មានគម្រោងវិនិយោគចំនួន៣នៅខេត្តស្វាយរៀង និង១នៅខេត្តព្រះសីហនុ ត្រូវបានក្រុមប្រឹក្សាអភិវឌ្ឍន៍កម្ពុជាសម្រេចចុះបញ្ជីវិនិយោគជាផ្លូវការ ។
យោងតាមសេចក្តីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជាបានបង្ហាញថា គម្រោងវិនិយោគ៤ដែលត្រូវបានអនុម័តក្នុងថ្ងៃតែមួយនេះមានទឹកប្រាក់សរុបប្រមាណជិត៣០លានដុល្លារអាមេរិក និងបង្កើតការងារបានប្រមាណជាង១០០០កន្លែង ។
គម្រោងទាំង៤ ដែលក្រុមប្រឹក្សាអភិវឌ្ឍន៍កម្ពុជាសម្រេចចេញវិញ្ញាបនបត្រចុះបញ្ជីជាផ្លូវការរួមមាន៖
១- គម្រោងបង្កើតរោងចក្រផលិត អំពូលភ្លើង គ្រឿងបង្គុំអំពូលភ្លើង និងគ្រឿងបង្គុំវាំងននគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក ខេត្តស្វាយរៀងមានទុនវិនិយោគប្រមាណ ៥,២ លានដុល្លារអាមេរិក និងអាចបង្កើតការងារបានចំនួន ៣៩៩កន្លែង។
២- គម្រោងបង្កើតរោងចក្រផលិតតុក្តតា និងវត្ថុអនុស្សាវរីយ៍គ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ហាយ ផាក, ខេត្តស្វាយរៀង, មានទុនវិនិយោគប្រមាណ ៥,១ លានដុល្លារអាមេរិក និងអាចបង្កើតការងារបានចំនួន ៤៣៣កន្លែង។
៣- គម្រោងបង្កើតរោងចក្រផលិតក្តារបន្ទះ និងគ្រឿងសង្ហារឹម ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, មានទុនវិនិយោគប្រមាណ ៣,១លានដុល្លារអាមេរិក និងអាចបង្កើតការងារបានចំនួន ៣២នាក់។
៤- គម្រោងបង្កើតរោងចក្រផលិតទោចក្រយាន (កង់) ទោចក្រយានអគ្គិសនី (កង់អាគុយ) និងគ្រឿងបង្គុំទោចក្រយានគ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ស៊ីន បាវិត ខេត្តស្វាយរៀង, មានដើមទុនវិនិយោគប្រមាណ ១៣,៩លានដុល្លារអាមេរិក និងអាចបង្កើតការងារបានចំនួន ២៥១នាក់ ។
ក្រៅពីគម្រោងវិនិយោគទាំងនេះ ក៏មានគម្រោងវិនិយោគជាច្រើនទៀត ត្រូវអនុម័តរួចរាល់នៅក្នុងបរិបទនៃកូវីដ១៩រាលដាលក្នុងប្រទេស ក្នុងនោះភាគច្រើនជាគម្រោងវិនិយោគក្នុងវិស័យឧស្សាហកម្ម ដែលធ្វើឱ្យវិស័យនេះបានដើរតួនាទីសំខាន់ក្នុងសេដ្ឋកិច្ចរបស់កម្ពុជា ៕
ចែករំលែកព័តមាននេះ