ខេត្តព្រះសីហនុ៖ ធំ ២គ្រឿង បុកគ្នា នៅតាមបណ្តោយផ្លូវជាតិលេខ៤ ចន្លោះគីឡូម៉ែត្រ១៣៨ និង១៣៩ ស្ថិតក្នុងភូមិបឹងត្រាច ឃុំចំការហ្លួង ស្រុកកំពង់សីលា ខេត្តព្រះសីហនុ កាលពីម៉ោង ៦ព្រឹក ថ្ងៃទី១៨ ខែមិថុនា ឆ្នាំ២០២១។ ហេតុការណ៍នេះ បានបណ្តាលឲ្យអ្នកបើកបររថយន្តម្នាក់ បាត់បង់ជីវិតភ្លាមៗ ដោយគាបជាប់ក្នុងរថយន្ត។
សមត្ថកិច្ចបញ្ជាក់ថា គ្រោះថ្នាក់ចរាចរណ៍នេះ បានកើតឡើងរវាងរថយន្តផ្ទុកកុងតឺន័រ ក្បាលពណ៌ស លាយបៃតង ម៉ាក HINO ពាក់ស្លាកលេខ ភ្នំពេញ 3A-2887 បុកប៉ះជាមួយរថយន្តផ្ទុកកុងតឺន័រ ក្បាលពណ៌ ស ម៉ាក Frightliner ពាក់ស្លាកលេខ ព្រះសីហនុ 3A-1427 អ្នកបើកបរ បានរត់គេចបាត់ ក្រោយកើតហេតុ។ រថយន្តទាំងពីរនេះ បើកបរក្នុងទិសដៅផ្ទុយគ្នា។
សមត្ថមកិច្ចបន្តថា ហេតុការណ៍រថយន្តកុងតឺន័របុកគ្នានេះ បណ្ដាលអោយអ្នកបើកបរ ឈ្មោះ លី រ៉ាវី អាយុ ៣៣ឆ្នាំ ភេទប្រុស មានទីលំនៅ ក្នុងឃុំជីរោទ៍ ស្រុកត្បូងឃ្មុំ ខេត្តត្បូងឃ្មុំ បានបាត់បង់ជីវិត នៅនឹងកន្លែង ហើយអ្នករួមដំណើរ ក្នុងរថយន្ត HINO ចំនួន ២នាក់ រងរបួស មានឈ្មោះ៖ ១ -ឆាយ ឡែន ភេទ ស្រី អាយុ ៣៥ឆ្នាំ មានទីលំនៅខេត្តព្រៃវែង រងរបួសស្រាល ត្រូវជាប្រពន្ធអ្នកបើកបរខាងលើ។ ២ -ឯល សុខហេង ភេទប្រុស អាយុ ១៦ឆ្នាំ មានទីលំនៅ ក្នុងខេត្តព្រៃវែង រងរបួសស្រាល។ អ្នករងរបួសទាំងពីរ ត្រូវបានបញ្ជូនទៅព្យាបាល នៅមន្ទីរពេទ្យបង្អែកស្រុកស្រែអំបិល។
ក្រោយកើតហេតុ កម្លាំងអាវុធហត្ថ ស្នាក់ការសន្តិសុខ ៤០២ បានសហការជាមួយកម្លាំងអធិការដ្ឋាន នគរបាលស្រុកកំពង់សីលា ចុះអន្តរាគមន៍ ជួយគាស់ យកសាកសព ដែលគាបជាប់ ក្នុងរថយន្ត និងបញ្ជូនអ្នករបួសទៅមន្ទីរពេទ្យ ការពារកន្លែងកើតហេតុ រៀបចំសណ្តាប់ធ្នាប់ សំរួលចរាចរណ៍ និងដោះស្រាយបន្ត តាមនីតិវិធី៕
ចែករំលែកព័តមាននេះ