រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា ស្ត្រីជនជាតិស្បែកខ្មៅម្នាក់មានជំងឺធ្ងន់ធ្ងរ ហើយត្រូវបានសាច់ញាតិដឹកទៅមន្ទីរពេទ្យកាល់ម៉ែត ប៉ុន្តែដោយសារតែស្ថានភាពជំងឺធ្វើទុក្ខខ្លាំង រហូតស្លា.ប់ពេលបញ្ជូនទៅសង្គ្រោះនៅមន្ទីរពេទ្យបានពាក់កណ្តាលផ្លូវ ទើបសាច់ញាតិសម្រេចចិត្តដឹកស.ពមកតម្កល់នៅវត្តញាណរង្សី តែគណៈកម្មការវត្តមិនអោយចូលទេ ព្រោះមិនមានលិខិតអនុញ្ញាត និងខ្លាចស.ពមានផ្ទុកជំងឺកូវីដ១៩ បង្កឱ្យមានការភ្ញាក់ផ្អើលពេញមុខវត្តញាណរង្សីតែម្តង កាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៩ ខែឧសភា ឆ្នាំ២០២១ នៅមុខវត្តញាណរង្សី ស្ថិតក្នុងសង្កាត់ទួលសង្កែ១ ខណ្ឌឫស្សីកែវ ។
សេចក្តីរាយការណ៍បានបន្តថា ស.ពស្ត្រីស្បែកខ្មៅខាងលើនេះមិនទាន់ស្គាល់អត្តសញ្ញាណនៅឡើយទេ ព្រោះសមត្ថកិច្ចមិនទាន់ហ៊ានពិនិត្យ និងបំភ្លឺពីសាច់ញាតិនៅឡើយទេ ដោយរង់ចាំក្រុមគ្រូពេទ្យមកយកសំណាកធ្វើតេស្តសិន ទើបសម្រេចជាក្រោយ។
តាមប្រភពពីបុរសម្នាក់ដែលគាត់ចេះនិយាយភាសាបរទេស សុំមិនប្រាប់ឈ្មោះ បានអោយដឹងថា តាមសម្តីក្រុមបុរសជនជាតិស្បែកខ្មៅបាននិយាយប្រាប់គាត់ថា មុនកើតហេតុ គឺស្ត្រីជនជាតិស្បែកខ្មៅរូបនោះនៅមានជីវិតនៅឡើយទេ តែដោយសារតែជំងឺធ្វើទុក្ខខ្លាំង គាត់ក៏ដឹកនារីខាងលើចេញពីផ្ទះនៅក្នុងបុរីពិភពថ្មីទួលសង្កែ តាមរថយន្តកូរ៉ូឡាមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ 2B-5314 ទៅមន្ទីរពេទ្យកាល់ម៉ែតដើម្បីសង្គ្រោះ ប៉ុន្តែក្រុមបុរសជនជាតិស្បែកខ្មៅនោះ មិនបានប្រាប់ពីអាការៈជំងឺនារីរូបនោះឡើយ។
ប្រភពដដែលបន្តទៀតថា ខណៈពេលពួកគាត់ដឹកស្ត្រីខាងលើទៅមន្ទីរពេទ្យបានពាក់កណ្តាលផ្លូវ ស្ត្រីរូបនោះគ៏បានស្លា.ប់តែម្តង ទើបពួកគាត់ក៏ដឹកស.ពស្ត្រីរងគ្រោះត្រឡប់មកផ្ទះវិញ ហើយក៏បានជួបគាត់ចេះនិយាយភាសាបរទេស និងជាអ្នកស្នាក់នៅក្នុងបុរីជាមួយគ្នា ក៏បានពឹងគាត់អោយជួយរកវត្ត និង សមត្ថកិច្ចអោយពួកគាត់ផង។
ប្រភពដដែលបន្តថា ដោយក្តីអាណិត គាត់ក៏ជូនស.ពស្ត្រីខាងលើ មកតម្កល់នៅវត្តញាណរង្សី ដែលនៅជិតនឹងបុរីពួកគេស្នាក់នៅ ប៉ុន្តែព្រះសង្ឃមិនបានបើកទ្វារអោយចូលនោះទេ ព្រោះស.ពគ្មានលិខិតស្នាមត្រឹមត្រូវ និងខ្លាចជំងឺកូវីដ១៩ ទើបមិនអនុញ្ញាតឲ្យចូលក្នុងវត្តបានទេ ។ បន្ទាប់មកគាត់ក៏រត់ទៅប្តឹងសមត្ថកិច្ចមូលដ្ឋាន ដើម្បីរាយការណ៍ពីហេតុការណ៍ដែលបានកើតឡើងតាមការពឹងពាក់របស់ក្រុមសាច់ញាតិស.ពស្ត្រីខាងលើ។
បន្ទាប់ពីសមត្ថកិច្ចទទួលបានព័ត៌មាន សមត្ថកិច្ចក៏ចុះមកដល់កន្លែងកើតហេតុ តែសមត្ថកិច្ចលោកមិនទាន់ហ៊ានធ្វើអ្វីនៅឡើយទេ ព្រោះខ្លាចស.ពស្ត្រីខាងលើមានផ្ទុកជំងឺកូវីដ១៩ ចំណែកសាច់ញាតិក៏មិនទាន់ហ៊ានបំភ្លឺដូចគ្នា ព្រោះក្រុមបុរសទាំងនោះសុទ្ធតែបានប៉ះពាល់ផ្ទាល់ជាមួយស.ពស្ត្រីខាងលើ ដើម្បីធានាសុវត្ថិភាពទាំងអស់គ្នា សមត្ថកិច្ចក៏សម្រេចអោយបុរសខាងលើដឹកស.ពត្រឡប់ទៅផ្ទះនៅជិតកន្លែងហេតុវិញសិន ដើម្បីរង់ចាំស្អែកព្រឹកខាងក្រុមគ្រូពេទ្យចុះទៅយកសំណាកស.ព ចេញលទ្ធផល និងសម្រេចជាថ្មីម្ដងទៀត ៕
ចែករំលែកព័តមាននេះ