រាជធានីភ្នំពេញ ៖ បើតាមសេចក្តីរាយការណ៍បានឱ្យដឹងថា មុខសញ្ញាចោរឆក់ខ្សែ.កចំនួន២នាក់ត្រូវបានសមត្ថកិច្ចនគរបាលប៉ុស្តិ៍រដ្ឋបាលសង្កាត់បឹងព្រលឹត ដេញប៉ផាប់ចាប់ពភីង រហូតឃាត់ខ្លួនបានកាលពីវេលាម៉ោង៩កន្លះព្រឹក នាថ្ងៃទី១៤ ខែឧសភា ឆ្នាំ២០២១ នៅចំណុចមុខផ្ទះលេខ៨AEo ផ្លូវ១២៥ ស្ថិតក្នុងភូមិ៥ សង្កាត់បឹងព្រលិត ខណ្ឌ៧មករា ខណៈពេលជនសង្ស័យរូបនេះ បានធ្វើសកម្មភាពឆក់ខ្សែ.កពីប្រជាពលរដ្ឋ២នាក់ប្តីប្រពន្ធដែលបម្រុងដើរចូលរថយន្ត ។
សេចក្តីរាយការណ៍បន្តថា ជនសង្ស័យទាំង២នាក់ខាងលើនេះ ម្នាក់ឈ្មោះ អៀង ភារៈ ភេទប្រុស អាយុ២១ឆ្នាំ មុខរបរធ្វើចុងភៅ មានទីលំនៅផ្ទះជួលមិនចាំលេខ ស្ថិតក្នុងភូមិគោកជាន់ សង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ ជាអ្នកឆក់ (ពិនិត្យទឹកនោមមានសារធាតុញៀន) និងម្នាក់ទៀតឈ្មោះ ហេង សាម៉ន ហៅយៀន ភេទប្រុស អាយុ២៩ឆ្នាំ មុខរបរជាងក្រឡឹង មានទីលំនៅផ្ទះលេខ១២១៣Eo ផ្លូវ១៤ ក្នុងសង្កាត់បឹងស្រឡាង ខណ្ឌទួលគោក រាជធានីភ្នំពេញ អ្នកបិទគូថ (ពិនិត្យទឹកនោមមានសារធាតុញៀន) ។
ចំណែកជនរងគ្រោះក្នុងអំពើឆក់ខាងលើនេះ មានឈ្មោះ ឡូវ តិចសុផាន ភេទប្រុស អាយុ៥៣ឆ្នាំ មុខរបរលក់ដូរ មាទីលំផ្ទះលេខ ៨AEo ផ្លូវ១២៥ ស្ថិតភូមិ៥ សង្កាត់បឹងព្រលិត ខណ្ឌ៧មករា រាជធានីភ្នំពេញ និងខ្សែ.កមាស១ខ្សែទម្ងន់៥ដំឡឹង ក៏ត្រូវបានប្រគល់ឲ្យទៅម្ចាស់វិញផងដែរ ។ ក្នុងនោះផងដែរ សមត្ថកិច្ចក៏បានដកហូតម៉ូតូ២គ្រឿងរបស់ជនសង្ស័យដែលជាមធ្យោបាយជិះធ្វើសកម្មភាព ដោយ១គ្រឿងម៉ាកស្មាស់ ពណ៌ខ្មៅ សេរី២០២១ គ្មានស្លាកលេខ និងមួយគ្រឿងទៀតម៉ាក SCOPY ពណ៌ស ពាក់ស្លាកលេខ.ភ្នំពេញ ១iR៨៤៧៦ សេរី២០២១ ។
ទាក់ទិនករណីខាងលើនេះ លោកវរសេនីយ៍ត្រី ប៉ាត សំណាត នាយនគរបាលប៉ុស្តិ៍បឹងព្រលឹត បានឲ្យដឹងថា អង្គហេតុដំបូង ជនរងគ្រោះ២នាក់ប្តីប្រពន្ធបានចតរថយន្តទុកនៅកន្លែងកើតហេតុ ហើយពួកគាត់ក៏បានចុះរកទិញម្ហូបអាហារ និងបន្លែ ត្រី សាច់ ។ លុះពេលទិញម្ហូបអាហារបានហើយ ប្តីដើរមករកចូលរថយន្តមុន ចំណែកប្រពន្ធដើរតាមក្រោយ ដោយម្នាក់ៗមានពាក់ខ្សែ.កដូចគ្នា គ្រាន់តែប្រពន្ធពាក់ខ្សែប្លាកទីនរាងតូចបន្តិច រីឯប្តីពាក់មាសក្រហមឆ្អិនឆ្អៅចំហក.អាវ ដូចបង្ហាញឲ្យចោរឃើញ បានចោរធ្វើសកម្មភាពតែម្តង ។
ប្រភពដដែលបន្តថា លុះពេលប្តីបម្រុងយកដៃទៅបើកទ្វាររថយន្ត ដើម្បីដាក់ម្ហូបអាហារចូល ក៏ស្រាប់តែមានចោរម្នាក់ជិះម៉ូតូអាស្មាស់ ពណ៌ខ្មៅ ទៅឆក់ខ្សែ.កមាស បណ្តាលឲ្យដាច់ចេញពី.កជនរងគ្រោះតែម្តង ។ ពេលឆក់បានខ្សែ.កភ្លាម ជនសង្ស័យបានបើកម៉ូតូចេញទៅវឹង ក្នុងបំណងជិះគេចខ្លួន តែត្រូវជនរងគ្រោះទាំង២នាក់ប្តីប្រពន្ធស្រែកថា «ចោរៗ» ធ្វើឲ្យជនសង្ស័យមានភាពភ័យស្លន់ស្លោ ក៏ជិះម៉ូតូទៅប៉ះជាមួយនឹងអ្នកដំណើរផ្សេងទៀត បណ្តាឲ្យដួលម៉ូតូប្រកាច់ប្រកិន ហើយក៏ជនសង្ស័យរូបនេះក៏បានរត់ទៅឡើងជិះម៉ូតូបក្ខពួកម្នាក់ទៀត ដែលនៅចាំបិទគូថក្បែរទីនោះ ។
លោកនាយនគរបាលប៉ុស្តិ៍បន្តថា ម៉ូតូស្កុបពីដែលនៅចាំបិទគូថនោះ បានឌុបជនសង្ស័យជិះចេញទៅ បានប្រហែល៧០ម៉ែត្រពីកន្លែងកើតហេតុ ក៏ជួបជាមួយកម្លាំងសមត្ថកិច្ចនគរបាលប៉ុស្តិ៍ និងខណ្ឌ កំពុងតែចេញល្បាតតាមមូលដ្ឋាន ស្របពេលនោះលោកអធិការខណ្ឌក៏បញ្ជាតាមវិទ្យុទាក់ទង ស្តីពីសកម្មភាពចោរឆក់ខ្សែ.ករបស់ប្រជាពលរដ្ឋនោះផង កម្លាំងល្បាតក៏បានស្ទុះទៅចាប់ខ្លួនជនសង្ស័យ តែត្រូវជនសង្ស័យផ្តួលម៉ូតូចោល និងរត់យកប្រះអាយុរៀងៗខ្លនតែម្តង ។
ទោះជាយ៉ាងណាក្តី ភ្លាមៗនោះសមត្ថកិច្ចក៏ចាប់ខ្លួនបានម្នាក់ជាអ្នកបិទគូថ ដែលឌុបបក្ខពួកមានបំណងគេចខ្លួន ចំណែកជនសង្ស័យដែលឆក់នោះបានរត់ទៅមុខ និងចូលទៅតាមច្រកផ្លូវតូចៗ ប៉ុន្តែក៏នៅតែគេចមិនផុតពីកណ្តាប់ដៃសមត្ថកិច្ចដែរ គឺចាប់បានភ្លាមៗដូចគ្នា និងនាំទៅកាន់ទីស្នាក់ការប៉ុស្តិ៍ ដើម្បីឲ្យចោរបានរួចផុតពីកំហឹងមហាជន ។
ក្រោយពេលនាំជនសង្ស័យទាំង២នាក់ទៅដល់នគរបាលប៉ុស្តិ៍ សមត្ថកិច្ចត្រូវការរកវត្ថុតាងដូចជា ខ្សែ.ក ដែលជនរងគ្រោះបានធ្វើការចោទប្រកាន់ ពេលនោះជនសង្ស័យខ្លាចឈឺសាច់ ក៏បានឆ្លើយថា «ខ្សែ.កដែលឆក់បាននោះលាក់ទុកក្នុងលីអូ» ។ ភ្លាមៗនោះ សមត្ថកិច្ចបង្ខំចិត្តស្រាតលីអូចោរ ដើម្បីរកវត្ថុតាងខ្សែ.កមាស៥តម្លឹងដែលជារបស់ជនរងគ្រោះនោះ ស្រាប់តែស្រឡាំងកាំងតែម្តង ព្រោះអត់ឃើញខ្សែ.កនោះទេ ឃើញតែប្រដាប់ប្រដារបស់ចោរតែប៉ុណ្ណោះ ។ ចុងក្រោយ សមត្ថកិច្ចបានរកឃើញខ្សែ.កនៅផ្លូវឌឿងហែម ដែលជនសង្ស័យរត់ចូល រួចក៏ជ្រុះនៅទីនោះ ហើយជាសំណាងបំផុតដែលអ្នកដំណើរមិនបានប្រទះឃើញ ។
ក្រោយពីសាកសួរយកចម្លើយបណ្តោះអាសន្ននៅប៉ុស្តិ៍រដ្ឋបាលនគរបាលបឹងព្រលឹត ជនសង្ស័យត្រូវបាននាំខ្លួនទៅអធិការដ្ឋាននគរបាលខណ្ឌ៧មករា ដើម្បីកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការតាមនីតិវិធី ៕
ចែករំលែកព័តមាននេះ