រាជធានីភ្នំពេញ ៖ បើសិនកម្ពុជាបានចាកចេញពីប្រទេសអភិវឌ្ឍន៍តិចតួច ផលប៉ះពាល់មកកម្ពុជានឹងអាចមានដូចជាការបាត់បង់នូវការអនុគ្រោះពន្ធមួយចំនួនពីប្រទេសរីកចម្រើននៅលើឆាកអន្តរជាតិ ។ តែកម្ពុជានឹងរកដំណោះស្រាយនានា ដើម្បីឱ្យការចាកចេញពីក្រុមប្រទេសអភិវឌ្ឍន៍តិចតួចបានរលូន ។
យោងតាមប្រសាសន៍លោកពេជ ឬទ្ធីរដ្ឋលេខាធិការនៃក្រសួងពាណិជ្ជកម្មកម្ពុជាបានមានប្រសាសន៍នៅក្នុងសិក្ខាសាលាតាមវីឌីអូ អនឡាញមួយកាលពីថ្ងៃទី០៧ ឧសភា ២០២១ស្ដីពីផលប៉ះពាល់នៃការចាកចេញពីប្រទេសអភិវឌ្ឍន៍តិចតួច មកលើវិស័យវាយនភណ្ឌ និងសម្លៀកបំពាក់ឱ្យដឹងថា វិស័យកាត់ដេរកម្ពុជាពិតជាមានសារសំខាន់ណាស់ក្នុងការជំរុញកំណើនសេដ្ឋកិច្ចកម្ពុជា ហើយការអនុគ្រោះពន្ធពីប្រទេសធំក៏រឹតតែមានអត្ថប្រយោជន៍សម្រាប់ការនាំចេញរបស់កម្ពុជាផងដែរ នៅពេលកម្ពុជាស្ថិតនៅក្នុងក្រុមប្រទេសអភិវឌ្ឍន៍តិចតួច ។
លោកបន្តថា បើសិនជាកម្ពុជាចាកចេញពីឋានៈជាប្រទេសអភិវឌ្ឍន៍តិចតួច វានឹងអាចបង្កផលប៉ះពាល់ដល់ភាពអនុគ្រោះពន្ធ លក្ខខណ្ឌនៃប្រភពដើមកំណើតទំនិញ ភាពទាក់ទាញសម្រាប់ការវិនិយោគ ភាពប្រកួតប្រជែងរបស់កម្ពុជា ផលប៉ះពាល់នៃវិបត្តិកូវីដ១៩ លើវិស័យកាត់ដេរនិងសម្លៀកបំពាក់និងឱកាសក្នុងការទទួលជំនួយពាណិជ្ជកម្មជាដើម ។
ដើម្បីដោះស្រាយបញ្ហានេះ លោកពេជ ឬទ្ធី បានលើកឡើងអំពីគោលនយោបាយនិងយុទ្ធសាស្ត្រដើម្បីកម្ពុជាអាចពង្រឹងភាពប្រកួតប្រជែង និងត្រៀមខ្លួនសម្រាប់ចាកចេញពីឋានៈជាប្រទេសអភិវឌ្ឍន៍តិចតួចប្រកបដោយជោគជ័យ ក្នុងនោះរួមមាន ការធ្វើពិពិធកម្មទីផ្សារនាំចេញតាមរយៈកិច្ចព្រមព្រៀងពាណិជ្ជកម្មសេរីទ្វេភាគីនិងពហុភាគី ការជំរុញឱ្យមានការគាំទ្រពីដៃគូអភិវឌ្ឍន៍ ព្រមទាំងការរៀបចំបង្កើតជាគោលនយោបាយ និងយុទ្ធសាស្ត្រពាណិជ្ជកម្មផងដែរ ដែលកន្លងមកក្រសួងពាណិជ្ជកម្មបានរៀបចំយុទ្ធសាស្ត្រសំខាន់ៗចំនួនពីរគឺ យុទ្ធសាស្ត្រសមាហរណពាណិជ្ជកម្មកម្ពុជាឆ្នាំ ២០១៩-២០២៣ និងយុទ្ធសាស្ត្រពាណិជ្ជកម្មតាមប្រព័ន្ធអេឡិចត្រូនិក ។
គួរបញ្ជាក់ថាប្រទេសដែលមានសេដ្ឋកិច្ចរីកចម្រើនជាបន្តបន្ទាប់នឹងត្រូវឱ្យចាកចេញពីក្រុមប្រទេសអភិវឌ្ឍន៍តិចតួចនេះហើយ ជាក់ស្ដែងកម្ពុជាក្នុងរយៈពេលប៉ុន្មានឆ្នាំមុននេះ កំណើនសេដ្ឋកិច្ចសម្រេចក្នុងរង្វង់ប្រមាណ៧ភាគរយក្នុងមួយឆ្នាំ ហើយប្រាក់ចំណូលប្រចាំឆ្នាំរបស់ពលរដ្ឋកម្ពុជាក៏បានកើនឡើងជាបន្តបន្ទាប់ផងដែរ កាលពីប៉ុន្មានឆ្នាំមុននេះ ៕
ចែករំលែកព័តមាននេះ