រាជធានីភ្នំពេញ ៖ ការរីករាលដាលនៃជំងឺកូវីដ១៩ នៅក្នុងសហគមន៍ក្នុងប្រទេសកម្ពុជា បានបង្ខំចិត្តអោយរាជរដ្ឋាភិបាលកម្ពុជា ដាក់ចេញនូវវិធានការមួយចំនួន ដើម្បីទប់ស្កាត់ខ្សែចម្លងនៃជំងឺដ៏
រាជធានីភ្នំពេញ ៖ ការរីករាលដាលនៃជំងឺកូវីដ១៩ នៅក្នុងសហគមន៍ក្នុងប្រទេសកម្ពុជា បានបង្ខំចិត្តអោយរាជរដ្ឋាភិបាលកម្ពុជា ដាក់ចេញនូវវិធានការមួយចំនួន ដើម្បីទប់ស្កាត់ខ្សែចម្លងនៃជំងឺដ៏កាចសា.ហាវមួយនេះ។ ជាការពិតវិធានការទាំងអស់នោះ បានធ្វើអោយមានការប៉ះពាល់ទៅលើវិស័យជាច្រើន ដោយក្នុងនោះអ្នកប្រកបអាជីពសិល្បៈក៏ទទួលរងប៉ះពាល់មួយផ្នែកផងដែរ។
វិធានការបិទជាបណ្តោះអាសន្ននូវភោជនីយដ្ឋាន រង្គសាល និងរោងសិល្បៈផ្សេងនោះបានធ្វើអោយអ្នកប្រកបអាជីពលើផ្នែកនេះជួបនូវហានិភ័យ ក្នុងនោះមួយចំនួនបានបាត់បង់ការងារ និងប្រាក់ចំណូលប្រចាំថ្ងៃមួយផ្នែកធំរបស់ពួកគេផងដែរ។ ជាផ្នែកមួយក្នុងអាជីពសិល្បៈ អ្នកដែលប្រកបការងារនៅក្នុងរង្គសាល និង PUB បាននិងកំពុងសម្តែងក្តីបារម្ភ ត្បិតពួកគេខ្លះបានពឹងផ្អែកស្ទើរតែទាំងស្រុងទៅលើមុខរបរមួយនេះ ខណៈពេលបម្រាមនៃការបិទនៅបន្តនៅឡើយ។
ប្រកបអាជីពអស់ជាច្រើន និងមួយផ្នែកពីការរកចំណូលពីការច្រៀងនៅផាប់ តារាចម្រៀងលោក និមិត្ត ហៅ Ting Tong បានអះអាងថា ក្រៅពីអាជីពសម្តែង ពិធីករ លោកក៏ជាតារាចម្រៀងមួយរូបដែលច្រៀងនៅផាប់មួយកន្លែង ក្នុងរាជធានីភ្នំពេញផងដែរ។
លោកបញ្ជាក់ថា ក្រោយពីកន្លែងផាប់ ដែលលោកច្រៀងត្រូវបានបិទ ដោយសារការឆ្លងរាលដាលនៃជំងឺកូវីដ១៩នោះមក លោក ក៏ដូចតារាចម្រៀងដែលច្រៀងជាមួយគ្នាបានបាត់បង់ចំណូលមួយផ្នែក។លោកបន្ថែមថា សម្រាប់រូបលោកអាចនិយាយបានថា ចំណូលដែលលោកបានបាត់ក្នុងពេលបិទនេះ គឺអាចមួយខែខ្ទង់ពាន់ដុល្លារ ដោយសារលោកច្រៀងជាច្រើនកន្លែង។ យ៉ាងណា បើតាមលោក និមិត្ត រហូតមកទល់នាពេលនេះ លោកក៏មិនសូវមានហានិភ័យសម្រាប់ការកចំណូលផ្សេងឡើយ ដោយលោកនៅមានការងារមួយចំនួនទៀតដែលមិនបានប៉ះពាល់។
ដោយឡែកតារាចម្រៀងដែលល្បីល្បាញតាមរយៈច្រៀង Cover ឡើងវិញនូវបទ «ស្រឡាញ់ប្តីក្មេង» នាង យ៉ានុត បានទទួលស្គាល់ពីការបាត់បង់ចំណូល និងការងារ ក្រោយពីការបិទហាងដែលនាងធ្លាប់ច្រៀងនោះដែរ។
នាងលើកឡើងថា ក្រោយពីហាងបានបិទនាងពិតជាមានការពិបាកខ្លាំងនៅក្នុងការរកប្រាក់ចំណូល ខណៈការងារផ្សេងក៏ពិបាកនឹងរកផងដែរ សម្រាប់រូបនាង។ នាងបញ្ជាក់ថា ជាធម្មតាការងារដែលនាងច្រៀងប្រចាំភោជនីយដ្ឋាននោះ គឺអាចរកប្រាក់បានប្រមាណជា២៥០ដុល្លារ ឬលើសនឹងតិចតួចសម្រាប់រយៈពេលមួយខែ។ យ៉ាងណា យ៉ានុត បានបន្ថែមថា បច្ចុប្បន្ននាងក៏នៅមានយូធូបជាមួយក្រុមការងារសម្រាប់ច្រៀងបញ្ចូលផងដែរ ប៉ុន្តែចំណូលក៏មិនសូវបានច្រើននោះឡើយ។
ជាអ្នកចម្រៀងច្រៀងនៅផាប់មួយកន្លែង កញ្ញា ចាន់ សុភ័ក្រ បានអោយដឹងដែរថា នៅក្នុងដំណាក់កាលនេះ នាងក៏មានផលប៉ះពាល់ពីការរកប្រាក់ចំណូលមួយផ្នែកពីការច្រៀងនេះដែរ។ នាងបន្តថា ចា៎ បង សម្រាប់ខ្ញុំនៅក្នុងសម័យកាលកូវីដនេះ វាប៉ះពាល់បន្តិចបន្តួច តែអាចទប់បាន ដោយសារតែនៅមានការងារផ្សេងទៀត។
យ៉ាងណានាងទទួលស្គាល់ថា តាមរយៈការបិទហាងនេះបានធ្វើអោយនាងបានបាត់បង់ចំណូលមួយផ្នែកធំបងដែរ ក្រៅពីចំណូលពីប្រាក់ខែរដ្ឋ។ នាងសង្ឃឹមថា នៅពេលឆាប់ៗ ហាងនឹងអាចបើកដំណើរការធម្មតាឡើងវិញ ក្រោយស្ងប់ស្ងាត់ជំងឺកូវីដ ដែលអាចអោយរូបនាង និងតារាចម្រៀងផ្សេងទៀតមានឱកាសបន្តការងារក្នុងការរកប្រាក់ចំណូល។
ចំណែកតារាចម្រៀងលោក ចំរើន បានបញ្ជាក់ដែរថា នៅក្នុងបរិបថសម័យកូវីដនេះ គឺរូបលោក និងតារាចម្រៀងមួយចំនួនទៀត គឺពិបាក និងបាត់ចំណូលស្ទើរទាំងស្រុងតែម្តង។ លោកបញ្ជាក់ថា សម្រាប់រូបលោកក្រៅពីការច្រៀងរាំ គឺលោកមិនមានការងារអ្វីផ្សេងឡើយ ដោយសារលោកនៅកំពុងសិក្សានៅឡើយ។ ខុសពីតារាចម្រៀងផ្សេងទៀត ដែលគេមានការងារផ្សេងក្រៅពីការច្រៀងនេះ។
យ៉ាងណាលោករំពឹងថា ការរីករាលជំងឺកូវីដ១៩ នៅក្នុងប្រទេសកម្ពុជា នឹងអាចឆាប់ធូរស្បើយ ដែលអាចអនុញ្ញាតអោយហាងនានាបើកដំណើរការធម្មតាឡើងវិញ ដើម្បីអោយរូបលោក និងតារាចម្រៀងផ្សេងទៀតបន្តការងារ ដើម្បីរកប្រាក់ផ្គត់ផ្គង់ជីវភាព៕
ចែករំលែកព័តមាននេះ