រាជធានីភ្នំពេញ ៖ ការធ្លាក់ពីកម្មវិធីប្រកួតចម្រៀងខេមបូឌាន អាយដល របស់បេក្ខជនអ៊ាម វន្នី ដែលអាចនិពន្ធបទភ្លេង និងទំនុកច្រៀង ព្រមទាំងមានទឹកដមសំឡេងពីរោះបែបមនោសញ្ចេតនានោះ បានក្លាយជារឿងរ៉ាវមួយដែលមហាជនចាប់អារម្មណ៍ ។ តាមការកត់សម្គាល់ការចាកចេញរបស់បេក្ខជនរូបនោះហាក់ធ្វើឲ្យមិនអស់ចិត្តពីទស្សនិកជនមួយចំនួន ប៉ុន្តែនេះជាលទ្ឋផលកើតចេញពីមហាជនបោះឆ្នោត ។ ចំពោះគណៈកម្មការមិនអាចកំណត់ជោគវាសនាបេក្ខជនបានទេ ។
កម្មវិធីប្រឡងចម្រៀងលំដាប់ពិភពលោកខេមបូឌាន អាយដល ត្រូវមហាជនជក់ចិត្តមិនតែប៉ុណ្ណោះសូម្បីតែថ្នាក់ដឹកនាំកំពូលសម្តេចតេជោ ហ៊ុន សែន ក៏តាមដាន និងកោតសរសើរការរៀបចំផងដែរ ។ ម្ល៉ោះហើយបេក្ខជនបេក្ខនារី ខ្លាំងៗនៅសល់ប្រមាណ៤ទៅ៥រូប ត្រូវអ្នកទស្សនាពិបាកក្នុងការជ្រើសរើសឲ្យមួយណាចាកចេញ ដូច្នេះហើយអ្នកខ្លះចង់ឲ្យជាប់ទាំងអស់ ។ ចំពោះអ៊ាម វន្នី គឺជាបេក្ខជនម្នាក់ត្រូវមហាជនកត់ចំណាំច្រើនមិនចាញ់អ្នកប្រឡង ផ្សេងៗទៀតដោយសារតែមានសំឡេងពីរោះ និងអាចនិពន្ធទំនុកច្រៀង និងបទភ្លេងបានដោយខ្លួនឯង ។ ការប្រកួតនេះផ្តោតលើការបោះឆ្នោតពីទស្សនិកជន រាប់ពាន់រាប់ម៉ឺននាក់ ដែលយល់ថា អ្នកណាសមទៅវគ្គបន្តទៀត ។ លុះដល់វេនអ៊ាម វន្នី ចាកចេញក៏មានការនិយាយ ផ្សេងៗពីកម្មវិធីដ៏ល្បីនេះ ។
ជាការមើលឃើញក្នុងវគ្គដែល អាម វន្នី ដើរចេញអស់សិទ្ធិនោះ ហាក់ធ្វើមិនបានល្អដោយអ្នកមើលខ្លះថាដូចជានៅខ្វះចន្លោះ ។ ខ្លះទៀតហាក់បុកពោះតែលើបេក្ខជន នី រតនា ពីខេត្តកំពង់ធំជាងវន្នី ប៉ុន្តែបែរជានី រតនា ធ្វើឲ្យកក្រើកឆាកជាមួយចម្រៀង២បទ ដែលស្តាប់ទៅ តឹងៗឡើងសំឡេងខ្ពស់ស្ទើរតែបាត់ជំហរ បើមិនប្រយ័ត្ននោះអាចភ្លាត់ស្នៀត ។ លើសពីនេះ មានទស្សនិកជនមួយចំនួនហាក់ពិបាកទទួលយកដោយខ្លះសោកស្តាយ ។
កាន់តែឡើងកម្តៅថែមទៀតនោះ វេទិកានេះមានអ្នកនយោបាយ គឺលោកអេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិចាប់អារម្មណ៍ ដោយកាលពីថ្ងៃទី១៩ តុលា ២០១៥ បានរិះគន់ទៅលើការប្រឡងនោះថាមិនមានភាពប្រក្រតីក្នុងការជម្រុះបេក្ខជននៃកម្មវិធីផ្សាយផ្ទាល់វគ្គ «Live Show» សប្តាហ៍ទី៧ ។ លោកឆៃអ៊ាង លើកឡើងថា ការបោះឆ្នោតរបស់អ្នកគាំទ្រមិនត្រូវបានបង្ហាញជាសាធារណៈ ។
ក្រោយការរិះគន់នោះសម្តេចតេជោ ហ៊ុន សែន បានប្រដូចការរិះគន់របស់លោកអេង ឆៃអ៊ាង ទៅលើការប្រឡងចម្រៀងលំដាប់ពិភពលោកនេះថា ដូចជាការរិះគន់ និងប្រឆាំងទៅលើលទ្ធផលបោះឆ្នោតនៅកម្ពុជាដែរ ។ ក្នុងវីដេអូឃ្លីបរយៈពេល១០នាទីបង្ហោះនៅលើទំព័រហ្វេសប៊ុក នាថ្ងៃទី២៤ តុលា ឆ្នាំ២០១៥ពីប្រទេសបារាំងសម្តេចតេជោ ហៅការរិះគន់ថាគ្មានមូលដ្ឋាន និងមិនយល់ពីនីតិវិធីនៃការជ្រើសរើសរបស់កម្មវិធី ។ សម្តេចបញ្ជាក់ថា សូម្បីតែលទ្ធផលនៃកម្មវិធីប្រឡងសិល្បៈមួយកើតចេញពីការសម្រេចចិត្តរបស់ប្រជាពលរដ្ឋ គណបក្សប្រឆាំងមិនទាំងទទួលស្គាល់ផង តើមានហេតុផលណា ដែលបក្សប្រឆាំងទទួលស្គាល់លទ្ធផលបោះឆ្នោតនៅកម្ពុជាដែលរៀបចំដោយគណៈកម្មាធិការជាតិរៀបចំការបោះឆ្នោតនោះ ។
សម្តេចតេជោបានអំពាវនាវឲ្យបេក្ខជន-បេក្ខនារីដែលមិនទាន់ធ្លាក់ គួរកុំបាក់ទឹកចិត្តពីការរិះគន់របស់អ្នកនយោបាយ ហើយសម្តេចសង្ឃឹមថា អ្នកនយោបាយមិនលូកដៃទៅក្នុងបញ្ហាសិល្បៈនៃកម្មវិធីទូរទស្សន៍ទេ ។
សម្តេចតេជោហ៊ុន សែន បានកោតសរសើរគណៈកម្មការទាំង៤រូប គឺលោកព្រាប សុវត្ថិ លោកណុប បាយារិទ្ធ លោកឆន សុវណ្ណរាជ និងកញ្ញាឱក សុគន្ធកញ្ញា ពិធីករ-ពិធីការិនី ដែលរួមគ្នាធ្វើកម្មវិធីខេមបូឌាន អាយដល ប្រព្រឹត្តទៅដោយល្អប្រសើរ ។ សម្តេចតេជោស្នើឲ្យស្ថានីយទូរទស្សន៍ហង្សមាសផ្តល់ឱកាសដល់បេក្ខជនដែលធ្លាក់ក្នុងវគ្គជម្រុះទាំង១២រូប បានឡើងបង្ហើរសំនៀងក្នុងកម្មវិធីប្រគំតន្ត្រីរបស់ស្ថានីយទូរទស្សន៍ ព្រោះសុទ្ធតែមានសំឡេងពីរោះ ៕
ចែករំលែកព័តមាននេះ