រាជធានីភ្នំពេញ ៖ តារាចម្រៀង លោកយ៉ែម សំអូន និងអ្នកនាងយ៉ាន លីនដា អតីតជាគូស្វាមី-ភរិយា បានជួបគ្នានៅប្រទេសថៃជាលើកដំបូង ចាប់តាំងពីចំណងអាពាហ៍ពិពាហ៍របស់ពួកគេប្រេះឆាជាងកន្លះឆ្នាំកន្លងមក ។
ការជួបគ្នាក្នុងប្រទេសថៃនោះ អ្នកនាងយ៉ាន លីនដា ចាកចេញពីប្រទេសអូស្ត្រាលី និងលោកយែ៉ម សំអូន ចេញពីប្រទេសកម្ពុជា ។
គេមិនដឹងថាវត្តមាននៅក្នុងប្រទេសថៃរបស់លោកយ៉ែម សំអូន និងអ្នកនាងយ៉ាន លីនដា នោះជាឱកាសផ្សះផ្សាចំណងស្នេហ៍របស់ពួកគេវិញ ឬយ៉ាងណាទេ ដោយអ្នកនាងយ៉ាន លីនដា អះអាងតាមហ្វេសប៊ុកកាលពីពេល ថ្មីៗកន្លងមកថា នាងទៅទីនោះដើម្បីកិច្ចការជំនួញ និងដំណើរកម្សាន្ត ។
តាមរយៈការបង្ហាញរូបភាពរបស់អ្នកនាងយ៉ាន លីនដា នៅទីក្រុងបាងកកនោះ គឺមានការជួបជុំជាមួយនាងគង់ ច័ន្ទស្រីមុំ និងកញ្ញាមួយមួយ ដែលជាអ្នករួមអាជីពក្នុងក្រុមបង្ហាញម៉ូដ ហេតុនេះគេសន្និដ្ឋានថា ទោះចង់មិនចង់ក៏អ្នកនាងយ៉ាន លីនដា និងលោកយ៉ែម សំអូន គេចមិនផុតពីការជួបមុខគ្នាឡើយ ហើយវាអាចជាឱកាសសម្រាប់ពួកគេផ្សារភ្ជាប់ចំណងអាពាហ៍ពិពាហ៍ឡើងវិញ ។
ជាការកត់សម្គាល់ការបង្ហាញវត្តមាននៅក្នុងប្រទេសថៃ ដំណាលគ្នារបស់លោកយ៉ែម សំអូន និងអ្នកនាងយា៉ន លីនដា បន្ទាប់ពីមុននេះមានព័ត៌មានលើកឡើងថា អ្នកទាំងពីរមានបំណងវិលទៅរួមទ្រនំស្នេហ៍ជាថ្មី ។ ផ្ទុយទៅវិញ ព័ត៌មាននោះត្រូវតារាចម្រៀងខ្មែរសញ្ជាតិអូស្ត្រាលី អ្នកនាងយ៉ាន លីនដា បដិសេធថាវាមិនអាចកើតឡើងឡើយ ។
តាមហ្វេសប៊ុកអ្នកនាងយ៉ាន លីនដា សរសេរថា «ខ្ញុំចង់និយាយថា ពាក្យចចាមអារ៉ាមកើតឡើងវាមិនអាចទៅរួចទេ ខ្ញុំមិនអាចទទួលយកលោកយ៉ែម សំអូន ជាស្វាមីវិញទេ វាមិនអាចទៅរួច ព្រោះខ្ញុំមិនអាចវិលទៅទទួលយកប្តីដែលធ្វើបាបខ្ញុំទាំងលើរាងកាយ និងផ្លូវចិត្តបានទេ ហើយសូម្បីតែមនុស្សស្រីដទៃទៀតក៏មិនអាចទទួលបានដូចគ្នា» ។
ចំណងស្នេហ៍ជាង១៥ឆ្នាំ របស់លោកយ៉ែម សំអូន និងអ្នកនាងយ៉ាន លីនដា ដាច់ដោចក្រោយធ្លាយព័ត៌មានថា លោកយ៉ែម សំអូន លួចមានស្នេហាលួចលាក់ជាមួយមនុស្សប្រុសដូចគ្នា ហើយថែមទាំងប្រើអំពើហិង្សាដាក់ភរិយាស្របច្បាប់ទៀតផង ។ អំពើហិង្សានោះធ្វើឲ្យអ្នកនាងយ៉ាន លីនដា ផ្ទុះកំហឹងទ្រាំមិនបានរហូតឡើងយន្តហោះឆ្ពោះទៅកាន់ដែនកោះអូស្ត្រាលីបាត់ ។
បន្ទាប់ពីជួបរឿងប្រេះឆាមក លោកយ៉ែម សំអូន តែងតែបន្ទន់ឥរិយាបថ និងបានផ្ញើសារសុំទោសភរិយាជាបន្តបន្ទាប់ ប៉ុន្តែទោះជាយ៉ាងណាក្តី មិនបានទទួលចម្លើយជាវិជ្ជមានណាមួយពីអ្នកនាងយ៉ាន លីនដា ឡើយ ។
មហាជនកំពុងរង់ចាំមើលថា ចំណងស្នេហ៍រវាងលោកយ៉ែម សំអូន និងអ្នកនាងយ៉ាន លីនដា អាចផ្សារភ្ជាប់គ្នាវិញ ឬយ៉ាងណា បន្ទាប់ពីពួកគេមានឱកាសបានជួបមុខគ្នានៅប្រទេសថៃនោះ ៕
ចែករំលែកព័តមាននេះ