លោក តូច ប៉ូលីវ៉ា អភិបាលរងខេត្តស្វាយរៀង បានដឹកនាំកម្លាំងបញ្ជាការឯកភាពស្រុកស្វាយទាប ដែលមានលោកអភិបាលស្រុក កម្លាំងអធិការនគបាលស្រុក ប៉ុស្តិ៍រដ្ឋបាលឃុំ កងរាជអាវុធហត្ថស្រុក ចុះបង្ក្រាបហាងខារ៉ាអូខេមួយកន្លែងយីហោ «ម៉ាយហ្វេវ័ររីត» រួចឃាត់ខ្លួនម្ចាស់ខារ៉ាអូខេ និងស្ត្រីបម្រើការងារក្នុងហាង
ខេត្តស្វាយរៀង ៖ លោក តូច ប៉ូលីវ៉ា អភិបាលរងខេត្តស្វាយរៀង បានដឹកនាំកម្លាំងបញ្ជាការឯកភាពស្រុកស្វាយទាប ដែលមានលោកអភិបាលស្រុក កម្លាំងអធិការនគបាលស្រុក ប៉ុស្តិ៍រដ្ឋបាលឃុំ កងរាជអាវុធហត្ថស្រុក ចុះបង្ក្រាបហាងខារ៉ាអូខេមួយកន្លែងយីហោ «ម៉ាយហ្វេវ័ររីត» រួចឃាត់ខ្លួនម្ចាស់ខារ៉ាអូខេ និងស្ត្រីបម្រើការងារក្នុងហាងចំនួន១៧នាក់ ដើម្បីយកវិភាគសំណាក ព្រមទាំងធ្វើចត្តាឡីស័កនៅក្នុងហាងចំនួន១៤ថ្ងៃ ចំណែកឯភ្ញៀវចំនួន១២នាក់ ត្រូវបានដោះលែងឲ្យត្រឡប់ទៅផ្ទះវិញផងដែរ។
ការចុះបង្ក្រាបខាងលើនេះ កើតឡើងនៅវេលាម៉ោង៩និង៣០នាទីយប់ ថ្ងៃទី០១ ខែមិថុនា ឆ្នាំ២០២១ នៅហាងខារ៉ាអូខេយីហោ «ម៉ាយហ្វេវ័ររីត» ស្ថិតនៅភូមិទួលអង្គប់ ឃុំសំបួរ ស្រុកស្វាយទាបខេ ត្តស្វាយរៀង។
ទាក់ទិនករណីខាងលើនេះដែរ លោកអភិបាលស្រុកស្វាយទាប បានមានប្រសាសន៍ប្រាប់ថា ដោយសារហាងខារ៉ាអូខេយីហោ «ម៉ាយហ្វេវ័ររីត» បើកធ្វើអាជីវកម្មទទួលភ្ញៀវឲ្យចូលផឹកស៊ី និងអង្គុយកកកុញ ទើបមានការបង្ក្រាប ក៏ប៉ុន្តែអត់បិទអាជីវកម្មទេ ហើយក៏អត់ផាកពិន័យដែរ គ្រាន់តែឃាត់មកអប់រំ ហើយឲ្យធ្វើអាជីវកម្មធម្មតាវិញ ដោយលក់វេចខ្ចប់ តែមិនអនុញ្ញាតិឲ្យទទួលភ្ញៀវចូលស៊ីផឹកក្នុងហាងទៀតទេ។ ចំពោះម្ចាស់ហាង និងស្ត្រីបម្រើការងារក្នុងហាងចំនួន១៧នាក់ ត្រូវបានឲ្យធ្វើចត្តាឡីស័កនៅនឹងកន្លែង ក្នុងហាងចំនួន១៤ថ្ងៃ ដើម្បីរង់ចាំលទ្ធផលយកវិភាគសំណាកធ្វើតេស្តកូវីដ១៩ ដើម្បីទប់ស្កាត់ការឆ្លងរាលដាលទៅសហគមន៍ និងអនុវត្តវិធានរបស់ក្រសួងសុខាភិបាល និងអនុសាសន៍របស់រាជរដ្ឋាភិបាល «៣កុំ ៣ការពារ» ឲ្យមានប្រសិទ្ធភាព។
ចំណែកសមត្ថកិច្ចម្នាក់ក៏បានបង្ហើបឲ្យដឹងថា ហាងខារ៉ាអូខេយីហោ «ម៉ាយហ្វេវ័ររីត» ខាងលើនេះ ផ្គើននឹងសមត្ថកិច្ច គឺសមត្ថកិច្ចធ្លាប់បានចុះទៅអប់រំចំនួន២លើករួចមកហើយ ដោយមិនឲ្យទទួលភ្ញៀវ ចូលផឹកស៊ីក្នុងហាង និងមាននាងៗកំដរនោះទេ ក៏ប៉ុន្តែម្ចាស់ហាងមិនព្រមស្តាប់នៅតែផ្គើន។
ពាក់ព័ន្ធនឹងករណីនេះ ក៏ធ្វើឲ្យមហាជន ក៏ដូចជាប្រជាពលរដ្ឋដែលរស់នៅក្បែរហាងនោះរិះគន់ចំៗថា គួរតែបង្ក្រាប ហើយផាកពិន័យ កុំបើកដៃឲ្យប្រព្រឹត្តល្មើសបម្រាមរបស់ក្រសួងទេសចរណ៍ ជម្រាបជូនលោកជំទាវ ឯកឧត្តម បន្តពង្រឹងវិធានការបិទផ្អាកអាជីវកម្ម KTV ក្លឹបកំសាន្ត (ខារ៉ាអូខេ រង្គសាល ឌីស្កូតែក និងបៀរហ្កាឌិន) និងការត្រួតពិនិត្យឲ្យបានម៉ឺងម៉ាត់ជាប់ជាប្រចាំ ក៏ប៉ុន្តែហាងខារ៉ាអូខេ ខាងលើ មិនគោរពទេ ហ៊ានបើកអាជីវកម្ម ទទួលភ្ញៀវចូលផឹកស៊ីយ៉ាងគគ្រឹកគគ្រេងប្រឆាំងនឹងប្រសាសន៍សម្តេចតេជោ ដែលមិនឲ្យប្រមូលផ្តុំផឹកស៊ី ហើយត្រូវរក្សាគម្លាត និងអនុវត្តវិធានការ «៣កុំ ៣ការពារ»។
បើតាមលោកអភិបាលស្រុកស្វាយទាបវិញ ក៏បានមានប្រសាសន៍ដែរថា បើបិទអាជីវកម្មទៅធ្វើឲ្យប៉ះពាល់ដល់ជីវភាពអ្នកបម្រើការងារក្នុងហាងដល់ទៅ១៧នាក់ ទើបអាជ្ញាធរមិនឲ្យបិទហាង ដោយឲ្យលក់វេចខ្ចប់ ហើយនៅយប់កើតហេតុនោះ គឺមានភ្ញៀវចូលផឹកស៊ីក្នុងហាង និងក៏មានអ្នកមកទិញវេចខ្ចប់ដែរ ដូច្នេះទើបគ្រាន់តែឃាត់អប់រំប៉ុណ្ណោះ៕
ចែករំលែកព័តមាននេះ