អ្នកឯកទេសទស្សនវិជ្ជាព្រះពុទ្ធសាសនា ព្រះមហា ឡម លឿម ព្រះអង្គបានលើកឡើងយ៉ាងនេះថា ឱកាសល្អៗមិនមែនជារបស់ដែលរកបានងាយទេ ។ មនុស្សខ្លះមួយជីវិតសឹងតែរកឱកាសល្អមិនឃើញផង ត្រូវរស់នៅក្នុងភាពអស់សង្ឃឹម និងខកចិត្តចំពោះខ្លួនឯង…
អ្នកឯកទេសទស្សនវិជ្ជាព្រះពុទ្ធសាសនា ព្រះមហា ឡម លឿម ព្រះអង្គបានលើកឡើងយ៉ាងនេះថា ឱកាសល្អៗមិនមែនជារបស់ដែលរកបានងាយទេ ។ មនុស្សខ្លះមួយជីវិតសឹងតែរកឱកាសល្អមិនឃើញផង ត្រូវរស់នៅក្នុងភាពអស់សង្ឃឹម និងខកចិត្តចំពោះខ្លួនឯង ព្រមទាំងដាក់បន្ទុកឱ្យខ្លួនឯងថាជាមនុស្សគ្មានបុណ្យវាសនាថែមទៀតផង ។
ទោះជាយ៉ាងណាយើងមិនផ្តោតលើអ្នកគ្មានឱកាសជាសំខាន់នោះទេ ប៉ុន្តែចង់ផ្តោតលើអ្នកមានឱកាសហើយ ប៉ុន្តែមិនចេះប្រើឱកាសនោះឱ្យត្រឹមត្រូវ ឬមិនទាំងចាប់យកឱកាសនោះថែមទៀត ព្រោះយល់ថាឱកាសនោះគឺជាបញ្ហាឬឧបសគ្គសម្រាប់ខ្លួន ។ មនុស្សប្រភេទនេះបើក្នុងទ្រីស្តីអ្នកជោគជ័យវិញ គឺចាត់ចូលក្នុងក្រុមមនុស្សដែលគ្មានឱកាសស្គាល់រសជាតិជោគជ័យទេ ព្រោះគេបានមើលឃើញបញ្ហាក្នុងឱកាសបាត់ទៅហើយ ដែលវាផ្ទុយទៅនឹងទ្រីស្តីថា អ្នកជោគជ័យមើលឃើញឱកាសក្នុងបញ្ហា ឯអ្នកបរាជ័យមើលឃើញបញ្ហាក្នុងឱកាស ។ ដូច្នេះបើមានឱកាសហើយមិនចាប់យក ឬចាប់យកហើយ តែធ្វើគ្រាន់តែបង្គ្រប់កិច្ច ឬតំដរអារម្មណ៍ នោះមានន័យថា មិនចេះប្រើឱកាសដែលខ្លួនមានឱ្យបានត្រឹមត្រូវ ដើម្បីអភិវឌ្ឍន៍សមត្ថភាពរបស់ខ្លួនឱ្យកាន់តែខ្ពង់ខ្ពស់ ។
តាមពិតទៅការមិនចេះប្រើឱកាសនេះវានាំឱ្យមានគ្រោះមហន្តរាយធំធេងណាស់សម្រាប់ការអភិវឌ្ឍខ្លួន ពីព្រោះថាឱកាសវាមិនចេះតែកើតមានញឹកញាប់ចំពោះបុគ្គលគ្រប់គ្នានោះទេ ។ ម្យ៉ាងទៀតពេលវេលា អាយុ និងវ័យ រមែងដើរទៅមុខជានិច្ច ហើយសេចក្តីស្លា.ប់ក៏កាន់តែខិតជិតចូលមកកៀក ។ ប្រសិនបើយើងបណ្តោយឱ្យឱកាសល្អបាត់បង់ទៅជាញឹកញាប់ នោះមានន័យថាយើងបាត់បង់ឱកាសរីកចម្រើន និងបាត់បង់ឱកាសបង្កើតភាពជោគជ័យមិនខាន ។
ការចេះចាប់យកឱកាស និងការចេះប្រើឱកាសនោះដោយល្អត្រឹមត្រូវ ប្រកបដោយការទទួលខុសត្រូវខ្ពស់ ព្រមទាំងប្រកបដោយវិរិយភាពដ៏មុតមាំខ្លាំងក្លាទៀត ការរីកចម្រើនលូតលាស់សមត្ថភាព ប្រាជ្ញាស្មារតី និងបញ្ញាញាណច្បាស់ជាកើតមានជាប្រាកដ ហើយសមត្ថភាព និង បញ្ញាញាណនឹងនាំយើងទៅរកភាពល្អប្រសើរ ថ្លៃថ្លា និងរុងរឿងតាមរយៈភាពជោគជ័យជាបន្តបន្ទាប់ក្នុងការបំពេញកិច្ចការទាំងឡាយទាំងពួងដោយប្រើសមត្ថភាព និងបញ្ញាញាណនោះ ។
ដូច្នេះត្រូវមានការប្រុងប្រយ័ត្នខ្ពស់ក្នុងការប្រើប្រាស់ឱកាសដែលយើងមានហើយ បើនិយាយតាមបែបសាសនាត្រូវដើរតាមលំអានឥទ្ធិបាទធម៌ទាំងបួនប្រការជានិច្ចទើបបានជោគជ័យនៃខ្សែជីវិត ៕ សាន សារិន
ចែករំលែកព័តមាននេះ