បន្ទាយមានជ័យ៖ ប៉ូលិសបានឃាត់ខ្លួនក្មេងទំនើង ២នាក់ ក្នុងចំណោមបក្ខពួកច្រើននាក់ ដែលបានធ្វើសកម្មភាពកាប់លើជនរងគ្រោះ ២នាក់ បណ្តាលឲ្យរបួស នៅវេលាម៉ោង ៨យប់ ថ្ងៃទី១៣ ខែឧសភា ឆ្នាំ២០២១ នៅភូមិគោករមៀត ឃុំបន្ទាយឆ្មារ ស្រុកថ្មពួក។
មន្ត្រីអធិការដ្ឋាននគរបាលស្រុកថ្មពួក បានប្រាប់ថា ជនសង្ស័យ ២នាក់នោះ មាន១.ឈ្មោះ មុំ សុណា ភេទប្រុស អាយុ ២១ឆ្នាំ រស់នៅភូមិគោកខ្ពស់ ឃុំគោកកឋិន ស្រុកថ្មពួក ២.ឈ្មោះ ទីន ប្រុស ហៅ ញ៉ូវ ភេទប្រុស អាយុ ២៥ឆ្នាំ រស់នៅភូមិភ្នំធំ ឃុំអូរប្រាសាទ ស្រុកមង្គលបូរី។
មន្ត្រីនគរបាល បានប្រាប់ថា ក្រោយទទួលពាក្យបណ្តឹងជនរងគ្រោះ ឈ្មោះ សិទ្ធិ ហេង ហៅ ពេជ្រ ភេទប្រុស អាយុ ២៧ឆ្នាំ របួសចិញ្ចើមខាងស្តាំ ៤ធ្នេរ និងឈ្មោះ សេង ចំរើន ហៅ ស្នា ភេទប្រុស អាយុ ២៧ឆ្នាំ របួសខ្នង និងឆ្អឹងជំនីខាងស្តាំ ដែលមានក្មេងទំនើង ១ក្រុម ធ្វើសកម្មភាពកាប់ ហើយបើកម៉ូតូ រត់បាត់អស់។
មន្ត្រីនគរបាល បានបញ្ជាក់ថា ក្រោយទទួលបណ្តឹងមន្ត្រីនគរបាល បានធ្វើការស្រាវជ្រាវកំណត់មុខសញ្ញាឃាត់ខ្លួនជនសង្ស័យ ២នាក់ ក្នុងចំណោមបក្ខពួក ធ្វើសកម្មភាពកាប់លើជនរងគ្រោះ ដើម្បីយកសាកសួរនៅអធិការដ្ឋាននគរបាលស្រុកថ្មពួក។
តាមចម្លើយសារភាព មូលហេតុពួកគេកាប់ទៅលើជនរងគ្រោះ ព្រោះគំនុំខឹង ដែលក្រុមជនរងគ្រោះ ធ្លាប់ស្ទាក់ដេញកាប់ពួកគេ ទើបដេញកាប់វិញ ក្រោយពេលសាកសួរ ហើយត្រូវបានកសាងសំណុំរឿង បញ្ជូនទៅសាលាដំបូងខេត្តចាត់ការតាមច្បាប់៕ ប៊ុន ធឿន
ចែករំលែកព័តមាននេះ