រាជធានីភ្នំពេញ ៖ បេក្ខនារីរាជធានីភ្នំពេញ កញ្ញាសុវត្ថិឌី ធារិកា ខកខានទៅវគ្គផ្តាច់ព្រ័ត្រដោយធ្លាក់ត្រឹមវគ្គពាក់កណ្តាលផ្តាច់ព្រ័ត្រនៃកម្មវិធីប្រឡងចម្រៀងលំដាប់ពិភពលោក «ខេមបូឌាន អាយដល» កាលពីរាត្រីថ្ងៃអាទិត្យទី២៥ តុលា ឆ្នាំ២០១៥ ។ ការចាកចេញរបស់សុវត្ថិឌី ធារិកា ទាំងភាពតានតឹង និងសោកស្តាយពន់ប្រមាណក្នុងអារម្មណ៍ទស្សនិកជន សូម្បីតែគណៈកម្មការខ្លះបង្ហាញពីក្តីអាឡោះអាល័យ និងអួលដើមក ព្រោះតែនាងជាក្មេងស្រីពូកែ និងតស៊ូបំផុតទម្រាំបានឈានដល់វគ្គពាក់កណ្តាលផ្តាច់ព្រ័ត្រ ។
បេក្ខនារីសុវត្ថិឌី ធារិកា បានធ្វើឲ្យទស្សនិកជនទទួលស្គាល់ពីទេពកោសល្យរបស់នាងក្រោយពីនាងក្រមុំវ័យ១៧ឆ្នាំរូបនេះច្រៀងបទ «សង្សារ២៥០០» របស់កញ្ញាឱក សុគន្ឋកញ្ញា ដោយស្រែកច្រៀងបានល្អកក្រើកឆាកធ្វើឲ្យទស្សនិកជនភ្ញាក់ផ្អើល សូម្បីតែនៅតាមទំព័រហ្វេសប៊ុកក៏បង្ហាញការចាប់អារម្មណ៍ខ្លាំងថា «នាងពិតជាមិនធម្មតាឡើយ» ។ ចាប់តាំងពីពេលនោះមកសុវត្ថិឌី ធារិកា ទទួលបានការបោះឆ្នោតគាំទ្រជាបន្តបន្ទាប់ និងបានក្លាយជាបេក្ខនារីឆ្នើមក្នុងក្រសែភ្នែកទស្សនិកជន ។ ធារិកា តែងតែមិនធ្វើឲ្យអ្នកទស្សនាខកចិត្តឡើយពីមួយសប្តាហ៍ទៅមួយសប្តាហ៍ ដោយនាងឆក់បានប្រជាប្រិយភាពជាប់រហូត ។ ពីដំបូងគ្មានអ្នកណាស្មានដល់ឡើយថា កញ្ញាតូចច្រឡឹងធារិកា ហក់ឡើងដល់ដំណាក់កាលនេះទេ ព្រោះបើក្រឡេកមើលបេក្ខជនជាច្រើនទៀត ចូលរួមប្រឡងនោះ ម្នាក់ៗមានសំឡេងល្អ ។ ទោះជាយ៉ាងណាក្តី ធារិកាអាចទម្លាក់បេក្ខជនដទៃទៀតយកឈ្នះពីមួយវគ្គទៅមួយវគ្គក្រោមទឹកដមសំឡេងពីរោះ បូកទាំងភាពឆ្លាតវៃ តែងតែស្តាប់តាមបង្គាប់ គ្រូៗរហូតឈ្នះលើវិញ្ញាសាដាក់ប្រកួតជាប់ជាហូរហែ ។
ពន្លកអ្នកសិល្បៈដែលតែងតែសាងភាពភ្ញាក់ផ្អើលដល់គណៈកម្មការ ក៏ដូចជាទស្សនិកជនសុវត្ថិឌី ធារិកា បានជ្រុះចេញពីការប្រកួតហើយក្នុងពេលដែលនាងជិតតោងឡើងដល់វគ្គផ្តាច់ព្រ័ត្រសល់តែមួយអាទិត្យទៀតប៉ុណ្ណោះ ។ ក្នុងវគ្គពាក់កណ្តាលផ្តាច់ព្រ័ត្រ សំឡេងបោះឆ្នោតគាំទ្រពីមហាជន ធារិកាទទួលបានតិចជាងគេ ក្នុងចំណោមបេក្ខជន-បេក្ខនារីចំនួន៤នាក់ ។ ខណៈប្រកាសលទ្ធផលនោះ ទស្សនិកជនក៏ដូចជាគណៈកម្មការដែរ ម្នាក់ៗបុកពោះស្ទើរតែអស់ព្រលឹងពីខ្លួន ពេលស្តាប់ជាក់ច្បាស់ថា ធារិកាអស់សិទ្ធិឡើងទៅប្រកួតវគ្គចុងក្រោយដែលមានពានរង្វាន់ និងទឹកប្រាក់ច្រើនកំពុងតែរង់ចាំម្ចាស់ជ័យលាភី ។
ក្នុងវគ្គពាក់កណ្តាលផ្តាច់ព្រ័ត្រនោះមានបេក្ខជន៤នាក់ប្រកួតប្រជែងគ្នា មានសុវត្ថិឌី ធារិកា ពីភ្នំពេញ លោកនី រតនា ពីកំពង់ធំ លោកម៉ៅ ហាជី ពីបាត់ដំបង និងលោកសៅ ឧត្តម ពីស្វាយរៀង ។ វិញ្ញាសាប្រកួតមានពីរជុំ គឺជុំទី១ច្រៀងម្នាក់២បទ ។ ជុំទី២ច្រៀងរួមគ្នាជាមួយគណៈកម្មការ ។ ការសម្តែងវគ្គទី២ គឺធារិកាសម្តែងជាមួយលោកព្រាប សុវត្ថិ, លោកម៉ៅ ហាជី ជាមួយកញ្ញាឱក សុគន្ឋកញ្ញា, លោកនី រតនា សម្តែងជាមួយលោកឆន សុវណ្ណរាជ និងលោកសៅ ឧត្តម ជាមួយលោកណុប បាយ៉ារិទ្ឋិ ។
ក្រោយប្រកាសលទ្ធផលឲ្យកញ្ញាសុវត្ថិឌី ធារិកា អស់សិទ្ធិឡើងទៅវគ្គចុងក្រោយនោះ គណៈកម្មការដាក់ពិន្ទុ កញ្ញាឱក សុគន្ឋកញ្ញា និងលោកណុប បាយ៉ារិទ្ឋិ ហាក់មានអារម្មណ៍ក្តុលក្តួលរហូតរលីងរលោកទឹកភ្នែក និងអួលដើមក ។ នេះបញ្ជាក់ថា គុណភាពនៃការខិតខំរបស់សុវត្ថិឌី ធារិកា ពិតជាបន្សល់នូវការសោកស្តាយ ។
ក្រោយពេលប្រកាសលទ្ធផលរួច កញ្ញាឱក សុគន្ឋកញ្ញា ដែលតែងតែសរសើរពីទេពកោសល្យរបស់កញ្ញាសុវត្ថិឌី ធារិកា បាននិយាយទាំងទឹកមុខក្រៀមក្រំថា «ការចាកចេញរបស់សុវត្ថិឌី ធារិកាពិតជាបង្កឲ្យនាងខ្ញុំមានអារម្មណ៍តានតឹងណាស់ ក្តុកក្តួលណាស់ ព្រោះជាក្មេងស្រីឆ្លាត តស៊ូ រហូតអាចធ្វើឲ្យទស្សនិកជនទទួលស្គាល់ ។
ធារិកា ត្រូវខិតខំតស៊ូជាមួយសិល្បៈដែលខ្លួនស្រឡាញ់ ដោយសារតែពេលនេះធារិកា គឺជាបេក្ខនារីម្នាក់ដែលមានសមត្ថភាព ហើយមហាជនជាច្រើនពិតជាដឹងយ៉ាងច្បាស់ថា នាងគឺជាពន្លកសិល្បៈមួយដែលល្អគួរឲ្យចាប់អារម្មណ៍» ។
ដោយឡែកសុវត្ថិឌី ធារិកា ដែលតែងតែទទួលបានលទ្ធផលល្អគ្រប់ទម្រង់វិញ្ញាសាចម្រៀង ហើយសម្រេចគោលដៅឲ្យទស្សនិកជនជក់ចិត្ត បានសម្តែងការសោកស្តាយ ដោយនិយាយថា «ពេលនេះនាងខ្ញុំធ្វើមិនបានល្អ សូមអភ័យទោសចំពោះលោកយាយ អ្នកម៉ាក់ និងក្រុមគ្រួសារ ។ទោះបីជាយ៉ាងណាក្តី នេះជាមោទនភាពមួយដែលនាងខ្ញុំ និងក្រុមគ្រួសារបានចូលដល់ដំណាក់កាលនេះ ។ នាងខ្ញុំធ្លាប់ចូលរួមប្រឡងច្រើនមកហើយតែងតែបរាជ័យ ប៉ុន្តែបរាជ័យលើកនេះដូចជាទទួលជោគជ័យវិញទេ ព្រោះលំបាកណាស់ ហើយនាងខ្ញុំអាចឈ្នះបន្តពីមួយវគ្គទៅមួយវគ្គបាន ។ នាងខ្ញុំសូមអរគុណចំពោះអ្នកដែលអាណិតស្រឡាញ់នាងខ្ញុំ គាំទ្រនាងខ្ញុំ មានទាំងក្នុងទំព័រហ្វេសប៊ុកជាដើមពិតជារំភើប ។
ក្រៅពីនេះអរគុណដល់គណៈកម្មការទាំង៤រូបបានផ្តល់បទពិសោធន៍ ល្អៗ ។ អរគុណដល់ក្រុមការងារស្ថានីយទូរទស្សន៍ហង្សមាស ពិធីករ-ពិធីការិនី ដែលបានជួយលើកទឹកចិត្តរហូតមក។ នាងខ្ញុំសូមសន្យាថា នឹងពុះពារតស៊ូតទៅទៀតដ្បិតមានទឹកចិត្តស្រឡាញ់សិល្បៈ» ៕
ចែករំលែកព័តមាននេះ